សមាជិក សមាជិកា សមាគមក្សេមក្សាន្តចំនួន ៩រូប ប្រកាសជ្រើសរើសប្រធានថ្មី ជំនួស លោក ជុំ ម៉ី ដើម្បីរក្សាអព្យាក្រឹត្យភាព និងឯករាជ្យភាព របស់សមាគម។
ការប្រកាសរើសប្រធានថ្មីជំនួស លោក ជុំ ម៉ី នេះ បានធ្វើឡើងបន្ទាប់ពីប្រធានសមាគមរូបនោះ ប្រកាសដឹកនាំធ្វើមហាបាតុកម្មប្រឆាំងប្រធានស្តីទីគណបក្សសង្គ្រោះជាតិ លោក កឹម សុខា។
លោក កឹម សុខា ត្រូវបាន លោក ជុំ ម៉ី ចោទថា មិនទទួលស្គាល់របបសម្លាប់រង្គាលរបស់ខ្មែរក្រហម អំឡុងទសវត្ស១៩៧៩ ពិសេសការធ្វើទារុណកម្មនៅគុកទួលស្លែង។
តាមសេចក្តីថ្លែងការណ៍ចុះថ្ងៃទី៨ ខែមិថុនា របស់សមាជិក-សមាជិកាសមាគមក្សេមក្សាន្ត ដែលចុះហត្ថលេខារួមគ្នា មាន លោក ជុំ ស៊ីរ៉ាត់ លោក ហេង ប៊ុន លោក ប៊ូ ម៉េង លោកស្រី ជុំ នៅ ជាដើម ឲ្យដឹងថា គណៈកម្មាធិការនាយកសមាគមក្សេមក្សាន្ដ បានជួបប្រជុំគ្នាពិភាក្សាលើសកម្មភាពរបស់ លោក ជុំ ម៉ី ដែលបានចេញមុខដឹកនាំការធ្វើបាតុកម្មប្រឆាំង លោក កឹម សុខា ។សមាគម បន្តថា ក្រោយកិច្ចប្រជុំ គណៈកម្មាធិការនាយក នឹងស្នើឲ្យមហាសន្និបាតបោះឆ្នោតជ្រើសរើសបុគ្គលណា ដែលមានភាពស្មោះត្រង់នឹងស្មារតីរបស់សមាគម និងមានអព្យាក្រឹត្យភាពឡើងធ្វើជា ប្រធានសមាគមក្សេមក្សាន្ដ។
សមាគមក្សេមក្សាន្ដ អះអាងថា សមាគមនេះ មិនចូលរួមក្នុងបាតុកម្ម ដែលដឹកនាំដោយ លោក ជុំ ម៉ី ប្រឆាំងនឹងលោក កឹម សុខា នោះទេ ដោយសារតែទង្វើនេះប្រឆាំងនឹងស្មារតីនៃការបង្កើតសមាគម ដែលមានគោលបំណងចង់រកយុត្ដិធម៌ជូនជនរងគ្រោះតាមផ្លូវតុលាការ ឲ្យមានការសះស្បើយក្នុងផ្លូវចិត្ដ និងផ្សះផ្សាជាតិ ហើយប្រឆាំងដាច់ខាត ចំពោះការបំបែកបំបាក់ជាតិ។
លោក ជុំ ម៉ី ប្រការដឹកនាំបាតុកម្មប្រឆាំង លោក កឹម សុខា នៅថ្ងៃអាទិត្យស្អែកនេះ ដែលគេសង្ឃឹមថា មានមនុស្សជិត១ម៉ឺននាក់ចូលរួម៕
No comments:
Post a Comment
yes