លោក សម រង្ស៊ី ប្រធានគណបក្សសង្គ្រោះជាតិ
ប្រធានគណបក្សសង្គ្រោះជាតិ លោក សម រង្ស៊ី នៅថ្ងៃចន្ទប្រកាសថា សមាជិកតំណាងរាស្ត្រគណបក្សប្រឆាំង នឹងមិនចូលរួមប្រជុំសភានៅថ្ងៃដំបូងជាដាច់ខាត ប្រសិនបើពុំមានដំណោះស្រាយសមរម្យលើភាពមិនប្រក្រតីនៃការបោះឆ្នោត។ លោក សម រង្ស៊ីប្រកាសដូចនេះ នៅលើបណ្តាញសង្គមហ្វេសប៊ុករបស់លោក។
លោក សម រង្ស៊ី មានប្រសាសន៍ថា៖«យើងនឹងមិនចូលរួមប្រជុំសភានៅថ្ងៃដំបូងជាដាច់ខាត ប្រសិនបើពុំមានដំណោះស្រាយណាមួយសមស្រប ទាក់ទងនឹងការលួចបន្លំសន្លឹកឆ្នោត ផ្ទុយមកវិញយើងនឹងរួមគ្នាក្រោកឡើង ទាមទារឲ្យមានការផ្លាស់ប្តូរ ជាដាច់ខាតក្នុងឆ្នាំ២០១៣នេះ»។ នៅពេលជួបប្រជាពលរដ្ឋនៅខេត្តព្រៃវែង នៅថ្ងៃចន្ទនេះ លោក សម រង្ស៊ីបានថ្លែងប្រាប់ប្រជាពលរដ្ឋថា តើការប្រជុំសភា អាចប្រព្រឹត្តទៅយ៉ាងម៉េច បើមិនមានសមាជិកគ្រប់គ្រាន់។
លោកបញ្ជាក់ថា នេះមិនមែនសភាជាតិទេ គឺសភាគណបក្សប្រជាជនកម្ពុជា ដូច្នេះគេមិនបានទទួលស្គាល់ទេ។ លោក សម រង្ស៊ីបន្តថា លោកនាយករដ្ឋមន្ត្រីភូតផរថា ព្រះមហាក្សត្រនឹងកោះហៅតំណាងរាស្ត្រទាំងអស់ ឲ្យចូលរួម ចង់ចាំទេ។ តែលោកបានរំលឹកថា ក្នុងអតីតព្រះមហាក្សត្រនរោត្តមសីហនុ ធ្លាប់ប្រកាសថា បើអត់មានគ្រប់គណបក្សចូលរួម សភាជាតិនឹងមានមានការទទួលស្គាល់ឡើយ។
លោក សម រង្ស៊ី និងអនុប្រធាន លោក កឹម សុខា បានប្រកាសទៅកាន់ប្រជាពលរដ្ឋ និងគាំទ្រក្នុងខេត្តព្រៃវែងថា គណបក្សលោកនឹងការពារជ័យជម្នះ មិនថយក្រោយ ដើម្បីផ្លាស់ប្តូរថ្នាក់ដឹកនាំប្រទេស។លោក សម រង្ស៊ី មានប្រសាសន៍ថា៖«ជ័យជម្នះរបស់គណបក្សសង្គ្រោះជាតិ ជាស្នាដៃរបស់បងប្អូនម្នាក់ៗ យើងការពារជម្នះរបស់យើង អត់ឲ្យជនខិលខូចលួចបានទេ យើងអត់ថយក្រោយទេ ឈានដល់ដំណាក់កាលនេះហើយ ៥ឆ្នាំទៀត ជាតិយើងនឹងរលាយ»។ កន្លងទៅ លោកនាយករដ្ឋមន្ត្រី បានប្រកាសថា នឹងមិនមានការជាប់គាំងនយោបាយទេ ហើយការបង្កើតរដ្ឋាភិបាល នឹងមិនជួបការលំបាកទេ ដោយសារតែរដ្ឋធម្មនុញ្ញនៃប្រទេសកម្ពុជា បានកំណត់ថា ទាល់តែសំឡេងតំណាងរាស្ត្រក្នុងរដ្ឋសភា ២ ភាគ ៣ ដែលត្រូវការសំឡេង៨២ រូប និងត្រូវមានរ៉ូម មាន ៧ ភាគ ១០ ( ក្នុងចំណោមសមាជិតសភាសរុប ១២៣ រូប ) ៨៧ រូប ទើបអាចប្រជុំបាន។ តែចាប់ពីឆ្នាំ២០០៨ មក គឺត្រូវការសំឡេងត្រឹមតែ ៥០ ភាគ បូក ១ ដែលស្មើប្រមាណ ៦៣ នាក់ គឺបើកកិច្ចប្រជុំបានហើយ។
នាយករដ្ឋមន្ត្រី លោក ហ៊ុន សែន បានបញ្ជាក់ថា ការមិនចូលរួមប្រជុំរដ្ឋសភារបស់គណបក្សប្រឆាំង គឺជារឿងរបស់គេ។នាយករដ្ឋមន្ត្រីបន្តថា បើសិនជាគណបក្សប្រឆាំង មិនចូលរួមប្រជុំរដ្ឋសភា លើកដំបូង មានន័យថា តំណាងរាស្ត្រនោះ ប្រឆាំងនឹងព្រះមហាក្សត្រ ព្រោះរដ្ឋធម្មនុញ្ញ បានកំណត់ថា ព្រះមហាក្សត្រ ត្រូវកោះប្រជុំរដ្ឋសភា នីតិកាលថ្មី នៅរយៈពេលយ៉ាងយូរ ៦០ ថ្ងៃ ក្រោយថ្ងៃបោះឆ្នោត។ ដូច្នេះអ្នកមិនចូលរួមប្រជុំ គឺប្រឆាំងនឹងព្រះមហាក្សត្រ និងឆន្ទៈរបស់រាស្ត្រ ដែលបានបោះឆ្នោតឲ្យ។ លោក ហ៊ុន សែន បន្តថា បើសិនជាតំណាងរាស្ត្រគណបក្សសង្គ្រោះជាតិ មិនចូលរួម ហើយលាលែង គជប នឹងយកអាសនៈនោះ ទៅឲ្យគណបក្សប្រជាជនកម្ពុជា ដែលមានឈ្មោះនៅក្នុងរដ្ឋសភា៕
No comments:
Post a Comment
yes