លោក ឈូក បណ្ឌិត ជនជាប់ចោទបាញ់កម្មករនៅក្រុងបាវិត
សាលាដំបូងខេត្តស្វាយរៀង អះអាងនៅថ្ងៃអង្គារនេះថា បណ្តឹងទាស់ជនជាប់ចោទបាញ់កម្មករនៅក្រុងបាវិត គឺលោក ឈូក បណ្ឌិត នឹងត្រូវបញ្ជូនមកសាលាឧទ្ធរណ៍ នៅចុងសប្តាហ៍នេះ តាមការទាមទារ របស់ជនជាប់ចោទ។
ការប្តឹងទាស់នេះ ធ្វើឡើងបន្ទាប់ពី សាលាដំបូងខេត្តស្វាយរៀង កាលពីថ្ងៃទី២៥ ខែមិថុនា ឆ្នាំ២០១៣ បានចេញដីការ បង្គាប់ឲ្យសមត្ថកិច្ច តាមចាប់ខ្លួន លោក ឈូក បណ្ឌិត មកផ្តន្ទាទោស ដាក់ពន្ធនាគារ១៨ខែ និងបង្គាប់ឲ្យបង់ប្រាក់សរុប ៣៨លានរៀល រឿងបាញ់កម្មករ ឲ្យរងរបួសបីនាក់នៅក្រុងបាវិត កាលពីថ្ងៃទី២០ ខែកុម្ភៈ ឆ្នាំ២០១២ ។
ចៅក្រមសាលាដំបូងខេត្តស្វាយរៀង លោក លាង សួគ៌ ឲ្យដឹងថា បណ្តឹងទាស់ របស់ជនជាប់ចោទ គ្រោងបញ្ជូនទៅសាលាឧទ្ធរណ៍ នៅចុងសប្តាហ៍នេះ ដើម្បីឲ្យសាលារឧទ្ធរណ៍ពិចារណា លើបណ្តឹងទាស់ របស់ជនជាប់ចោទ។
សង្គមស៊ីវិល និងកម្មការិនីរងគ្រោះ ព្រួយបារម្ភថា សាលក្រមផ្តន្ទាទោស ជនជាប់ចោទ ជាមន្ត្រីមានអំណាចរូបនេះ ទំនងជាសមត្ថកិច្ច មិនអាចអនុវត្តឲ្យមានប្រសិទ្ធភាព។
អ្នកតាមដានព្រឹត្តិការណ៍សង្គមពន្យល់ថា ការដែលគណបក្សប្រជាជនកម្ពុជា ធ្លាក់ប្រជាប្រិយយ៉ាងគំហុក ក្រោយការបោះឆ្នោតជាតិនីតិកាលទី៥នេះ អាចជាប់ពាក់ព័ន្ធរឿង អយុត្តិធម៌ក្នុងសង្គមផងដែរ ដែលអ្នកមានប្រាក់ មន្ត្រីមានអំណាចក្នុងជួររាជរដ្ឋាភិបាលមួយចំនួន ដែលធ្វើខុស មិនត្រូវបានយកមកទទួលទោស៕
No comments:
Post a Comment
yes