មជ្ឈមណ្ឌលសិទ្ធិមនុស្សកម្ពុជា(CCHR) ដាក់អនុសាសន៍ទៅរដ្ឋាភិបាលកម្ពុជាអាណ្ណត្តិថ្មី ក្នុងការបង្កើតប្រព័ន្ធផ្សព្វផ្សាយជាតិឯករាជ្យមួយ ដើម្បីធានាថាពលរដ្ឋទទួលបានព័ត៌មានពិតប្រាកដ និងធានាការបោះឆ្នោតប្រព្រឹត្តទៅដោយសេរី និងយុត្តិធម៌។
អនុសាសន៍ទាក់ទងនឹងការបង្កើតប្រព័ន្ធផ្សព្វផ្សាយជាតិឯករាជ្យនោះ មាននៅក្នុងអនុសាសន៍ចំនួន១០ចំណុច ដែលCCHR ដាក់ក្នុងកំណត់ត្រាសង្ខេប និងត្រូវបានចេញផ្សាយនៅថ្ងៃទី ១០ ខែកញ្ញានេះ។
CCHR លើកឡើងថា ខ្លួនគាំទ្រនូវការបង្កើតប្រព័ន្ធផ្សព្វផ្សាយព័ត៌មានជាតិឯករាជ្យមួយ ដោយលុបចោលច្បាប់ណាដែលមាន លក្ខណៈរឹតបណ្តឹងទៅលើខ្លឹមសារ និង បង្កើតស្ថាប័នគ្រប់គ្រងការចាក់ផ្សាយឯករាជ្យមួយ ទទួលខុសត្រូវចំពោះការចេញអាជ្ញាប័ណ្ណ និងធានាឲ្យបានថាស្ថានីយផ្សព្វផ្សាយព័ត៌មាននោះ បំពេញការងារដោយសេរី។
ប្រព័ន្ធផ្សព្វផ្សាយ ជាពិសេសទូរទស្សន៍ចំនួន១១ក្នុងស្រុក មាននិន្នាការគាំទ្រគណបក្សកាន់អំណាច។ ទូរទស្សន៍រដ្ឋ មានចំនួនមួយ គឺទូរទស្សន៍ទទក តែក៏ត្រូវបានរិះគន់ថា ព័ត៌មានមានភាពលម្អៀងដែរ។ ទូរទស្សន៍ទាំង១១នោះ មានដូចជា ទូរទស្សន៍CNC CTN បាយ័ន SEATV អប្សរា ទូរទស្សន៍ប៉ុសិ៍លេខ៥ ប៉ុស្តិ៍លេខ៣ និងលេខ៩ជាដើម។
ប្រជាពលរដ្ឋ និងសង្គមស៊ីវិល បានរិះគន់ថា ទូរទស្សន៍ក្នុងស្រុកមួយចំនួនធំថា ផ្សាយព័ត៌មានមិនមានតុល្យភាព និងមាននិន្នាការទៅរកគណបក្សកាន់អំណាច។ តែទូរទស្សន៍ទាំងអស់នោះ លើកឡើងថា គេមានគោលការណ៍ផ្ទាល់ខ្លួនក្នុងការផ្សព្វផ្សាយ។ពលរដ្ឋ បានរិះគន់យ៉ាងខ្លាំងទៅលើអ្នកអត្ថាធិប្បាយតាមទូរទស្សន៍មួយចំនួន ដូចជាទូរទស្សន៍ស៊ីអ៊ិនស៊ី និងទូរទស្សន៍បាយ័នជាដើម ដែលធ្វើឲ្យគេលែងចង់មើលទូរទស្សន៍ទាំងនោះទៀត។
កន្លងទៅ អង្គការចំនួន ៤០នៃបន្ទប់ស្ថានការ៍ក្នុងថ្ងៃបោះឆ្នោត រកឃើញថា ប្រព័ន្ធផ្សព្វផ្សាយជាពិសេស ទូរទស្សន៍ និងវិទ្យុ មានភាពលម្អៀងខ្លាំងបំផុតទៅកាន់គណបក្សប្រជាជនកម្ពុជា និងបានបំពេញតួនាទីមួយមួយកាន់តែអាក្រក់ទៅ សម្រាប់ការបោះឆ្នោតនៅកម្ពុជា។ អង្គការទាំងនេះ ជំរុញឲ្យមានកំណែទម្រង់ប្រព័ន្ធផ្សព្វផ្សាយគោរពតាមគោលការណ៍សមធម៌ និងមានភាពសេរី ដើម្បីឲ្យការបោះឆ្នោតក្រោយៗទៀត មានភាពសេរី និងយុត្តិធម៌។
ជាឧទាហរណ៍ កាលពីពេលប្រធានគណបក្សសង្គ្រោះជាតិ លោក សម រង្ស៊ី ត្រឡប់មកពីប្រទេសបារាំងវិញ មិនមានទូរទស្សន៍ក្នុងស្រុកណា ហ៊ានផ្សព្វផ្សាយពីការវិលមកដល់នោះទេ។ ទូរទស្សន៍ទាំងនោះ លើកឡើងថា គេមានកាលវិភាគនៃការផ្សព្វផ្សាយ។
មិនទាន់មានការឆ្លើយតបយ៉ាងណាពីមន្ត្រីរដ្ឋាភិបាល ទាក់ទងនឹងការបង្កើតប្រព័ន្ធផ្សព្វផ្សាយឯករាជ្យ ជាពិសេសទូរទស្សន៍ឯករាជ្យមួយ នៅឡើយទេ។
លោក អ៊ឹម សុធារិទ្ធ អ្នកយកព័ត៌មានឲ្យVOA និងកំពុងរស់នៅសហរដ្ឋអាមេរិក បានសរសេរនិក្ខេបបទរបស់ខ្លួនសម្រាប់PHD ដោយលើកឡើងពីលទ្ធភាពនៃការបង្កើតការផ្សព្វផ្សាយសេវាសាធារណៈ(PSB) គឺសំដៅលើការបង្កើតទូរទស្សន៍ឯករាជ្យមួយ ដូចជានៅសហរដ្ឋអាមេរិក មានCNN នៅអង់គ្លេស មានBBC និងនៅជប៉ុន មានNHKជាដើម។
លោក អ៊ឹម សុធារិទ្ធ មានប្រសាសន៍ថា វាមានការលំបាកក្នុងការជំរុញរដ្ឋាភិបាល ឲ្យធ្វើកំណែទម្រង់ ដើម្បីទទួលបានទូរទស្សន៍ឯករាជ្យនេះ ហើយវាត្រូវការពេលលវេលាច្រើនក្នុងការបង្កើតទូរទស្សន៍បែបនេះ។ លោកពន្យល់ថា ថវិកាសម្រាប់ទូរទស្សន៍ឯករាជ្យនោះ បានមកពីការបរិច្ចាគពីថវិកាពន្ធរបស់ពលរដ្ឋ ការចូលរួមពីម្ចាស់ជំនួយ ការចូលរួមចំណែកចាំបាច់ពីទូរទស្សន៍ឯកជន និងការផ្សព្វផ្សាយពាណិជ្ជកម្មជាដើម៕
ប្រភពពី VOD
ប្រភពពី VOD
No comments:
Post a Comment
yes