សមាជិកក្រុមប្រឹក្សាឃុំសេដា ស្រុកលំផាត់ ខេត្តរតនគិរី មិនទាន់បានបើកប្រាក់ខែចំនួន ៧ខែមកហើយ។ មន្ត្រីសមាជិកក្រុមប្រឹក្សាមួយរូបចោទប្រកាន់ស្មៀនឃុំថា មិនយកចិត្តទុកដាក់ទៅបើកប្រាក់ពីរតនាគារមកប្រគល់ជូនមន្ត្រីក្រុមប្រឹក្សាឃុំ។
មន្ត្រីក្រុមប្រឹក្សាឃុំសេដា នៅថ្ងៃអាទិត្យ ទី៨ ខែធ្នូ អំពាវនាវសុំឲ្យអាជ្ញាធរពាក់ព័ន្ធខេត្តរតនគិរី ចាត់វិធានការស៊ើបអង្កេតទៅលើភាពយឺតយ៉ាវបើកប្រាក់បៀវត្សសមាជិកក្រុមប្រឹក្សាឃុំនេះ។
ជំទប់ទី២ លោក សុខ ខេត ត្អូញត្អែរថា ចាប់ពីខែឧសភា រហូតបច្ចុប្បន្ន សមាជិកក្រុមប្រឹក្សាឃុំសេដា ទាំងអស់គ្នាមិនបានទទួលប្រាក់ខែពីស្មៀនឃុំនៅឡើយ។ លោកបន្តថា ពួកគាត់កំពុងប្រឈមមុខនឹងកង្វះប្រាក់ផ្គត់ផ្គង់ជីវភាពក្រុមគ្រួសារ និងតម្រូវការប្រាក់ចំណាយប្រចាំថ្ងៃ៖ «គេត្អូញថា អត់លុយ អ្នកខ្លះគេថា ធ្វើការប្រាំពីរ ប្រាំបីខែហើយអត់ឃើញប្រាក់ខែអ៊ីចឹងណា! ខ្ញុំសួរដែរ សួរស្មៀនគេចេះតែថា រវល់ណាស់ថ្ងៃនេះ រវល់រហូតគាត់ថា ចាំចប់រវល់បានឡើងទៅយក។ ខ្ញុំមើលទៅប្រហែលមកពីស្មៀនព្រោះខ្ញុំជួបរតនាគារ រតនាគារគាត់ថា គេមិនដែលខ្វះលុយទេ»។
ជាទូទៅមន្ត្រីក្រុមប្រឹក្សាឃុំទទួលប្រាក់ឧបត្ថម្ភប្រមាណ ១២ម៉ឺនទៅ ១៥ម៉ឺនរៀលក្នុងមួយខែសម្រាប់អាណត្តិ ៥ឆ្នាំ នៃការជាប់ឆ្នោតជាសមាជិកក្រុមប្រឹក្សាឃុំសង្កាត់។
ទាក់ទិនការចោទប្រកាន់នេះស្មៀនឃុំសេដា លោក លាង អូន ទទួលស្គាល់ថា ការយឺតយ៉ាវនេះដោយសារលោកជាប់រវល់ការងារផ្ទាល់ខ្លួនរួមផ្សំនឹងប្រធានក្រុមប្រឹក្សាឃុំបានអនិច្ចកម្មមិនមានអ្នកចុះហត្ថលេខាលើឯកសារបើកប្រាក់នៅរតនាគារទើបនាំឲ្យខកខានមិនបានទៅបើកប្រាក់ពីរតនាគារ។
លោកអះអាងថា បច្ចុប្បន្នជំទប់ទី១ ត្រូវបានតែងតាំងជាមេឃុំស្ដីទី ហេតុនេះលោកនឹងរៀបចំឯកសារបើកប្រាក់ពីរតនាគារឲ្យបានរួចរាល់នៅថ្ងៃទី១០ ខែធ្នូ បើកជូនមន្ត្រីក្រុមប្រឹក្សាឃុំវិញ៖ «ខ្ញុំអត់ទាន់បើកមែន ៧ខែហើយ ឃុំមានការងារច្រើនពេក គាត់ឈឺរហូតទៅគាត់អត់ប្រគល់ត្រាឲ្យយើងយកទៅ។ ស្ដីទីគាត់ឥឡូវគាត់មេ គាត់ច្បាប់ទៀតហើយ ២៣ថ្ងៃមេ។ ប្រហែលថ្ងៃ ១០ឡើងទៅបើកឲ្យគេហើយ»។
ទោះជាយ៉ាងនេះក៏ដោយ អភិបាលស្រុកលំផាត់ លោក គង់ ស្រ៊ុន កត់សម្គាល់ថា ស្មៀនឃុំសេដា លោក លាង អូន បានធ្វេសប្រហែសក្នុងការបំពេញភារៈផ្សេងទៀតនៅរយៈពេលកន្លងទៅ។
លោកអះអាងមិនបានដឹងពីករណីមិនបើកប្រាក់ខែសមាជិកក្រុមប្រឹក្សាឃុំនេះទេ ហេតុនេះនៅដើមសប្ដាហ៍ក្រោយលោកនឹងអញ្ជើញស្មៀនឃុំមកអប់រំ និងដាក់វិន័យរដ្ឋបាលជាការព្រមានចំពោះការធ្វើឲ្យមានកំហុសបែបនេះ៖ «កុំថាតែលុយក្រុមប្រឹក្សា លុយអភិវឌ្ឍន៍នៅក្នុងមូលដ្ឋានក៏វាមិនអើពើ។ខ្ញុំដាក់វិធានការទៅតាមផ្លូវច្បាប់រដ្ឋបាលលក្ខន្តិកៈរបស់មន្ត្រីរាជការ។ អ៊ីចឹងថ្ងៃច័ន្ទ នេះ គឺកោះអញ្ជើញមកហើយធ្វើកំណត់ហេតុជាលើកទី១»។
ក្រុមប្រឹក្សាឃុំសេដា មានសមាជិក ៥រូប ក្នុងនោះសមាជិក ៤រូបជាសមាសភាពគណបក្សប្រជាជននិងមួយរូបជាសមាសភាពគណបក្ស សម រង្ស៊ី។
ជំទប់ទីពីរឃុំសេដា លោក សុខ ខេត មានប្រសាសន៍បញ្ជាក់ថា ក្រៅពីបញ្ហាប្រាក់ខែសមាជិកក្រុមប្រឹក្សាឃុំមកពីគណបក្ស សម រង្ស៊ី ទទួលនូវការរើសអើងពីសមាជិកក្រុមប្រឹក្សាឃុំពីគណបក្សប្រជាជន កាន់អំណាចដូចជាមិនបែងចែកភារៈកិច្ចតាមការកំណត់របស់ក្រសួងមហាផ្ទៃ។ ចំណែកប្រជាពលរដ្ឋមាននិន្នាការគណបក្ស សម រង្ស៊ី ឬគណបក្សសង្គ្រោះជាតិ អាជ្ញាធរឃុំមិនយកចិត្តទុកដាក់ដោះស្រាយបញ្ហា ឬជម្លោះដែលកើតមានចំពោះប្រជាពលរដ្ឋទាំងនោះឡើយ៕
No comments:
Post a Comment
yes