ក្រុមសន្តិសុខខណ្ឌដូនពេញជាច្រើនពាក់មួកខ្មៅសង្គ្រប់ចាប់ខ្លួន
លោក សុខ ឈុនអឿង នៅមុខវាំងកាលពីថ្ងៃអាទិត្យ។ រូបថត ម៉ៃ វីរៈ
ក្រុមសន្តិសុខក្រៅក្របខណ្ឌរដ្ឋ និងមិនដែលបានទទួលការបណ្ដុះបណ្តាលពីរដ្ឋាភិបាលសោះនោះ ត្រូវបានគេប្រើប្រាស់ឲ្យចាប់ឃាត់ខ្លួនក្រុមអ្នកតវ៉ាទាំងបង្ខំនិងហិង្សាក្នុងប៉ុន្មានសប្តាហ៍ថ្មីៗនេះ។
នៅក្នុងកិច្ចប្រឹងប្រែងរើសសន្តិសុខសណ្តាប់ធ្នាប់សាធារណៈ លោក ឡុង ឌីម៉ង់ អ្នកនាំពាក្យសាលារាជធានី បានប្រាប់ ភ្នំពេញ ប៉ុស្តិ៍ កាលពីម្សិលមិញថា ក្រសួង មហាផ្ទៃ បានចេញសេចក្តីណែនាំសាលារាជធានី ឲ្យឈប់ជួលសន្តិសុខពីក្រុមហ៊ុនឯកជន។ លោកបន្តថា៖ «អ្នកដែលបានដាក់ពាក្យធ្វើការងារនេះ យើងមិនបានផ្តល់ការបណ្តុះបណ្តាលផ្នែកបច្ចេកទេសសន្តិសុខទេ ប៉ុន្តែយើងបានផ្តល់ឲ្យពួកគេនូវការបណ្តុះបណ្តាលផ្នែកច្បាប់និងរដ្ឋបាល»។
លោក ឌីម៉ង់ មិនបានរៀបរាប់ ថាតើការបណ្តុះបណ្តាលទំហំប៉ុនណា ត្រូវបានផ្តល់ឲ្យ និងចំនួនកម្លាំងសន្តិសុខ ប៉ុន្មានមាននៅសាលារាជធានី ឬថាតើសេចក្តីណែនាំនេះ ត្រូវបានចេញនៅពេលណានោះទេ។
ខណៈការបង្ក្រាបទៅលើការប្រមូលផ្តុំសាធារណៈ កាន់តែមានលក្ខណៈខ្លាំងឡើង ចាប់តាំងពីមានករណីបាញ់ប្រហារពីកងកម្លាំងរដ្ឋាភិបាល ទៅលើកម្មករកាត់ដេរដែលបានបណ្តាលឲ្យស្លាប់ចំនួនបួននាក់ និងរងរបួសជាច្រើននាក់ទៀត ខណៈកំពុងធ្វើបាតុកម្មកាលពីថ្ងៃ ទី៣ ខែ មករា ចំនួនសន្តិសុខកាន់តែច្រើនឡើង ដែលមិនមានឯកសណ្ឋានត្រឹមត្រូវ បានចូលរួមជាមួយក្រុមសន្តិសុខខណ្ឌ ដូនពេញ ដើម្បីបំបែកបាតុកម្មនិងធ្វើការចាប់ខ្លួនបាតុករដោយប្រើកម្លាំងបាយ។
អ្នកនាំពាក្យទីស្តីការគណៈរដ្ឋមន្រ្តី លោក ផៃ ស៊ីផាន បានប្រាប់ ភ្នំពេញ ប៉ុស្តិ៍ កាលពីថ្ងៃអង្គារថា ក្រុមសន្តិសុខដែលពាក់ព័ន្ធនឹងការឃាត់ខ្លួនបាតុករត្រូវបានជួលដោយសាលារាជធានី។
លោកបន្តថា៖ «ពួកគេកំពុងធ្វើការងារនៅក្រុមហ៊ុនសន្តិសុខឯកជនហើយត្រូវបានជួលដោយសាលារាជធានីដើម្បីអនុវត្តរក្សាសណ្តាប់ធ្នាប់សាធារណៈ។ ខ្ញុំមិនឃើញមានអ្វីខុសនោះទេ ចំពោះការរក្សាសណ្តាប់ធ្នាប់»។
លោក ឡុង ឌីម៉ង់ បានថ្លែងកាលពីថ្ងៃពុធថា សាលារាជធានី បានជ្រើសរើសសន្តិសុខដោយផ្ទាល់ពីក្រុមហ៊ុនឯកជនមួយកាលពីមុនប៉ុន្តែឥឡូវលែងទៀតហើយ។ លោកបានថ្លែងបន្តថា៖ «កាលពីមុន សាលារាជធានី បានជួលកម្លាំងសន្តិសុខ ពីក្រុមហ៊ុនឯកជនមួយ»។ «ប៉ុន្តែក្រសួង មហាផ្ទៃ បានប្រាប់យើងថា យើងអាចជ្រើសរើសមនុស្ស [ក្នុងរាជធានី] ដើម្បីជំនួសក្រុមហ៊ុនឯកជននោះ ដើម្បីការពារសណ្តាប់ធ្នាប់សាធារណៈ»។
លោក ឌីម៉ង់ បន្ថែមថា សាលារាជធានី បានធ្វើការណែនាំខណ្ឌទាំងអស់រួមទាំងខណ្ឌ ដូនពេញ ឲ្យអនុវត្តតាមសេចក្តីណែនាំនេះ។ លោកបន្តថា៖ «ក្រសួង មហាផ្ទៃ បានអនុញ្ញាតឲ្យយើងរៀបចំឯកសណ្ឋានសម្រាប់ពួកគេ»។ «ពួកគេត្រូវបានណែនាំមិនឲ្យបង្ក្រាប ឬចាប់ខ្លួនប្រជាជនទេ ប៉ុន្តែពួកគេអាចជួយនគរបាលក្នុងការរក្សាសណ្តាប់ធ្នាប់ ឬបញ្ឈប់ការធ្វើសកម្មភាពណាមួយរបស់ក្រុមអ្នកតវ៉ា។ ប្រសិនបើក្រុមអ្នកតវ៉ាមិនស្តាប់ សន្តិសុខ អាចចាប់ខ្លួនពួកគេ ហើយយកពួកគេទៅឲ្យនគរបាល»។
លោក ស៊ីផាន បានថ្លែងថា លោកនៅតែជឿថា សាលារាជធានីជួលសន្តិសុខពីក្រុមហ៊ុនឯកជន ប៉ុន្តែទទួលស្គាល់ថា សន្តិសុខមួយចំនួន ឥឡូវនេះស្លៀកពាក់ផ្សេងៗគ្នា។ លោកបន្តថា៖ «តាមអ្វីដែលខ្ញុំដឹង ក្រុមហ៊ុនសន្តិសុខឯកជន ត្រូវបានដាក់បញ្ញត្តិដោយក្រសួង មហាផ្ទៃ ពួកគេមាននីតិវិធីផ្ទាល់ខ្លួន។ ប្រសិនបើអ្នកចង់ចុះបញ្ជី អ្នកត្រូវតែមានអាជ្ញាប័ណ្ណ និងដឹងអំពីរបៀបធ្វើការងារ»។
ប៉ុន្តែសូម្បីតែសន្តិសុខមួយចំនួនក្នុងចំណោមសន្តិសុខដែលស្លៀកពាក់ឯកសណ្ឋានសន្តិសុខខណ្ឌ ដូនពេញ នៅមាត់ទន្លេ កាលពីថ្ងៃអង្គារ បាននិយាយថា ពួកគេមិនមានការបណ្តុះបណ្តាលផ្នែកសន្តិសុខ សម្រាប់ការងារនេះទេ និងថែមទាំងមិនច្បាស់ថា តើពួកគេនឹងទទួលបានប្រាក់ខែពីនរណានោះឡើយ។
សន្តិសុខវ័យក្មេងម្នាក់ដែលសុំមិនបញ្ចេញឈ្មោះបានថ្លែងថា៖ «ខ្ញុំមិនបានចុះកិច្ចសន្យាជាមួយសាលាខណ្ឌ ដូនពេញ ទេ»។ «ខ្ញុំគ្រាន់តែដឹងថា នៅចុងខែ មេក្រុមរបស់ខ្ញុំ ដែលជាមន្រ្តីខណ្ឌ ដូនពេញ ផ្តល់ប្រាក់មួយចំនួនមកខ្ញុំ»។ «ខ្ញុំមិនដែលត្រូវបានផ្តល់ឲ្យនូវការបណ្តុះបណ្តាលផ្នែកសន្តិសុខទេ។ មិត្តភក្តិរបស់ខ្ញុំ គ្រាន់តែហៅខ្ញុំមកទីនេះ ដើម្បីធ្វើការជាមួយគាត់ ដោយមិនបានចុះហត្ថលេខាអ្វីនោះទេ»។
បុរសម្នាក់ដែលបាននិយាយថា គាត់ទទួលបន្ទុកផ្នែកក្រុមសន្តិសុខខណ្ឌ ដូនពេញ ដែលល្បាតពីតំបន់វត្តភ្នំដល់តំបន់ព្រះបរមរាជវាំង បានថ្លែងថា ក្រុមរបស់លោក ត្រូវបានជួលដោយផ្ទាល់ពីខណ្ឌ។ លោកបន្តថា៖ «ឯកសណ្ឋាន និងឡូហ្គោរបស់យើង ងាយស្គាល់ដោយអាជ្ញាធរភ្នំពេញ និងក្រសួង មហាផ្ទៃ»។
ដោយថ្លែងពីខណ្ឌ មានជ័យ អភិបាលខណ្ឌ លោក គួច ចំរើន បានឲ្យដឹងថា លោកមិនបានដឹងអំពីការជំរុញរបស់ក្រសួង មហាផ្ទៃ ក្នុងការបង្កើតក្រុមមន្រ្តីរក្សាសណ្តាប់ធ្នាប់ពីសហគមន៍ទេ ប៉ុន្តែបានថ្លែងថា សេចក្តីបញ្ជានេះ ត្រូវបានចេញច្រើនឆ្នាំកន្លងមកហើយ។
អ្នកនាំពាក្យក្រសួង មហាផ្ទៃ លោក ឧត្តមសេនីយ៍ ខៀវ សុភ័គ មិនអាចទាក់ទងសុំអត្ថាធិប្បាយបានទេ។ លោក សក់ សេដ្ឋា រដ្ឋលេខាធិការក្រសួង មហាផ្ទៃ បានបង្វែរសំណួរ ទៅនគរបាលជាតិ ខណៈអ្នកនាំពាក្យនគរបាលជាតិ លោក គៀត ច័ន្ទថារិទ្ធមិនអាចទាក់ទងសុំអត្ថាធិប្បាយបានទេ។
លោកឧត្តមសេនីយ៍ត្រី ខេង ទីតូ អ្នកនាំពាក្យកងរាជអាវុធហត្ថលើផ្ទៃប្រទេស បានថ្លែងថា លោកមិនមានបញ្ហាជាមួយតួនាទី ដែលក្រុមសន្តិសុខរបស់រាជធានី និងខណ្ឌ កំពុងអនុវត្តក្នុងការបង្ក្រាបក្រុមអ្នកតវ៉ាទេ ដោយសារពួកគេ ត្រូវបានជួលដើម្បី «រក្សាសណ្តាប់ធ្នាប់សាធារណៈក្នុងទីក្រុង» និងបានធ្វើការងារល្អទៅតាមការបញ្ជាពីមេរបស់ពួកគេ។
ប្រធានស្ដីទីសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ លោក សុខ ឈុនអឿង ដែលត្រូវបានឃាត់ខ្លួន ដោយក្រុមបុរសស្លៀកពាក់ឯកសណ្ឋានពណ៌ខៀវ និងមានពាក់មួកការពារសុវត្ថិភាពពណ៌ខៀវនៅជិតព្រះបរមរាជវាំងកាលពីថ្ងៃអាទិត្យ បានថ្លែងថា អាជ្ញាធររដ្ឋាភិបាលកំពុងតែលេងល្បែងដ៏គ្រោះថ្នាក់មួយ។
លោកបានថ្លែងបន្តថា៖ «ខ្ញុំបារម្ភណាស់ថា មនុស្សទាំងនេះ មិនត្រូវបានបណ្តុះបណ្តាលត្រឹមត្រូវ ប៉ុន្តែត្រូវបានជួលឲ្យធ្វើការក្នុងអំឡុងមានការតវ៉ាកើនឡើង»។ «ពួកគេធ្វើតាមបញ្ជាពីមេរបស់ពួកគេប៉ុន្តែពួកគេមិនខ្វល់អំពីការរងរបួសក្នុងអំឡុងការបង្ក្រាបឬចាប់ខ្លួននោះទេ»។
ក្រុមអង្គការសង្គមស៊ីវិល រួមទាំងសមាគមការពារសិទ្ធិមនុស្ស អាដហុក នៅក្នុងសេចក្តីថ្លែងការណ៍មួយកាលពីថ្ងៃអាទិត្យ ភ្លាមៗបន្ទាប់ពីមានការចាប់ឃាត់ខ្លួនលោក សុខ ឈុនអឿង បានហៅការប្រើកងកម្លាំងសន្តិសុខឯកជនដែលពួកគេមិនមែនជានគរបាលយុត្តិធម៌ស្របតាមផ្លូវច្បាប់ ទៅចាប់ខ្លួនជនស៊ីវិលតាមអំពើចិត្តម្តងហើយម្តងទៀតនោះថា គឺជា «ទង្វើរំលោភច្បាប់យ៉ាងធ្ងន់ធ្ងរ»៕
No comments:
Post a Comment
yes