ក្រសួងមហាផ្ទៃ មិនអនុញ្ញាតឲ្យសហជីពធំៗទាំង៩នៅកម្ពុជា ប្រមូលផ្តុំគ្នាធ្វើបាតុកម្មនៅទីលានប្រជាធិបតេយ្យ នាថ្ងៃអាទិត្យចុងសប្តាហ៍នេះទេ ដើម្បីបញ្ចៀសពីភាពអសន្តិសុខណាមួយ ដែលកើតឡើងដោយយថាហេតុនៅរាជធានីភ្នំពេញ។
ការបញ្ជាក់របស់ក្រសួងមហាផ្ទៃ នៅពេលនេះ ធ្វើឡើងបន្ទាប់ពីសាលារាជធានីភ្នំពេញ កាលពីថ្ងៃព្រហស្បតិ៍ម្សិលមិញ មិនអនុញ្ញាតឲ្យក្រុមសហជីពទាំង៩ ប្រមូលផ្តុំមនុស្សមួយម៉ឺននាក់ ធ្វើបាតុកម្ម នៅទីលានប្រជាធិបតេយ្យ ដើម្បីទាមទារឲ្យដោះលែងសកម្មជនសិទ្ធិមនុស្ស ដីធ្លី និងកម្មករ២៣នាក់ និងទាមទារដំទ្បើងប្រាក់ឈ្នួលកម្មករគ្រប់វិស័យ យ៉ាងតិច ១៦០ដុល្លារអាមេរិក នៅថ្ងៃអាទិត្យចុងសប្តាហ៍នេះទេ ដោយសំអាងថា រង់ចាំមើលស្ថានភាពប្រទេសជាតិស្ងប់ស្ងាត់ ឬវិលទៅរកសភាពដើមវិញ។
អ្នកនាំពាក្យក្រសួងមហាផ្ទៃ លោក ខៀវ សុភ័គ មានប្រសាសន៍ថា ក្រសួងយល់ស្របតាមការសម្រេចរបស់សាលារាជធានីភ្នំពេញ កាលពីរសៀលម្សិលមិញ គឺមិនអនុញ្ញាតឲ្យសហជីពប្រមូលផ្តុំគ្នានៅលើទីលានប្រជាធិបតេយ្យ តែអនុញ្ញាតឲ្យចាត់តំណាងយកញត្តិដាក់តាមស្ថាប័ន្ធពាក់ព័ន្ធ។ លោកថា ក្រសួងមហាផ្ទៃនៅតែប្រកាន់គោលការណ៍តាមសេចក្តីប្រកាសព័ត៌មាន របស់ខ្លួនកាលពីថ្ងៃទី៤ ខែមករា «ប្រជាពលរដ្ឋមួយចំនួន និងអង្គការមួយចំនួន សូមយោគយល់ផង យោគយល់ចំពោះសភាពការណ៍បច្ចុប្បន្ន។ ការដង្ហែក្បួនសូមផ្អាកមួយរយៈសិន រងចាំសភាពការណ៍វិលរកភាពប្រក្រតីឡើងវិញ។ នេះជាប្រសាសន៍ព័ត៌មានក្រសួងមហាផ្ទៃកន្លងមកនេះ»។
ស្របពេលដែលកម្លាំងសមត្ថកិច្ច បណ្តេញក្រុមបាតុកររបស់គណបក្សសង្គ្រោះជាតិ ទាំងបង្ខំ ឲ្យចេញពីទីលានប្រជាធិតេយ្យ ដោយចោទថា ការប្រមូលផ្តុំ និងការស្នាក់នៅទីនោះជាការខុសច្បាប់កាលពីថ្ងៃទី០៤ ខែមករា ឆ្នាំ២០១៤។ ក្រសួងមហាផ្ទៃបានចេញសេចក្តីប្រកាសព័ត៌មាន ផ្អាកជាបណ្តោះអាសន្ន រាល់ការធ្វើបាតុកម្ម ការជួបប្រជុំជាសារធារណៈ ឬការដង្ហែរក្បួននានា រហូតដល់សភាពការណ៍សន្តិសុខ ត្រូវបានត្រលប់ទៅរកសភាពប្រក្រតីឡើងវិញ ដើម្បីធានា សន្តិសុខ សណ្តាប់ធ្នាប់សារធារណៈ និងរបៀបរៀបរយសង្គម។ ទោះជាយ៉ាងណា សង្គមស៊ីវិល និងអ្នកវិភាគនៅកម្ពុជា យល់ឃើញថា បម្រាមនេះមិនអាចធ្វើឲ្យស្ថានភាពនៅកម្ពុជា បានប្រសើរឡើងវិញនោះទេ ផ្ទុះទៅវិញរិតតែធ្វើឲ្យមានភាពអសន្តិសុខសង្គមទៅវិញទេ។
ប្រធានសហភាពសហជីពកម្ពុជា លោក រ៉ុង ឈុន មានប្រសាសន៍ថា ការធ្វើបាតុកម្ម ដោយជួបប្រជុំគ្នានៅលើទីលានប្រជាធិតេយ្យ គឺមិនខុសច្បាប់នោះទេ ព្រោះក្រុមសហជីពបានជូនដំណឹងរួចហើយ។ លោកថា ក្រុមសហជីពមិនខ្លាចការបង្ក្រាបរបស់ក្រុមសមត្ថកិច្ចនោះទេ «ជូនដំណឹងចប់សព្វគ្រប់អស់ហើយ ប៉ុន្តែពួកនេះអត់គោរពច្បាប់ ពួកអស់ហ្នឹង។ អញ្ចឹងជំហអត់មានអ្វីប្រែប្រួលទេ សូមផ្តាំផ្ញើទៅលោក ខៀវ សុភ័ក វិញផង។ ហើយបើចង់ធ្វើឲ្យហ៊ុន សែន ធ្លាក់ទឹកកាន់តែឆាប់ យកកម្លាំងទៅវ៉ៃបង្ក្រាបទៅ បាញ់សម្លាប់ឲ្យបានច្រើនជាងហ្នឹងបន្តិចទៀតទៅ»។
ក្នុងអំទ្បុងបេសកកម្មលើកទី១០របស់ខ្លួន ក្នុងខែមករានេះ អ្នករាយការណ៍ពិសេសរបស់អង្គការសហប្រជាជាតិ ទទួលបន្ទុកសិទ្ធិមនុស្សប្រចាំកម្ពុជា លោក សុរិយា ស៊ូប៊ែឌី ទទូចឲ្យអាជ្ញាធរកម្ពុជា ដកចេញបម្រាមការធ្វើបាតុកម្ម ឬជួបប្រជុំ ដែលត្រូវបានដាក់ចេញ ក្រោយពីមានហិង្សារវាងអ្នកតវ៉ាជាមួយសមត្ថកិច្ច នៅតាមផ្លូវវ៉េងស្រេង។ លោកបញ្ជាក់ថា បម្រាមនេះ គឺផ្ទុយនឹងមាត្រា៤នៃកតិកាសញ្ញាអន្តរជាតិស្តីពីសិទ្ធិពលរដ្ឋ និងសិទ្ធិនយោបាយ៕
No comments:
Post a Comment
yes