គណបក្សសង្គ្រោះជាតិ នៅថ្ងៃពុធនេះ បានដាក់លិខិតទៅសាលាដំបូងរាជធានីភ្នំពេញ ដើម្បីស្នើសុំជួបសួរសុខទុក្ខតំណាងកម្មករទាំង ២៣រូប ដែលរងការចោទប្រកាន់ពីបទហិង្សាដោយចេតនា និងបំផ្លិចបំផ្លាញទ្រព្យសម្បត្តិអ្នកដទៃ និងកំពុងជាប់ឃុំនៅពន្ធនាគារត្រពាំងថ្លុង ខេត្តកំពង់ចាម។
លោក យឹម សុវណ្ណ អ្នកនាំពាក្យគណបក្សសង្គ្រោះជាតិ បានឲ្យវីអូឌីដឹងថា នៅព្រឹកមិញនេះ គណបក្សសង្គ្រោះជាតិ បានដាក់លិខិតមួយច្បាប់ទៅតុលាការសាលាដំបូងរាជធានីភ្នំពេញ ស្នើសុំឲ្យគណៈប្រតិភូគណបក្សចំនួន២០រូប បានទៅសួរសុខទុក្ខតំណាងកម្មករ២៣រូប ដែលកំពុងជាប់ឃុំនៅពន្ធនាគារត្រពាំងផ្លុង ខេត្តកំពង់ចាម ក្នុងគោលបំណងលើកទឹកចិត្ត និងជំរុញឲ្យមានការដោះលែងពួកគេទាំងនោះ។ លោកថា គណៈប្រតិភូគណបក្សសង្គ្រោះជាតិ បានស្នើសុំជួបតំណាងកម្មករទាំង២៣រូប នៅចន្លោះថ្ងៃទី១៦ ដល់ថ្ងៃទី២៥ ខែមករានេះ។
បើតាមលោកយឹម សុវណ្ណ សាលាដំបូងរាជធានីភ្នំពេញ បានទទួលយកលិខិតរបស់គណបក្សសង្គ្រោះជាតិហើយ ប៉ុន្តែនៅពុំទាន់មានការឆ្លើយតបយ៉ាងណានៅឡើយទេ។
អ្នកទាំង២៣នាក់ ដែលកំពុងឃុំខ្លួននៅពន្ធនាគារត្រពាំងថ្លុងនោះ មានលោកវន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ លោក ចាន់ ពុទ្ធិស័ក្ត ជាតំណាងសហគមន៍បឹងកក់ លោក ថេង សាវឿន ប្រធានបណ្តាញកសិករ និងកម្មករចំនួន ២០នាក់ទៀត បានរងការចោទពីបទ ហិង្សាដោយចេតនា និងបំផ្លិចបំផ្លាញទ្រព្យសម្បត្តិអ្នកដទៃ ក្នុងហេតុការណ៍ប៉ះទង្គិចគ្នារវាងសមត្ថកិច្ច និងកម្មករ កាលពីថ្ងៃទី២និងទី៣ ខែមករា នៅតំបន់សេដ្ឋកិច្ចពិសេសភ្នំពេញ ខាងមុខរោងចក្រយ៉ាកជីង និងនៅមុខសួនឧស្សាហកម្មកាណាឌីយ៉ា រាជធានីភ្នំពេញ៕
No comments:
Post a Comment
yes