លោក សុរិយា ស៊ូប៊ែរឌី អ្នករាយការណ៍ពិសេសអង្គការសហប្រជាជាតិប្រចាំកម្ពុជា ថ្លែងទៅអ្នកព័ត៌មានថ្ងៃទី១៦ ខែមករា ឆ្នាំ២០១៤(រូបភាពដោយ តាំង វីដា)
អ្នករាយការណ៍ពិសេសអង្គការសហប្រជាជាតិ ទទួលបន្ទុកសិទ្ធិមនុស្សប្រចាំកម្ពុជា លោក សុរិយា ស៊ូប៊ែឌី យល់ថា ការប្រើប្រាស់ភាសាប្រឆាំងនឹងជនជាតិវៀតណាមរបស់គណបក្សប្រឆាំង អាចនាំឲ្យមានការរើសអើងពូជសាសន៍ ផ្ទុយនឹងលទ្ធិប្រជាធិបតេយ្យ។
ក្នុងអនុសាសន៍ ដែលលោកបានអាននៅថ្ងៃព្រហស្បតិ៍នេះ ចំពោះមុខអ្នកសារព័ត៌មាន លោក ស៊ូប៊ែឌី ឲ្យដឹងថា ក្រោមជំនួបជាមួយមេដឹកនាំបក្សប្រឆាំង លោក ក៏បានលើកឡើងនូវបញ្ហា ដែលបានកើតឡើង ពាក់ព័ន្ធនឹងការប្រើប្រាស់ភាសារបស់គណបក្សសង្គ្រោះជាតិ ប្រឆាំងនឹងវៀតណាម នៅទីសាធារណៈ។ លោកថា ក្នុងហេតុការណ៍ប៉ះទង្គិចរវាងកម្លាំងសមត្ថកិច្ច និងកម្មករ កាលពីថ្ងៃទី៣ ខែមករា អាជីវកម្ម និងហាងវៀតណាមមួយចំនួន បណ្តោយផ្លូវវ៉េងស្រេង ត្រូវបានរងការបំផ្លាញ។
លោក ស៊ូប៊ែឌី ចាត់ទុកថា ការបន្តផ្សព្វផ្សាយពាក្យសម្តីប្រឆាំងនឹងជនជាតិវៀតណាម គឺអាចបណ្តាលឲ្យកើតមាននូវការរំលោភបំពានពូជសាសន៍ សកម្មភាពហិង្សាជាដើម ដែលនាំកម្ពុជា ប្រាសចាកពីលទ្ធិប្រជាធិបតេយ្យ។
សេចក្តីថ្លែងការណ៍របស់ CCHR ចុះថ្ងៃទី១៨ ខែធ្នូ ឲ្យដឹងថា ការប្រើពាក្យនេះមិនមែនជាលើកទីមួយទេ ដើម្បីបន្តុះបង្អាប់ប្រជាពលរដ្ឋវៀតណាមនៅក្នុងប្រទេសកម្ពុជា បំណងទទួលបានការគាំទ្រផ្នែកនយោបាយ។ សេចក្តីថ្លែងការណ៍បន្តថា ពាក្យ “យួន” មានបង្កប់ ឬគ្មានបង្កប់នូវអត្ថន័យបង្អាប់បង្អោននោះ គឺជារឿងមួយចំណោទ គឺនៅត្រង់ថា មេដឹកនាំនយោបាយបានថ្លែងបែបរើសអើង និងរិះគន់ជាសាធារណៈលើពលរដ្ឋវៀតណាម។
កាលពីថ្ងៃទី១២ ខែធ្នូ ប្រធានCCHR បានផ្ញើលិខិតចំហមួយទៅប្រធានគណបក្សសង្គ្រោះជាតិ លោក សម រង្ស៊ី ដោយស្នើឲ្យលោកសូមទោសជាសាធារណៈចំពោះការប្រើពាក្យនេះដែល CCHR យល់ថាមានលក្ខណៈរើសអើង។ លិខិតចំហនោះឲ្យដឹងថា លោក សម រង្ស៊ី បានប្រើពាក្យនេះ ក្នុងសុន្ទរកថាទៅកាន់ក្រុមអ្នកគាំទ្រ នៅខេត្តសៀមរាប កាលពីថ្ងៃប្រារព្ធទិវាសិទ្ធិមនុស្សអន្តរជាតិ ១០ធ្នូ។ បន្ទាប់ពីផ្សព្វផ្សាយលិខិតចំហនេះ CCHR ទទួលរងការរិះគន់ជាច្រើន តាមរយៈអ៊ីម៉ែល និងបណ្តាញទំនាក់ទំនងសង្គមហ្វេសប៊ុក ដោយមានមតិជាច្រើនអះអាងថាពាក្យ “យួន” ពុំមែនជាពាក្យសម្តីបង្អាប់បង្អោននោះទេ។ តែលោក សម រង្ស៊ី បានបដិសេធ និងបញ្ជាក់ថា លោកមានបំណងលើកតម្កើងតម្លៃស្ត្រីទេ៕
No comments:
Post a Comment
yes