ប្រធានពន្ធនាគារត្រពាំងផ្លុង នៅថ្ងៃអាទិត្យនេះ ឲ្យដឹងថា សុខភាពរបស់អ្នកជាប់ទាំង២១នាក់ នៅពេលនេះមានសភាពប្រសើរឡើងវិញ បន្ទាប់ពីក្រុមគ្រួសារទៅសួរសុខទុក្ខ និងបានអង្វរករឲ្យពួកគេបញ្ឈប់ការធ្វើកូដកម្ម បង្អត់អាហារកន្លងមក។
ប្រធានពន្ធនាគារត្រពាំងផ្លុង លោក គា សុវណ្ណ ប្រាប់ VOD ឲ្យដឹងថា ពេលនេះពួកគាត់ទទួលទានអាហារដូចដើមវិញ ហើយសុខភាពមានភាពប្រក្រតីដូចធម្មតា ព្រោះមានគ្រូពេទ្យប្រចាំពន្ធនាគារ តាមដានស្ថានភាពរបស់ពួកគាត់។ លោកបន្ត នៅពេលនេះក្រុមគ្រួសារអ្នកជាប់ឃុំទាំងនោះ មកសួរសុខទុក្ខជាបន្តបន្ទាប់ មិនមានការរារាំងទេ។ តែទោះជាយ៉ាងណា លោក គា សុវណ្ណ ថាការអនុញ្ញាតនេះ មានតែក្រុមគ្រួសារប៉ុណ្ណោះ ក្រៅពីនេះមិនអនុញ្ញាតឲ្យចូលសួរសុខទុក្ខឡើយ។
កាលពីថ្ងៃទី១១ ខែកុម្ភៈ សាលាឧទ្ធរណ៍ បានបដិសេធបណ្តឹងសុំនៅក្រៅឃុំរបស់ពួកគេ ដោយលើកហេតុផលថា ការដោះលែងនៅពេលនេះ អាចនាំឲ្យប៉ះពាល់ដល់សណ្តាប់ធ្នាប់សាធារណៈ និងប៉ះពាល់ដំណើរការសវនការ ខណៈសំណុំរឿងនេះ កំពុងស្ថិតក្នុងដំណាក់កាលស៊ើបអង្កេតនៅឡើយ។
ជនទាំង២១នាក់ ដែលកំពុងជាប់ឃុំខ្លួននៅត្រពាំងផ្លុង ខេត្តកំពង់ចាម ត្រូវបានកម្លាំងចម្រុះរដ្ឋាភិបាលចាប់ខ្លួនកាលពីថ្ងៃទី២ និងទី៣ ខែមករា ក្នុងព្រឹត្តិការណ៍បង្ក្រាបដោយហិង្សាទៅលើក្រុមបាតុករ ដែលប្រមូលផ្តុំធ្វើបាតុកម្មទាមទារប្រាក់ខែគោល ១៦០ដុល្លារ នៅរាជធានីភ្នំពេញកន្លងមក៕
No comments:
Post a Comment
yes