មន្ត្រីគណបក្សប្រជាជនកម្ពុជា និង គណបក្សសង្គ្រោះជាតិ ជួបគ្នានៅម៉ោង៩ព្រឹកនេះ នៅវិមានព្រឹទ្ធសភា ដើម្បីជជែកបើកផ្លូវទម្លុះភាពជាប់គាំងនយោបាយជិត៧ខែមក ក្រោយពីការបោះឆ្នោតខែកក្កដាឆ្នាំ២០១៣។
គណបក្សទាំងពីរព្រមព្រៀងជួបគ្នានៅវិមានព្រឹទ្ធសភា ដោយមានសមាសភាពម្ខាង៣រូបចូលជជែក។សមាសភាពខាងគណបក្សសង្គ្រោះជាតិ រួមមានលោក សុន ឆ័យ លោកគួយ ប៊ុនរឿន និងលោក យ៉ែម បុញ្ញឫទ្ធិ។ ចំណែកសមាសភាពរបស់គណបក្សប្រជាជនកម្ពុជារួមមាន លោក ព្រុំ សុខា លោក សក់ សេដ្ឋា និងលោក កើត រិទ្ធ។
ការជជែកនៅព្រឹកនេះគណបក្សសង្គ្រោះជាតិ នាំយកចំណុចពីរទៅពិភាក្សាគឺការធ្វើកំណែទម្រង់នៃការបោះឆ្នោត និង ការរៀបចំការបោះឆ្នោតឡើងវិញ ឬ បោះឆ្នោតមុនអាណត្តិ។ ចំណែកខាងគណបក្សប្រជាជនកម្ពុជា លើកឡើងតែមួយចំណុចទេគឺ រៀបចំធ្វើកំណែទម្រង់ការបោះឆ្នោត ស្របតាមសេចក្តីប្រកាសរួមរបស់គណបក្សទាំងពីរកាលពីថ្ងៃទី១៥ខែកញ្ញាឆ្នាំ២០១៣។
បើទោះជារបៀបវារៈនៃការជជែករបស់គណបក្សទាំងពីរ ហាក់មិនទាន់ស្របគ្នាទាំងស្រុងក៏ដោយ តែសម្រាប់អ្នកតាមដានបញ្ហាសង្គមយល់ឃើញថា ការជួបគ្នានេះ អាចមានផលវិជ្ជមានច្រើនព្រោះរបៀបវារៈលើកឡើងប្រហាក់ប្រហែលគ្នា ហើយគណបក្សទាំងពីរហាក់ចង់បញ្ចប់បញ្ហាដូចគ្នាដែរ។
No comments:
Post a Comment
yes