គ្រួសារលោក វ៉ែន វ៉ន និងក្រុមគ្រួសារយុវជនមាតាធម្មជាតិ សុំអោយ តុលាការលើកលែងការចោទប្រកាន់សាច់ញ្ញតិរបស់ពួកគេ

ដោយ៖ ភក្ត្រា «វិទ្យុសង្គ្រោះជាតិ»

តំណាងគ្រួសាររបស់យុវជនលចនាមាតាធម្មជាតិ ទាំងបីរូប និងតំណាងគ្រួសារលោក វែន វ៉ន ប្រធានសហគមន៍អារ៉ែង នៅភូមិជំនាប់ ឃុំជំនាប់ ស្រុកថ្មបាំង ខេត្តកោះកុង  ដែលកំពុងត្រូវ​បា​ន​ ចោទប្រកាន់ពីបទល្មើសព្រហ្មទណ្ឌ និងឃុំខ្លួនបណ្តោះអាសន្នដោយតុលាការ ខេត្តកោះកុង បាន​អំពាវនាវអោយមានកិច្ចអន្តរាគមន៏ សំណាក់រដ្ឋាភិបាលកម្ពុជា និងស្នើអោយតុលាការ​ខេត្ត​កោះ​កុង ​ដោះលែងអ្នកជាប់ឃុំទាំងបួនរូប អោយមានសេរីភាពឡើងវិញដោយគ្មានលក្ខខណ្ឌ។

សំណើរនេះ ធ្វើឡើងក្នុងសន្និសីតសារព័ត៌មាន នៅភោជនីយដ្ឋានទន្លេបាសាក់១ រាធានីភ្នំពេញ ព្រឹកថ្ងៃទី៤ ខែវិច្ឆិកា នេះ។ ស្របពេលដែលសកម្មជនការពារបរិស្ថានចំនូន៣នាក់ នៃអង្គការ ចល​នាមាតាធម្មជាតិ ចូលបំភ្លឺបន្តទៀត នៅចំពោះមុខចៅក្រម ស៊ើបសួរ នាថ្ងៃនេះដែរ នៅតុលា​ការខេត្តកោះកុង។

ក្នុងចំណោមសាច់ញ្ញាតិ សកម្មជនការពារធនធានធម្មជាតិទាំង៤នាក់ ម្នាក់សុទ្ធតែបានរៀបរាប់​អំពី​ទុក្ខលំបាករៀងៗខ្លួន នៅពេលដែលសមាជិកក្រុមគ្រួសារ ជាប់ឃុំក្នុងពន្ធនាគារ។ អ្នកស្រី សំ សំណាង ដែលជាម្តាយរបស់ លោកទ្រី សុវិគា លើកឡើងថា ការឃុំខ្លួនកូនរបស់គាត់ គឺអយុត្តិ​ធម៌ណាស់ ព្រោះកូនរបស់គាត់ បានបូជាទាំងកម្លាំងកាយចិត្ត ដើម្បីការពារធនធានធម្មជាតិ ទុក​អោយកូនខ្មែរជំនាន់ក្រោយ។

អ្នកស្រីបន្តថា ប្រសិនបើកូនរបស់អ្នកស្រី ទៅប្រព្រឹតបទល្មើអ្វីដែលធ្វើអោយសង្គមស្អាប់ខ្ពើម ក៏​គាត់មិនសុំកិច្ចអន្តរាគមន៏ពីស្ថាបន័ពាក់ព័ន្ធដើម្បីសុំអោយ ដោះលែងកូនរបស់គាត់ និងមនុស្ស​ទាំងបីរូបផ្សេងទៀតដែរ។

កាលពីថ្ងៃទី១៧ ខែសីហា តុលាការ ខេត្តកោះកុង បានចាប់ខ្លួនសមាជិកអង្គការ​ចលនាមាតា​ធម្ម​ជា​តិ ចំនួន៣នាក់ ដាក់ពន្ធនាគារ ដោយចោទពីបទគំរាមកំហែង និងធ្វើឲ្យខូចខាត ដែល​ភ្ជាប់​នូវ​បញ្ជាអ្វីមួយ ខណៈពួកគេចុះធ្វើការនៅក្នុងសហគមន៍ប្រជាពលរដ្ឋ​ ក្នុងឃុំកណ្ដោល និងឃុំ​អណ្ដូង​ទឹក ស្រុកបុទុមសាគរ កាលពីថ្ងៃទី១៧ ខែសីហា ដើម្បីប្រឆាំងសកម្ម​ភាពបូមខ្សាច់​របស់​ក្រុមហ៊ុនវៀតណាម។

យុវជនទាំង៣នាក់ មានឈ្មោះ លោក សាន់ ម៉ាឡា លោក ទ្រី សុវីគា និងលោក ស៊ឹម សំណាង។ ចំណែក វ៉ែន វ៉ន មានអាយុ ៣៦ឆ្នាំ រស់នៅភូមិច្រកឫស្សី ឃុំជំនាប់ ស្រុកថ្មបាំង ត្រូវតុលាការ​សា​លាដំបូងខេត្តកោះកុង សម្រេចឃុំខ្លួនជាបណ្ដោះអាសន្ននៅក្នុងពន្ធនាគារខេត្តនេះ ក្រោយពេល​រូប​លោកបានចូលខ្លួនមកបំភ្លឺទៅតាមដីកាបង្គាប់របស់តុលាការ កាលពីព្រឹកថ្ងៃទី៧ ខែតុលា។

ដីកាបង្គាប់មានបោះត្រា និងចុះហត្ថលេខា លោក មីន មករា ចៅក្រមស៊ើបសួរ​សាលាដំបូង​ខេត្ត​កោះកុង បានចោទ លោក វ៉ែន វ៉ន ពីបទប្រមូលផលអនុផលព្រៃឈើ ដោយគ្មានលិខិត​អនុញ្ញាត​តាមបញ្ញត្តិមាត្រា៩៨ នៃច្បាប់ស្ដីពីព្រៃឈើ និងបទលុបបំបាត់វត្ថុតាងតាមបញ្ញត្តិមាត្រា៥៣៣ នៃ​ក្រមព្រហ្មទណ្ឌ។

ទាក់ទងនិងករណីខាងលើនេះ សង្គមស៊ីវិលយល់ឃើញថា គឺជាការគំរាមគំហែងយ៉ាងធ្ងន់ធ្ងរ មក​លើសកម្មករជន ការពារធនធានធម្មជាតិ។ យ៉ាងនេះក្តីក្រុមយុវជន ចលនាមាតាធម្មជាតិ បាន​បញ្ជាក់ថា ពួកគេនិងនៅតែបន្តសកម្មភាព អប់រំប្រជាពលរដ្ឋនៅតាមសហគមន៏​អោយយល់ដឹង​អំពីច្បាប់ ស្រលាញ់ធនធានធម្មជាតិ ជាពិសេស ពួកគេនៅតែចូលរួមគ្រប់សកម្មភាព ដើម្បីការ​ពារផលប្រយោជន៏ជាតិ បរិស្ថាន និងធនធានធម្មជាតិ៕