ដោយ ជិន ជេដ្ឋា
2012-04-29
សកម្មជនការពារ ព្រៃឈើជាច្រើនបានសម្ដែងការប្ដេជ្ញាចិត្តលាយឡំនឹងការភ័យខ្លាច បន្ទាប់ពីការបាញ់សម្លាប់លោក ឈុត វុទ្ធី ប្រធានអង្គការការពារធនធានធម្មជាតិ។
២៦-មីនា-២០១២៖
ឈើដែលគេកាប់អាររួចមួយចំនួន
ត្រូវបានគេប្រទះឃើញនៅក្នុងតំបន់ព្រៃឡង់។
មានសំណួរជាច្រើនបន្ទាប់ពីការស្លាប់របស់លោក ឈុត វុទ្ធី ប្រធានអង្គការការពារធនធានធម្មជាតិ ថាតើព្រៃឈើនៅកម្ពុជានឹងក្លាយទៅជាយ៉ាងណា?
ស្របពេលគ្នានេះក៏មានសកម្មជនការពារព្រៃឈើ និងអ្នកធ្លាប់ធ្វើការជាមួយលោក ឈុត វុទ្ធី សម្ដែងការប្ដេជ្ញាចិត្តស្រលាញ់ និងការពារព្រៃឈើ។ ការប្ដេជ្ញាចិត្តនេះ បានធ្វើឡើងលាយឡំនឹងភាពភ័យខ្លាច ដោយបានឃើញ ការសម្លាប់របស់លោក ឈុត វុទ្ធី កាលពីថ្ងៃទី២៦ ខែមេសា។
លោក ហឿន សុភាព សកម្មជនការពារធនធានធម្មជាតិ មានប្រសាសន៍ថា លោកធ្លាប់ចូលរួមធ្វើការយ៉ាងសកម្ម ជាមួយលោក ឈុត វុទ្ធីអស់រយៈពេលជិត ៦ ឆ្នាំ ក្នុងការតវ៉ា និងថែរក្សាធនធានធម្មជាតិនៅកម្ពុជា។
ពេលនេះលោកហាក់មានភាពរអាបន្តិចដែរ ដោយបានឃើញអ្នកក្លាហាន និងស្រលាញ់ធនធានធម្មជាតិ ត្រូវបានគេបាញ់សម្លាប់យ៉ាងអយុត្តិធម៌។ ប៉ុន្តែ លោកនៅតែបង្ហាញពីជំហររឹងមាំរបស់លោក។
លោក ហឿន សុភាព៖ «ការភ័យខ្លាច វាចេះតែមានហើយបង ព្រោះមនុស្សម្នាក់ៗ យើងតែងតែរកសេចក្ដីសុខរហូត ប៉ុន្តែខ្ញុំតាំងអារម្មណ៍ថា ប្រសិនបើយើងនៅតែខ្លាចរហូត គឺហាក់ដូចជាយើងចុះចាញ់ទាំងស្រុង អីចឹងខ្ញុំព្យាយាមថាមិនភ័យខ្លាច ដោយរឿងហេតុកើតឡើងដូច្នេះទេ មានជំហររឹងមាំបន្តទៅទៀត ដើម្បីឲ្យប្រជាជនយើងចូលរួមឲ្យបានច្រើននៅក្នុងការការពារធនធាន ធម្មជាតិ»។
លោកបន្តថា សកម្មភាពបទល្មើសព្រៃឈើនៅកម្ពុជា នឹងនៅតែបន្តកើតមានកាន់តែច្រើន ប៉ុន្តែលោកនៅតែមានការជឿជាក់ថា បន្ទាប់ពីលោក ឈុត វុទ្ធីនឹងមានអ្នកស្នងតំណែង និងមានភាពក្លាហានដូចជាលោក វុទ្ធី ដើម្បីលាតត្រដាងបទល្មើសព្រៃឈើនៅកម្ពុជាបន្តទៀត។
ស្រដៀងគ្នានឹងការលើកឡើងនេះដែរ លោកស្រី គង់ នាម ប្រជាពលរដ្ឋ និងជាសកម្មជនការពារព្រៃឈើយ៉ាងសកម្មម្នាក់ នៅភូមិ វាល ឃុំ ដងកាំបិត ស្រុកសណ្ដាន់ មានប្រសាសន៍ថា លោកស្រីនៅតែបន្តការតវ៉ារឿងព្រៃឈើ ជាមួយប្រជាពលរដ្ឋផ្សេងទៀតដើម្បីពួតដៃគ្នា ការពារសម្បត្តិធម្មជាតិ។
លោកស្រី គង់ នាម៖ «ខ្ញុំមិនទាន់សន្និដ្ឋានបានដែរទេ ដូចភូមិខ្ញុំវិញ ដូចថាអាជ្ញាធរភូមិ ឃុំគេនិយាយអីគេគាបសង្កត់រហូត គេឈូសចេះតែឈូសហើយ ការពារចេះតែការពារមិនដឹងធ្វើយ៉ាងម៉េចទេ ខ្ញុំស្រលាញ់ទឹកដី ស្រលាញ់ព្រៃឈើ ហើយថាខ្ញុំបើគេលួចបាញ់ខ្ញុំដូច ឈុត វុទ្ធី អីចឹងក៏ខ្ញុំស្លាប់ក៏អស់ចិត្តដែរ ឲ្យតែស្លាប់ដោយសាទឹកដី»។
ចំណែកលោក យឿន សាងឿន យោធិនពិការនៅខេត្តកំពត ដែលបានតាមដាន និងធ្លាប់រាយការណ៍អំពីបទល្មើសព្រៃឈើម្នាក់ នៅខេត្តកំពត បញ្ជាក់បន្ថែមថា។
លោក យឿន សាងឿន៖ «តាមពិតនៅពេលដែលលោក ឈុត វុទ្ធី គាត់ធ្វើសកម្មភាពទាក់ទងការពារធនធានធម្មជាតិហ្នឹង កន្លងមកនេះធ្វើឲ្យកាត់បន្ថយសកម្មភាពរបស់ឈ្មួញមួយចំនួន ព្រោះឈ្មួញមួយចំនួនដែលកាប់បំផ្លាញព្រៃឈើ គឺបានកាត់បន្ថយ ប៉ុន្តែខ្ញុំគិតថា នៅពេលដែលបាត់បង់គាត់សកម្មភាពកាប់បំផ្លាញព្រៃឈើនឹងកើនឡើងវិញ ខ្ញុំគិតថាគ្មាននរណាមានឆន្ទៈដូចគាត់ មានមនុស្សភាគតិចណាស់ដែលមានឆន្ទៈ គាត់ពុះពារគ្រប់ឧបសគ្គទោះបីគាត់ដឹងថាគាត់ត្រូវស្លាប់ក៏គាត់នៅ តែតស៊ូការពារយ៉ាងស្វិតស្វាញមែនទែន»។
ប្រធានមជ្ឈមណ្ឌលសិទ្ធិមនុស្សកម្ពុជា លោក អ៊ូ វីរៈ មានប្រសាសន៍ថា ដើម្បីធានានូវធនធានធម្មជាតិនៅកម្ពុជា រដ្ឋាភិបាលត្រូវតែធ្វើ និងដោះស្រាយនៅពេលនេះ គឺទី១ ចុះស្រាវជ្រាវជាបន្ទាន់នូវបទល្មើសព្រៃឈើ។ ទី២ស៊ើបអង្កេតឲ្យបានច្បាស់លាស់ទៅលើករណីរបស់លោក ឈុត វុទ្ធី និងទី៣ត្រូតពិនិត្យគ្រប់ដីសម្បទានសេដ្ឋកិច្ច ដែលរដ្ឋាភិបាលផ្ដល់ទៅឲ្យក្រុមហ៊ុនឯកជន។
លោក អ៊ូ វីរៈ ៖ «ខ្ញុំថាប្រសិនការបាញ់ស្លាប់នេះអត់ឈានទៅរក ការស៊ើបអង្កេតត្រឹមត្រូវ និងរកយុត្តិធម៌ ហើយអត់ហ៊ានទៅរកការស៊ើបអង្កេតលើការកាប់ព្រៃឈើនៅក្នុងតំបន់ថ្ម បាំងទេ ដែលថាអ្នកដែលមានលុយ អ្នករកឈើខុសច្បាប់គាត់ជាអ្នកឈ្នះ អា ហ្នឹងបានន័យថា ជាសារមួយអាក្រក់សម្រាប់ប្រជាពលរដ្ឋខ្មែរយើង ខ្ញុំជឿជាក់ថា ប្រជាពលរដ្ឋខ្មែរយើងនឹងចាប់ផ្ដើម និងចាប់ផ្ដើមមានឈុត វុទ្ធីមួយរយនាក់ទៀតមួយពាន់នាក់ទៀតទៅថ្ងៃអនាគតដើម្បីការពារ ព្រៃឈើ បរិស្ថាន និងផលប្រយោជន៍ជាតិរបស់យើង»។
លោក ខៀវ សុភ័គ អ្នកនាំពាក្យក្រសួងមហាផ្ទៃ មានប្រសាសន៍ថា លោកមានការសោកស្ដាយចំពោះករណីផ្ទុះអាវុធបណ្ដាលឲ្យស្លាប់មនុស្ស ដែលមានសារប្រយោជន៍សម្រាប់ជាតិពីរនាក់នេះ។
ប៉ុន្តែ លោកបញ្ជាក់ថា ករណីនេះនឹងមិនអាចស៊ើបអង្កេតបន្តទៀតទេ ព្រោះអ្នកដែលបាញ់សម្លាប់លោក ឈុត វុទ្ធី បានធ្វើអត្តឃាតខ្លួនឯងបាត់ទៅហើយ។ ដូច្នេះមិនអាចរកចាប់អ្នកណាមកកាត់ទោសបានទេ។
លោក ខៀវ សុភ័គ៖ «យើងទៅរករឿងគេ ម្ចាស់ផ្ទះគេ មានឈើអីទៅធ្វើផ្ដេសផ្ដាសអី ខ្ញុំមិនថាគឃ្លើនពេកទេ តែយើងគិតថា...»។
វិទ្យុអាស៊ីសេរីមិនអាចទាក់ទង លោក ម៉ាកកូស ហាតគី(Marcus hardke) ជនជាតិអាល្លឺម៉ង់ ដែលជាអ្នកសម្រួលគម្រោង នៃអង្គការការពារធនធានធម្មជាតិបានទេ នៅថ្ងៃទី ២៨ ខែមេសា ដើម្បីជម្រាបសួរថា តើអង្គការលោកត្រូវជ្រើសរើសប្រធានថ្មី ឬត្រូវបិទតែម្ដង ព្រោះអ្នកដែលធ្វើការងារសកម្ម និងអាចសម្រេចលើកិច្ចការក្នុងអង្គការបាន គឺមានតែពីរនាក់លោក ឈុត វុទ្ធី។
អង្គការឃ្លាំមើលពិភពលោក(Global witness) កាលពីឆ្នាំ២០០៨ បានរកឃើញថា ព្រៃឈើខ្មែរនៅឆ្នាំ១៩៦៩ មានរហូតដល់៧៣ភាគរយ នៃផ្ទៃដីទាំងមូល។ ចំនួននេះត្រូវបានធ្លាក់មកត្រឹម៥៩ភាគរយ ក្នុងឆ្នាំ១៩៩៧ ហើយបន្តធ្លាក់មកត្រឹម៣៥ នៅក្នុងឆ្នាំ២០០៨៕
No comments:
Post a Comment
yes