ព្រះអង្គម្ចាស់ នរោត្តម រណឫទ្ធិ ប្រធានបក្ស នរោត្តម រណឫទ្ធិ
ក្រុមមន្រ្តី បាននិយាយថា គណបក្សហ៊្វុនស៊ិនប៉ិច និង គណបក្សនរោត្តម រណឫទ្ធិ អាចច្របាច់បញ្ចូលគ្នាដោយគ្មានវត្តមានព្រះអង្គម្ចាស់ នរោត្តម រណឫទ្ធិ បន្ទាប់ពីព្រះអង្គ បានច្រានចោលកិច្ចប្រជុំជាមួយលោក ញឹក ប៊ុនឆៃ ដើម្បីពិភាក្សាអំពីការច្របាច់បញ្ចូលគ្នានេះ។
លោក ញឹក ប៊ុនឆៃ ប្រធានប្រតិបត្តិគណបក្សហ៊្វុនស៊ិនប៉ិច បានប្រាប់ក្រុមអ្នកយកព័ត៌មាននៅក្នុងសន្និសីទសារព័ត៌មាន មួយនៅឯព្រលានយន្តហោះរាជធានីភ្នំពេញកាលពីថ្ងៃម្សិលមិញមុន ចាកចេញទៅចិនថា គណបក្សរបស់លោកនិងគណបក្ស នរត្តម រណឫទ្ធិ កំពុងតែរៀបចំសមាជិករបស់ខ្លួនចាប់ពីថ្នាក់ក្រោមរហូតដល់មេដឹកនាំបក្សដើម្បីច្របាច់បញ្ចូលគ្នាឲ្យរស់ក្រោមឆត្ររបស់គណបក្ស ហ៊្វិនស៊ិនប៉ិចតែមួយ បន្ទាប់ពីប្រធានគណបក្ស នរោត្តម រណឫទ្ធិ បានច្រានចោលកិច្ចចរចាស្តីពីការច្របាច់បញ្ចូលគ្នារវាង បក្សទាំងពីរកាលពីខែមុន។
លោក ញឹក ប៊ុន ឆៃ បានបញ្ជាក់ថា៖ «ដូចដែលខ្ញុំ បានឃើញ មេដឹកនាំបក្ស ៨០ភាគរយចង់ច្របាច់បញ្ចូលគ្នា។ ដូច្នេះ ខ្ញុំ សង្ឃឹមថា ដំណើរការនៃការរួបរួមគ្នានេះ អាចធ្វើទៅបាន»។
លោក ញឹក ប៊ុនឆៃ បានអះអាងថា បន្ទាប់ពីកិច្ចព្រមព្រៀងរួមនៃការរួបរួមគ្នាដែលបានធ្វើឡើង កាលពីថ្ងៃទី២៤ ខែឧសភា ក្រោមការសម្របសម្រួលពីលោកនាយករដ្ឋមន្រ្តីហ៊ុន សែន បានទទួលបរាជ័យ ក្រុមមេដឹកនាំគណបក្ស នរោត្តម រណឫទ្ធិ បានប្រជុំគ្នាដើម្បីធ្វើតាមកិច្ចព្រមព្រៀងនេះ ដោយអះអាងថា គាត់ មិនបានជ្រៀតជ្រែកបញ្ហាផ្ទៃក្នុងរបស់គណបក្សនេះទេ ហើយថា ព្រះអង្គម្ចាស់នរោត្តម រណឫទ្ធិ ចាប់ពីឥឡូវនេះទៅប្រជាប្រិយភាពរបស់ព្រះអង្គ បាន និងកំពុងធ្លាក់ចុះ។
លោក សៅ រ៉ានី សមាជិកសភាគណបក្ស នរោត្តម រណឫទ្ធិ និងជាអគ្គលេខាធិការបក្ស បានប្រាប់កាសែតភ្នំពេញ ប៉ុស្តិ៍ កាលពីថ្ងៃម្សិលមិញថា ក្រុមមេដឹកនាំ និងសមាជិកគណបក្សលោក នៅមូលដ្ឋាន បានឯកភាពរួបរួមគ្នាជាមួយហ៊្វុនស៊ិនប៉ិចក្នុងពេលឆាប់ៗនេះ ដោយមិនចាំបាច់មានទ្រង់រណឫទ្ធិ ហើយថា តាងនាមអគ្គលេខាធិការបក្ស នរោត្តម រណឫទ្ធិ លោក និងអគ្គលេខារង៦រូបផ្សេងទៀត បានសរសេរលិខិតថ្វាយសម្តេចឪនរោត្តម សីហនុកាលពីថ្ងៃចន្ទទី១៦ដោយស្នើព្រះអង្គបញ្ចុះបញ្ចូលទ្រង់រណឫទ្ធិឲ្យលាលែងពីនយោបាយជាមុនសិន។
លោក បានអះអាងថា ការច្របាច់បញ្ចូលគ្នារវាង គណបក្ស នរោត្តម រណឫទ្ធិ និងហ៊្វុនស៊ិនប៉ិច ត្រូវតែបន្តយោងតាមកិច្ចព្រមព្រៀងរួមថ្ងៃទី២៤ ខែឧសភាក្រោមការសម្របសម្រួលពីលោកនាយករដ្ឋមន្រ្តី ហ៊ុន សែន ប៉ុន្តែថា ការច្របាច់បញ្ចូលគ្នានេះ មិនអាចធ្វើទៅបានទេ ដរាបណាទ្រង់រណឫទ្ធិ នៅតែជាប្រធានគណបក្សនោះ។ ប៉ុន្តែលោក សៅ រ៉ានី បានអះអាងថា បន្ទាប់ពីគណបក្សរាជានិយមទាំងពីរ បានរួបរួមគ្នាដោយរស់នៅក្រោមដំបូលគណបក្សហ៊្វុនស៊ិនប៉ិច ជាមួយគ្នា គណបក្ស នឹងយាងទ្រង់រណឫទ្ធិឲ្យដឹកនាំហ៊្វុនស៊ិនប៉ិចម្តងទៀត។
លោក សៅ រ៉ានី បានបញ្ជាក់ថា៖ «ខ្ញុំ យល់ឃើញថា ប្រសិនបើ [យើង] មិនរួបរួមគ្នាទេ នោះនឹងស្លាប់នៅឆ្នាំ២០១៣»។
ក្នុងលិខិតឆ្លើយតបមួយពីព្រះអង្គម្ចាស់ នរោត្តម រណឫទ្ធិ ដែលបានចេញកាលពីថ្ងៃចន្ទ ទី១៨ ព្រះអង្គម្ចាស់រណឫទ្ធិ បានសង្កត់ធ្ងន់ថា ឧបសគ្គនៃការច្របាច់បញ្ចូលគ្នារវាងគណបក្សទាំងពីរ គឺមិនមែនដោយសារតែព្រះអង្គទេ ប៉ុន្តែថា ឧបសគ្គនេះ គឺដោយសារវិច្ឆេទកម្មរបស់លោក ញឹក ប៊ុនឆៃ។
លិខិតរបស់ទ្រង់រណឫទ្ធិ បានសរសេរថា៖ «ជាបឋម ខ្ញុំ សូមរំឭកជូនឯកឧត្តមឲ្យបានជ្រាបថា ការផ្តួចផ្តើមនៃការបង្រួបបង្រួម រវាងគណបក្សនរោត្តម រណឫទ្ធិ និងហ៊្វុនស៊ិនប៉ិចថា វា ពិតណាស់ស្តែងចេញពីឆន្ទៈរបស់ខ្ញុំ។ ខ្ញុំ បានព្យាយាមជម្នះគ្រប់ឧបសគ្គនិងលះបង់គ្រប់បែបយ៉ាងដើម្បីទទួល ការសម្របសម្រួលនេះ និងឧបត្ថម្ភដោយ សម្តេចតេជោនាយករដ្ឋមន្រ្តី [ហ៊ុន សែន] ដើម្បីឈានទៅទទួលបានការចុះហត្ថលេខារួមនាថ្ងៃទី២៤ខែឧសភា ឆ្នាំ២០១២ នៅវិមានសន្តិភាព»។
ទន្ទឹមគ្នានេះដែរ ទ្រង់រណឫទ្ធិ បានព្រមានថា លោក សៅ រ៉ានី មិនអាចយកគណបក្សនរោត្តម រណឫទ្ធិ របស់ព្រះអង្គ ដើម្បីប្រើប្រាស់សម្រាប់ការចរចាបានទេ រាល់លទ្ធផលណាមួយដែលកើតចេញពីការចរចារវាងលោក សៅ រ៉ានី និងបក្សហ៊្វុនស៊ិនប៉ិច នឹងមិនត្រូវទទួលស្គាល់ឡើយ។
ទោះជាយ៉ាងណាក៏ដោយ ក៏លោក សៅ រ៉ានី បានអះអាងថា គណបក្សរាជានិយមទាំងពីរ ត្រូវតែច្របាច់បញ្ចូលគ្នា ប៉ុន្តែមិនបានប្រាប់កាលបរិច្ឆេទជាក់លាក់ណាមួយទេ ហើយបានអះអាងថា វាមិនមែនជាការផ្តាច់ខ្លួនទេ វាគ្រាន់តែជាយុទ្ធសាស្រ្តនិងមធ្យោបាយនៃច្របាច់បញ្ចូលគ្នាតែប៉ុណ្ណោះ៕
No comments:
Post a Comment
yes