អ្នកស្រី ម៉ក់ ស៊ីវុន្នី មើលថែទាំងលោក នាង ស្បាន
ដែលស្ថិតនៅក្នុងបន្ទប់សង្គ្រោះបន្ទាន់
ភ្នំពេញៈ ជើងទាំងពីរដែលធ្លាប់ប្រើដើម្បីទាត់បាល់ និងណែនាំបច្ចេកទេសដល់កីឡាករ លែងនៅជាមួយលោក នាង ស្បាន ទៀតហើយ។
ជំងឺទឹកនោមផ្អែម និងអាស៊ីតនៅក្នុងពោះវៀន ចាប់តាំងពីឆ្នាំ១៩៩៧មក បានធ្វើឲ្យលោក នាង ស្បាន អតីតកីឡាករបាល់ទាត់ជម្រើសជាតិនៅមុនសម័យសង្គ្រាមម្នាក់ ធ្លាក់ចូលទៅក្នុងពិការភាពទាំងស្រុង។
ចាប់តាំងពីថ្ងៃសៅរ៍សប្តាហ៍មុន លោកទទួលការព្យាបាលនៅក្នុងបន្ទប់សង្គ្រោះបន្ទាន់នៃពន្ទីរពេទ្យ កាល់ម៉ែត បន្ទាប់ពីសម្រាកនៅក្នុងមន្ទីរពេទ្យព្រះកុសុមៈ អស់រយៈពេលជិតបួនខែ។
បំពាក់ដោយបំពង់ខ្យល់អុកស៊ីសែន ជាមួយនឹងទឹកមុខស្រពាប់ស្រពោន ប៉ុន្តែខំប្រឹងញញឹម លោក នាង ស្បាន មិនចង់លាចាកពីពិភពលោកដ៏ស្រស់បំព្រងនេះឡើយដោយលោកធ្លាប់ បាននិយាយប្រាប់ ភរិយា និងកូនៗថា «សូមជួយថែរក្សាដៃទាំងពីររបស់លោកឲ្យបានល្អផង ព្រោះលោកមិនចង់បាត់បង់ដូចជាជើងនោះឡើយ»។
អ្នកស្រី ម៉ក់ សីុវុន្នី ដែលជាភរិយា បាននិយាយរៀបរាប់ទាំងទឹកភ្នែកថា លោក នាង ស្បាន បានធ្លាក់ខ្លួនឈឺជាទម្ងន់ ចាប់តាំងពីខែមីនាមក ពោលគឺក្រោយពេលដែលលោកចេញពីដឹកនាំបង្វឹកក្រុមវេស្ទើន។ លោកស្រីបានលើកឡើងថា៖ «ដោយសារតែមេរោគ ម្រាមជើងរបស់គាត់បានផ្ទុះចេញ ដោយឆ្លងពីស្តាំទៅឆ្វេង ហើយត្រូវបានគ្រូពេទ្យកាត់ចេញជាបន្តបន្ទាប់ រហូតដល់ត្រឹមភ្លៅ»។
បញ្ហានោះចេះតែធ្ងន់ធ្ងរទៅពីមួយថ្ងៃទៅមួយថ្ងៃ ហើយ មេរោគបានបន្តបុកចូលដល់សួតរបស់លោកទៀត។ ប៉ុន្តែទោះបីជាយ៉ាងណាក៏ដោយ លោកស្រី និងកូនៗ មិនបានបង្ហើបឲ្យដឹងពីស្ថានភាពនៃជំងឺ និងការចាយវាយឲ្យគាត់ដឹងឡើយ។
នាង ទិត្យមេសា អតីតកីឡាករបាល់ទាត់ជម្រើសជាតិ និងក្លិបណាហ្គាខប ដែលកូនប្រុសម្នាក់របស់លោក នាង ស្បាន គឺជាអ្នករ៉ាប់រងបន្ទុកនៃការចាយវាយដ៏សំខាន់ម្នាក់។
អ្នកស្រី ម៉ក់ ស៊ីវុន្នី បានលើកឡើងថា៖ «ពួកយើងអស់រលីងពីខ្លួន ហើយថែមទាំងជាប់បំណុលគេមួយចំនួនទៀត។ ការបង់ថ្លៃពេទ្យប្រមាណ៣០០ដុល្លារអាមេរិកជារៀងរាល់ថ្ងៃ គឺពិតជាធ្ងន់ធ្ងរណាស់សម្រាប់យើង»។
លោក នាង ស្រាន បច្ចុប្បន្ន មានវ័យ៦៥ឆ្នាំ បានបរិច្ចាគជីវិតរបស់លោកសម្រាប់កីឡាបាល់ទាត់ចាប់តាំងពីអាយុ១៨ ឆ្នាំមកម្ល៉េះ លោកបានក្លាយជាកីឡាករជម្រើសខេត្តស្វាយរៀងនាជំនាន់នោះ ហើយក្រោយមកបានចូលក្នុងឈុតជម្រើសជាតិ។ ក្រោយសម័យសង្គ្រាម លោកបានចូលលេងឲ្យស្បៀងមជ្ឃិមនៃក្រសួងពាណិជ្ជកម្ម ហើយក្រោយមកបានធ្វើគ្រូបង្វឹករបស់ក្រុមមួយនេះ។ ជាបន្តបន្ទាប់លោកធ្លាប់បានធ្វើជាគ្រូបង្វឹករបស់ក្រុមកង យោធពលខេមរភូមិន្ទ ក្រុមនគរបាលជាតិ ក្រុមណាហ្គាខប ក្រុមខេត្តក្រចេះ ក្រុមសាកលវិទ្យាល័យមេគង្គកម្ពុជា និងសាកលវិទ្យាល័យវេស្ទើនបានជាងមួយខែ មុនធ្លាក់ខ្លួនឈឺធ្ងន់។
កន្លងមក គ្រួសាររបស់លោក បានទទួលនូវការឧបត្ថម្ភពីសហព័ន្ធកីឡាបាល់ទាត់កម្ពុជា (១លានរៀល) ពីលោក សៅ សុខា (១លានរៀល) ពីលោក លី គឹម ឈុន (១ពាន់ដុល្លារ) ពីលោក រិទ្ធ ឌីកា (៣០០ដុល្លារ) ពីលោក សោម សារ៉ន ហៅមុំាង និងអតីតសិស្សរបស់លោកមួយចំនួន៕
No comments:
Post a Comment
yes