គណៈកម្មាធិការជាតិរៀបចំការបោះឆ្នោត (គ.ជ.ប) កាលពីថ្ងៃម្សិលមិញបានប្រកាសថា ក្នុងរយៈពេល២០ថ្ងៃ នៃការពិនិត្យបញ្ជីឈ្មោះ និងចុះឈ្មោះបោះឆ្នោត មានអ្នកមកចុះឈ្មោះបោះឆ្នោតចំនួន៤០៤.៧៣៨នាក់ ស្មើនឹង៦៥,៣២ភាគរយ នៃចំនួនប៉ាន់ប្រមាណសរុប៦១៩.៦៣០នាក់។
តាមរបាយការណ៍របស់ គ.ជ.ប ក្នុងចំណោម២៤ខេត្តក្រុង ទីក្រុងភ្នំពេញត្រូវរកឃើញថា មានចំនួនអ្នកចុះឈ្មោះបោះឆ្នោតច្រើនជាងគេ គឺជាង៥ម៉ឺននាក់ បន្ទាប់មកគឺខេត្តកំពង់ចាម មានចំនួនជាង៤ម៉ឺននាក់។ ចំណែកខេត្តដែលមានចំនួនអ្នកចុះឈ្មោះបោះឆ្នោតថ្មីតិចជាងគេ គឺខេត្តកែប ដែលមានចំនួនតែជាង១ពាន់នាក់។
លោក ម៉ៅ សុភារិទ្ធ សមាជិក គ.ជ.ប បាននិយាយថា ដំណើរការចុះឈ្មោះបោះឆ្នោតរយៈពេល២០ថ្ងៃកន្លងទៅនេះមានលក្ខណៈល្អប្រសើរ បើទោះជាមានភ្លៀងធ្លាក់រំខានខ្លះៗក៏ដោយ។ ជាមួយគ្នា គ.ជ.ប ក៏បានជំរុញ និងបង្កើតមជ្ឈមណ្ឌលព័ត៌មានស្វែងរកឈ្មោះអ្នកបោះឆ្នោតក្នុងបញ្ជីបោះឆ្នោតតាមប្រព័ន្ធអ៊ីនធឺណេតផងដែរ ហើយរហូតមកដល់ពេលនេះ គ.ជ.ប បង្កើតបានចំនួន៦១៨មជ្ឈមណ្ឌលហើយនៅទូទាំងប្រទេស។
សូមបញ្ជាក់ថា តាមប្រតិទិនរបស់ គ.ជ.ប ការពិនិត្យបញ្ជីឈ្មោះ និងចុះឈ្មោះបោះឆ្នោតឆ្នាំ២០១២នេះ ត្រូវបានកំណត់ធ្វើចាប់ពីថ្ងៃទី០១ ខែកញ្ញា រហូតដល់ថ្ងៃទី១២ ខែតុលា ឆ្នាំ២០១២៕
No comments:
Post a Comment
yes