លោកនាយករដ្ឋមន្ត្រី ហ៊ុន សែន បានសម្រេចផ្ទេរភារកិច្ច និងការងាររបស់មន្ត្រីនគរបាលរាជធានីភ្នំពេញមួយចំនួន នៅថ្ងៃទី៣ ខែតុលា ឆ្នាំ២០១២ ក្នុងនោះរាប់ទាំងស្នងការនគរបាលរាជធានីភ្នំពេញ លោកឧត្តមសេនីយ៍ទោ ទូច ណារ៉ុថ ដែរ។
ស្នងការនគរបាលក្រុងភ្នំពេញ លោកឧត្តមសេនីយ៍ទោ ទូច ណារ៉ុថ ត្រូវបានផ្ទេរតំណែងទៅជាប្រធាននាយកដ្ឋានអង្គរក្សរបស់អគ្គស្នងការនគរបាលជាតិ។ ចំណែកឯអគ្គស្នងការរងនគរបាលជាតិ លោកឧត្តមសេនីយ៍ឯក ជួន សុវណ្ណ ត្រូវបានផ្ទេរការងារមកជំនួសលោក ទូច ណារ៉ុថ វិញ នៅថ្ងៃទី៣ ខែតុលា ឆ្នាំ២០១២។
ការសម្រេចផ្ទេរការងារ និងភារកិច្ចនេះ គឺតាមសំណើជាផ្លូវការរបស់រដ្ឋមន្ត្រីក្រសួងមហាផ្ទៃ លោក ស ខេង និងជាឧបនាយករដ្ឋមន្ត្រី និងតាមសំណើរបស់អគ្គស្នងការនគរបាលជាតិ លោកនាយឧត្តមសេនីយ៍ នេត សាវឿន និងជាទីប្រឹក្សាផ្ទាល់របស់លោកនាយករដ្ឋមន្ត្រី ហ៊ុន សែន។
ស្នងការនគរបាលក្រុងភ្នំពេញ ដែលទើបបានទទួលមុខតំណែងថ្មី គឺលោកឧត្តមសេនីយ៍ឯក ជួន សុវណ្ណ បានមានប្រសាសន៍ថា លោកស្មោះត្រង់ចំពោះជាតិ និងអនុវត្តន៍តាមគោលនយោបាយរបស់រដ្ឋាភិបាល ដែលប្រគល់សេចក្តីទុកចិត្តមកលើរូបលោក៖«គ្រប់គ្រងកម្លាំងឲ្យមានមុខបំពេញការងារពិតប្រាកដ រៀបចំ និងពង្រឹងកងកម្លាំង ដោយបង្កើនឲ្យមានប្រព័ន្ធដោះស្រាយរហ័ស ដែលក្នុងនោះត្រូវពង្រឹងការងារប្រចាំបញ្ជា។ ល្បាតចល័ត អន្តរាគមន៍រហ័ស ការត្រួតពិនិត្យ និងការរាយការណ៍។
កាត់បន្ថយភាពកង្វល់ និងការភ័យខ្លាចរបស់ប្រជាពលរដ្ឋ និងយកចិត្តទុកដាក់លើបញ្ហាបី គឺកាត់បន្ថយបទល្មើសលួចឆក់ប្លន់ កាត់បន្ថយអំពើអសកម្មនៅក្នុងសង្គម គ្រឿងញៀន ល្បែងស៊ីសង និងក្មេងទំនើង។ ការធុញទ្រាន់របស់ប្រជាពលរដ្ឋចំពោះសមត្ថកិច្ច អំពើខុសឆ្គងរបស់សមត្ថកិច្ច ទាំងសមត្ថកិច្ចអនុវត្តន៍ជំនាញ សមត្ថកិច្ចអនុវត្តន៍តាមដងផ្លូវសាធារណៈ និងទាំងសមត្ថកិច្ចអនុវត្តន៍តាមសហគមន៍ ឃុំ-សង្កាត់ និងខណ្ឌ»។
ចំណែកឯអភិបាលក្រុងភ្នំពេញ លោក កែប ជុតិមា បានមានប្រសាសន៍ថា នគរបាលជាតិបានការពារសន្តិសុខ និងសុវត្ថិភាពបានល្អកន្លងមកជូនប្រជាពលរដ្ឋ និងកិច្ចប្រជុំអាស៊ាន នៅទីក្រុងភ្នំពេញ៖ «អស់លោកទាំងអស់នេះ ពិតជាមានបទពិសោធន៍យ៉ាងជ្រាលជ្រៅ ដែលធ្លាប់កាន់ការនៅរាជធានីភ្នំពេញនេះតាំងពីយូរយារណាស់មកហើយ។ ខ្ញុំចាត់ទុកថា ជាមោទនភាពមួយដែរសម្រាប់មន្ត្រីនគរបាលនៃស្នងការដ្ឋាននគរបាលរាជធានីភ្នំពេញរបស់យើង»។
ប្រធានក្រុមអ្នកស៊ើបអង្កេតនៃអង្គការការពារសិទ្ធិមនុស្សលីកាដូ (Licadho) លោក អំ សំអាត បានមានប្រសាសន៍ថា លោកសោកស្ដាយ ពីព្រោះលោក ទូច ណារ៉ុថ តែងតែសហការជាមួយសង្គមស៊ីវិលនៅពេលមានបាតុកម្ម ឬកូដកម្មម្តងៗ៖ «ផ្លាស់ប្ដូរនេះ យើងសង្ឃឹមថា ស្នងការថ្មីដែលមកជំនួសនេះ គាត់នឹងបន្តកិច្ចសហការជាមួយនឹងអង្គការក្រៅរដ្ឋាភិបាល ហើយជ្រើសរើសយកគោលការណ៍ បានន័យថា ការពារសុវត្ថិភាពទាក់ទងនឹងបញ្ហាសន្តិសុខ ជាពិសេស ទាក់ទងនឹងធ្វើការបង្ក្រាបបាតុកម្ម កូដកម្មហ្នឹង គឺជ្រើសរើសវិធីដោយអហិង្សា គោរពតាមច្បាប់ គោរពតាមគោលការណ៍សិទ្ធិមនុស្ស មិនប្រើប្រាស់អំពើហិង្សាទេ»។
គេបានកត់សម្គាល់ថា ការផ្ទេរការងារស្នងការនគរបាលក្រុងភ្នំពេញ នៅពេលនេះ គឺដើម្បីពង្រឹងសន្តិសុខតឹងរ៉ឹងជាមុន នៅមុនពេលកិច្ចប្រជុំកំពូលអាស៊ាន លើកទី២១ នៅទីក្រុងភ្នំពេញ ដែលនឹងប្រព្រឹត្តទៅចាប់ពីថ្ងៃទី១៥ ដល់ថ្ងៃទី២០ ខែវិច្ឆិកា ឆ្នាំ២០១២។
នៅពេលនោះហើយ គេរំពឹងថានឹងចូលរួមដោយប្រធានាធិបតីសហរដ្ឋអាមេរិក លោក បារ៉ាក់ អូបាម៉ា (Barack Obama) ប្រធានាធិបតី ប្រទេសរុស្ស៊ី លោក វ្លាឌីមា ពូទីន (Vladimir Putin) នាយករដ្ឋមន្ត្រីប្រទេសចិន លោក វិន ជាបាវ (Wen Jiabao) និងមេដឹកនាំប្រទេសមួយចំនួនទៀត៕
No comments:
Post a Comment
yes