ប្រជាពលរដ្ឋគ្រប់ទិសទី មកគោរពព្រះវិញ្ញាណក្ខន្ធ ព្រះករុណាព្រះបាទ
សម្តេចព្រះនរោត្តម សីហនុ
ភ្នំពេញៈ ថ្ងៃឈប់សម្រាកសាធារណៈថ្មីមួយ នឹងត្រូវដាក់នៅលើប្រតិទិនឈប់សម្រាកប្រចាំឆ្នាំ ដើម្បីជាថ្ងៃរំឭកដល់ការយាងចូលទិវង្គតរបស់ព្រះករុណា ព្រះបាទ សម្តេចព្រះ នរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពទឹកដី និងឯកភាពជាតិខ្មែរ។
នៅក្នុងសារាចរមួយចុះហត្ថលេខាដោយលោកនាយករដ្ឋមន្រ្តី ហ៊ុន សែន កាលពីម្សិលមិញ រដ្ឋាភិបាលបានកំណត់ថ្ងៃទី១៥ ខែតុលា ជាថ្ងៃឈប់សម្រាកសាធារណៈប្រចាំឆ្នាំ និងជាថ្ងៃរំឭកដល់ការយាងចូលទិវង្គតរបស់អតីតព្រះមហាវីរ ក្សត្រ សម្តេចព្រះបាទ នរោត្តម សីហនុ។
សារាចរនេះបានបញ្ជាក់ថា៖ «គ្រប់ក្រសួង ស្ថាប័ន គ្រឹះស្ថានសាធារណៈនិងឯកជន ត្រូវរៀបចំទិវាប្រារព្ធពិធីគោរពព្រះវិញ្ញាណក្ខន្ធ ថ្ងៃទី១៥ ខែតុលា ឲ្យបានឧត្តុង្គឧត្តម ស័ក្តិសមនឹងព្រះគុណូបការៈរបស់ព្រះអង្គចំពោះជាតិមាតុភូមិនិងប្រជាជន តាមទំនៀមទម្លាប់ប្រពៃណីជាតិ»។
សារាចរនេះ ក៏ណែនាំឲ្យគ្រប់ស្ថានអគ្គរាជទូត និងស្ថានកុងស៊ុលនៃព្រះរាជាណាចក្រកម្ពុជាប្រចាំនៅបរទេស និងរដ្ឋបាលថ្នាក់ក្រោមជាតិ គ្រប់លំដាប់ថ្នាក់ រួមមានរាជធានី ខេត្ត ក្រុង ស្រុក ខណ្ឌ ឃុំ សង្កាត់ ត្រូវរៀបចំប្រារព្ធពិធីនេះឲ្យបានទូលំទូលាយ និងសមស្រប តាមព្រះគោរមងាររបស់ព្រះអង្គ ជាព្រះវររាជបិតាឯកភាពជាតិខ្មែរ។
លោក ជា មុនី ប្រធានសហជីពសេរីកម្មករនៃព្រះរាជាណាចក្រកម្ពុជា បានស្វាគមន៍ចំពោះថ្ងៃឈប់សម្រាកថ្មីនេះ ប៉ុន្តែ ក៏បានអំពាវដល់រដ្ឋាភិបាលឲ្យមានការឈប់សម្រាកនៅថ្ងៃទី២៣ ខែតុលា ផងដែរ។
លោកថ្លែងបន្តថា ៖ «ថ្ងៃទី២៣ តុលា ត្រូវទទួលស្គាល់ថា ជាថ្ងៃចុះហត្ថលេខាលើកិច្ចព្រមព្រៀងទីក្រុងប៉ារីស ដែលជាស្នាព្រះហស្តសម្តេចឪ ដែលគួរទុកជាថ្ងៃឈប់សម្រាកសាធារណៈ»។
តាមប្រតិទិនឈប់ សម្រាកការងារប្រចាំឆ្នាំ ២០១២ បានកំណត់ថ្ងៃឈប់សម្រាកសាធារណៈ សរុបចំនួន ២៥ថ្ងៃ ក្នុងនោះមានពិធីចម្រើនព្រះជន្មព្រះមហាក្សត្រ៣ថ្ងៃ ពិធីចម្រើនព្រះជន្មសម្តេចព្រះមហាក្សត្រិយ៍ នរោត្តម មុនីនាថសីហនុ មួយថ្ងៃ និងពិធីចម្រើនព្រះជន្មព្រះមហាវីរក្សត្រមួយថ្ងៃ គឺនៅថ្ងៃទី៣១ តុលា ហើយដែលសម្រាប់ឆ្នាំខាងមុខនិងជំនួសតាមសារាចរថ្មីដែលយកថ្ងៃ ទី១៥ តុលា រំឭកថ្ងៃសោយទិវង្គតវិញ៕
No comments:
Post a Comment
yes