ក្រុង ឡុងដ៍ៈ ពេលនេះយើងមកជួបនឹងសត្វដំរីអាស៊ីមួយឈ្មោះកូស៊ីដ ដែលមានសមត្ថភាពអាចនិយាយភាសាមនុស្សបាន។ តាមការបញ្ជាក់របស់ក្រុមអ្នកស្រាវជ្រាវនៃសាកលវិទ្យាល័យវីយែន វាអាចនិយាយនិងស្តាប់យល់នូវភាសាកូរ៉េបាន។
ទាក់ទិននឹងសត្វ ដំរីចេះនិយាយភាសាមនុស្សចាប់តាំងពីពេលណាមកនោះ មិនត្រូវបានគេដឹងច្បាស់ឡើយ តែអ្នកជីវវិទ្យាពីររូប អេនជីឡា ស្តូអេហ្គឺ និង តេកាមសេស ហ្វីតឆ៍ បានអះអាងតាមរយៈអត្ថបទបោះពុម្ពផ្សាយ Current Biologyថា ថនិកសត្វភ្លុកទាំងគូសក្បុសនេះទំនងជាអាចរៀននិយាយភាសានេះបាន តាំងពីពេលវានៅតូចមក។
កូស៊ីដជាដំរីមួយរស់នៅឯសួនសត្វអេវើឡេនដ៍ នៅក្នុងប្រទេសកូរ៉េខាងត្បូង ៥ឆ្នាំមកហើយ។
ជីវវិទូ ស្តូអេហ្គឺ និយាយថា៖ «យើងគិតថា កូស៊ីដ ចាប់ផ្តើមរៀននិយាយភាសាមនុស្សនេះតាមការផ្សាំទៅនឹងស្ថានភាព មនុស្សនៅជាមួយវា និងភាពស្និទ្ធស្នាលរវាងមនុស្សជាមួយវាតែម្តង។ វាអាចធ្វើត្រាប់សំឡេងបានយ៉ាងអស្ចារ្យ»។
មានរបាយការណ៍មួយចំនួន បានឲ្យដឹងថា សត្វដំរីភាគច្រើនមានសំឡេងបន្លឺឡើងសូរដូចជាសំឡេងម៉ាស៊ីនរថយន្ត ដឹកទំនិញធំៗអ៊ីចឹង។ គេក៏ធ្លាប់ឃើញមានដំរីឈ្មោលមួយក្បាលដែលនៅសួនសត្វមួយក្នុង ប្រទេសកាហ្សាក់ស្ថានចេះនិយាយភាសាមនុស្សដែរ ដោយវាអាចនិយាយបានទាំងភាសារុស្ស៊ី និងភាសាកាហ្សាក់ស្ថាន។ តែករណីនេះក៏មិនត្រូវបានក្រុមអ្នកវិទ្យាសាស្ត្របានតាមដាន សិក្សាឡើយ។
ចំណែកដំរីកូស៊ីដនេះវិញក៏វាមានភាពល្បីរបស់ខ្លួន អស់រយៈពេលពីរ-បីឆ្នាំមកហើយដែរ តាមក្រុមភ្ញៀវទេសចរមកទស្សនានិងនិយាយលេងជាមួយវានោះ។ ក្រុមអ្នកស្រាវជ្រាវបានកត់សម្គាល់ថា ពេលវាបិទប្រមោយវាជាមួយនឹងមាត់នោះគឺវាអាចបង្កើតបញ្ចេញសំឡេង បានដូចជានិយាយថា សួស្តី អង្គុយចុះ ទេ ដេកចុះ និងល្អជាដើម។
ថ្វី ដ្បិតតែវាអាចនិយាយភាសាកូរ៉េបាន ប៉ុន្តែគេពុំមានភស្តុតាងណាមួយមកបញ្ជាក់ថា ដំរីកូស៊ីដនេះយល់ពីអត្ថន័យភាសានោះទេ៕
No comments:
Post a Comment
yes