ភ្នំពេញ: លេខាធិការដ្ឋាននៃអង្គការសមាគមខ្មែរកម្ពុជាក្រោម ប្រចាំព្រះរាជាណាចក្រកម្ពុជា គឺជាសម្ព័ន្ធដែលមានអង្គការសមាគមចំនួន១២ ជាសមាជិក បានសហការណ៍គ្នាដើម្បីរៀបចំសិក្ខាសាលាពិគ្រោះយោបល់ស្តីពី “សិទ្ធិសេរីភាពក្នុងការបញ្ចេញមតិ និងទទួលបានពត៌មាន”។
សិក្ខាសាលានេះនឹងធ្វើ នៅថ្ងៃទី២៥ ខែមីនា ឆ្នាំ២០១៣ ចាប់ពីម៉ោង ៨:០០ នាទីព្រឹក រហូតដល់ម៉ោង ៥:០០នាទីរសៀល នៅសាលប្រជុំរបស់សមាគមខ្មែរកម្ពុជាក្រោម ដើម្បីសិទ្ធិមនុស្ស និងអភិវឌ្ឍន៍ ផ្ទះលេខ២៤ ផ្លូវលេខ២០១១/៣០៩ (សហគមន៍បូរីព្រៃនគរ/គោកឃ្លាង) ភូមិគោកឃ្លាង សង្កាត់ភ្នំពេញថ្មី ខ័ណ្ឌសែនសុខ រាជធានីភ្នំពេញ។
យោងតាមសេចក្តីប្រកាសព័ត៌មានរបស់លេខាធិការដ្ឋាននៃអង្គការសមាគមខ្មែរកម្ពុជាក្រោម បានបញ្ជាក់ថា៖ ការជួបជុំសមាគម ខ្មែរកម្ពុជាក្រោម ធ្វើសិក្ខាសាលាមានគោលបំណង៖
១.អ្នកចូលរួមទាំងអស់នឹងបានជ្រាបបន្ថែមពីប្រភពបញ្ហា និងឬសគល់ដែលបណ្តាល ឱ្យកើតមានឡើងចំពោះបងប្អូនខ្មែរក្រោម ។
២.អ្នកចូលរួមទាំងអស់នឹងបានជ្រាបបន្ថែមពីការវិភាគស្ថានភាពស្របច្បាប់នៃការរស់នៅរបស់បងប្អូនខ្មែរក្រោម ។
៣.អ្នកចូលរួមទាំងអស់នឹងបានជ្រាបបន្ថែមពីការវិភាគផ្លូវច្បាប់ពាក់ព័ន្ធនិងបញ្ហារបស់ខ្មែរក្រោមប្រឈម និងនីតិវិធីនៃការដោះស្រាយ ។
៤.អ្នកចូលរួមនឹងបានប្រមូលទិន្នន័យដែលជាបញ្ហាបច្ចុប្បន្ននៃខ្មែរក្រោមកំពុងប្រឈមនិងបានពង្រាង របាយការណ៍ ដាក់ជូនសន្និបាត អង្គការសហប្រជាជាតិ នាពេលខាងមុខ។
សិក្ខាសាលានេះមានការចូលរួមពីលោកមេធាវី សុក សំអឿន នាយកប្រតិបត្តិនៃក្រុម អ្នកច្បាប់ការពារសិទ្ធិកម្ពុជា និងវាគ្មិន មកពីតំណាង ការិយាល័យ ឧត្តមស្នងការ អង្គការសហប្រជាជាតិទទួលសិទ្ធិមនុស្សប្រចាំកម្ពុជា និងសិក្ខាកាមត្រូវបានអញ្ជើញចូលរួម គឺជាប្រជាពរដ្ឋ ខ្មែរក្រោម នៅរាជធានីភ្នំពេញ និងមកពីបណ្តាខេត្តចំនួន៦នៃព្រះរាជាណាចក្រកម្ពុជា សរុប ១០០ នាក់៕
No comments:
Post a Comment
yes