អ្នកលេងហ្វេសប៊ុកមួយចំនួន បញ្ចេញមតិខុសៗគ្នា លើភាពដែលអាចទៅរួច ទៅលើការរឹតបន្តឹងច្បាប់ ឬការបិទបណ្តាញសង្គមហ្វេសប៊ុក ខណៈបណ្តាញសង្គមមួយនេះ កំពុងទទួលភាពពេញនិយមពីសំណាក់យុវជន និងក្លាយជាកន្លែងរិះគន់មន្ត្រីរដ្ឋាភិបាល។
បណ្តាញសង្គមមួយនេះ ចាប់ផ្តើមទទួលបានការយកចិត្តទុកដាក់ខ្លាំង នៅមុន និងក្រោយការបោះឆ្នោត ដែលធ្វើឲ្យអ្នកតាមដានយល់ថា ហ្វេសប៊ុក ហាក់មានទំនោរទៅរកគណបក្សប្រឆាំង និងហ្វេសប៊ុក ជាបណ្តាញប្រឆាំងនឹងរាជរដ្ឋាភិបាល។ កាលពីថ្ងៃចន្ទម្សិលមិញនេះ អ្នកលេងហ្វេសប៊ុក បានរិះគន់តំណាងរាស្ត្រគណបក្សប្រជាជនកម្ពុជា លោក ឈាង វុន និងបានកោតសរសើរតំណាងរាស្ត្រគណបក្សប្រឆាំង លោក សុន ឆ័យ ក្រោយពីមន្ត្រីទាំងពីរ បានវាយបកគ្នា ជាសម្តីនៅក្នុងវេទិកាវិទ្យុអាស៊ីសេរី។
នាយកកម្មវិធីនៅមជ្ឈមណ្ឌលសិទិ្ធមនុស្សកម្ពុជា(ម.ស.ម.ក) និងជាអ្នកលេងហ្វេសប៊ុកម្នាក់ កញ្ញា ចក់ សុភាព មានប្រសាសន៍ថា កន្លងមក យុវជនមានការពេញនិយមខ្លាំង ក្នុងការប្រើប្រាស់បណ្តាញសង្គមហ្វេសប៊ុក ជាពិសេសការវាយប្រហារ ពាក្យសម្តីមួយចំនួន ទៅកាន់មន្ត្រីគណបក្សកាន់អំណាច។ កញ្ញាសម្តែងការព្រួយបារម្ភថា អាចនឹងមានការរឹតបន្តឹងមួយចំនួន ក្រោយការបោះឆ្នោតនេះ ៖
អ្នកលេងហ្វេសប៊ុកម្នាក់ លោក អ៊ូ រិទ្ធី អាយុ២៦ឆ្នាំ ប្រាប់តាមរយៈទូរស័ព្ទថា លោកមិនបារម្ភថា នឹងមានការបិទបណ្តាញសង្គមហ្វេសប៊ុកទេ ព្រោះបណ្តាញព័ត៌មានមួយនេះ មានគុណសម្បត្តិច្រើនដល់រាជរដ្ឋាភិបាល។
លោកបន្តថា បើសិនគណបក្សប្រជាជនកម្ពុជា នៅតែបន្តកាន់តំណែង មន្ត្រីរាជរដ្ឋាភិបាល រឹតតែយកចិត្តប្រជាពលរដ្ឋជាងមុន ៖
មន្ត្រីកម្មវិធីសិទ្ធិការងាររបស់មជ្ឈមណ្ឌលអប់រំច្បាប់សម្រាប់សហគមន៍ លោក មឿន តុលា មានប្រសាសន៍ថា បើគណបក្សប្រជាជនកម្ពុជា នៅតែកាន់អំណាច នោះនឹងមានការរឹតបន្តឹងប្រព័ន្ធអ៊ីនធើណេតដូចជា ហ្វេសប៊ុក។
លោកបន្តថា បើហ្វេសប៊ុក ត្រូវបានបិទមែន នោះនឹងមានការតវ៉ាពីសំណាក់ក្រុមយុវជន ដែលនិយមលេងហ្វ៊េសប៊ុក ៖
មួយរយៈពេលចុងក្រោយមុនការបោះឆ្នោត ក៏ដូចជាក្រោយថ្ងៃបោះឆ្នោត នីតិកាលទី៥នេះ គេសង្កេតឃើញថា មានសន្ទុះខ្លាំងចំពោះក្រុមយុវជន ដែលបាននាំគ្នាប្រើប្រាស់ បណ្តាញសង្គមហ្វេសប៊ុក ហើយបានបញ្ចេញមតិ ដែលពួកគេតែងតែងើងឆ្ងល់។ កន្លងមកប្រមុខរាជរដ្ឋាភិបាល លោក ហ៊ុន សែន ធ្លាប់បាន ព្រមានអ្នកលេងហ្វេសប៊ុក ដែលធ្វើអ្វីដោយសេរី និងប៉ះពាល់ដល់អ្នកដទៃ។
នាយករដ្ឋមន្ត្រី ប្រកាសថា លោក មិនបានប្រើប្រាស់ហ្វេសប៊ុកទេ។ សម្រាប់ លោក សម រង្ស៊ី គឺជាអ្នកលេងហ្វេសប៊ុកម្នាក់ ដែលលោកតែងតែបង្ហោះរូបភាព និងសកម្មភាពរបស់លោក។
កាលពីខែឧសភា ឆ្នាំ២០១៣ រដ្ឋមន្ដ្រី ក្រសួងព័ត៌មាន និងជាអ្នកនាំពាក្យរាជរដ្ឋាភិបាល លោក ខៀវ កាញារីទ្ធ មានប្រសាសន៍ថា រាជរដ្ឋាភិបាល មិនមានបំណងបិទបណ្ដាញទំនាក់ទំនងសង្គមហ្វេសប៊ុក នោះទេ។
តួលេខពីប្រភពផ្សេងៗគ្នាបានបញ្ជាក់ថា ប្រទេសកម្ពុជានៅឆ្នាំ២០១២នេះ មានអ្នកប្រើប្រាស់គណនីយហ្វេសប៊ុក ចំនួនជាង៧សែននាក់។ ប្រសិនបើគេយកចំនួនអ្នកលេងហ្វេសប៊ុកបូកបញ្ចូលជាមួយអ្នកតាមដាន ព័ត៌មានតាមប្រព័ន្ធអ៊ីនធើណេតនោះ អ្នកជំនាញមួយចំនួនប៉ាន់ស្មានថា វាអាចមានចំនួនជិត១លាននាក់៕
No comments:
Post a Comment
yes