គណៈប្រតិភូគណបក្សប្រជាជន និងគណបក្សសង្គ្រោះជាតិ(រូបថតដោយ តាំង វីដា)
គណៈប្រតិភូគណបក្សនយោបាយទាំងពីរ នៅព្រឹកថ្ងៃអង្គារនេះ ចំណាយពេលអស់ជាង ៣ម៉ោងសម្រាប់កិច្ចពិភាក្សា ប៉ុន្តែមិនហ៊ានប្រកាសលទ្ធផលជាផ្លូវការទេ គឺរង់ចាំរាយការណ៍ជូនថ្នាក់ដឹកនាំរៀងៗខ្លួនជាមុនសិន។
នៅម៉ោង៩ព្រឹកនេះ គណៈប្រតិភូគណបក្សសង្គ្រោះជាតិ និងគណបក្សប្រជាជនកម្ពុជា ដែលមានម្ខាង៥រូប បានជួបគ្នានៅវិមានរដ្ឋសភា ដើម្បីបើកកិច្ចពិភាក្សាដោយបិទទ្វារ រកដំណោះស្រាយភាពទាល់ច្រកផ្នែកនយោបាយ។
ក្រោយពីបញ្ចប់កិច្ចពិភាក្សា អ្នកនាំពាក្យគណបក្សសង្គ្រោះជាតិ លោក យឹម សុវណ្ណ ថ្លែងប្រាប់អ្នកសារព័ត៌មានថា គណបក្សទាំងពីរ បានជជែកច្រើនពាក់ព័ន្ធនឹងការងារបោះឆ្នោត និងបានព្រមព្រៀងរាយការណ៍ ការផ្លាស់ប្តូរយោបល់ទៅវិញទៅមកនេះ ទៅកាន់ថ្នាក់ដឹកនាំកំពូលនៃគណបក្សទាំងពីរ។
លោក យឹម សុវណ្ណ អះអាងថា កិច្ចពិភាក្សានេះ មិនបានមានការលើកឡើងពាក់ព័ន្ធនឹង ការចូលរួមប្រជុំសភារបស់បេក្ខជនជាប់ឆ្នោតតំណាងរាស្ត្រគណបក្សសង្គ្រោះជាតិ និងការបែងចែកតួនាទីមុខតំណែងនោះទេ។
រដ្ឋលេខាធិការក្រសួងមហាផ្ទៃ លោក ព្រំ សុខា តំណាងគណបក្សប្រជាជនកម្ពុជាមានប្រសាសន៍ថា កិច្ចប្រជុំចរចានេះ គឺបានផ្តោតសំខាន់លើការកែទម្រង់ការបោះឆ្នោត ដូចដែលថ្នាក់ដឹកនាំកំពូលគណបក្សប្រជាជនកម្ពុជា និងគណបក្សសង្គ្រោះជាតិបានព្រមព្រៀងគ្នា កាលពីកិច្ចប្រជុំចរចាថ្នាក់កំពូល កាលពីថ្ងៃទី១៦ និងទី១៧ ខែកញ្ញាកន្លងទៅ។
យ៉ាងណាក៏ដោយ ក្រុមការងារបច្ចេកទេសគណបក្សទាំងពីរ បានប្រកាសព្រមព្រៀងគ្នាថា នឹងជួបគ្នាម្តងទៀត នៅចុងសប្តាហ៍នេះ តែមិនទាន់កំណត់ថ្ងៃពិតប្រាកដនៅឡើយទេ៕
No comments:
Post a Comment
yes