តំណាងពលរដ្ឋខ្មែរកម្ពុជាក្រោម ស្នើឲ្យលោកនាយករដ្ឋមន្ត្រី ហ៊ុន សែន លើកយកបញ្ហានៃការរំលោភសិទ្ធិមនុស្សពីសំណាក់អាជ្ញាធរវៀតណាមមកលើពួកគេ ដែលជាម្ចាស់កំណើតប្រទេសនោះ ប្រាប់ទៅលោកនាយករដ្ឋមន្ត្រីវៀតណាម ដែលកំពុងបំពេញទស្សនកិច្ចនៅប្រទេសកម្ពុជា។
លិខិតរបស់លោក ថាច់ សេដ្ឋា ប្រធានសហគមន៍ខ្មែរកម្ពុជាក្រោម និងជាអតីតសមាជិកព្រឹទ្ធសភា គណបក្សសម រង្ស៊ី បានស្នើឲ្យដោះលែង ព្រះភិក្ខុ ថាច់ ធឿន លីវ នី ថាច់ ភូមិរិន្ទ និង ថាច់ វន្ថា ដែលត្រូវបានអាជ្ញាធរវៀតណាមកាត់ទោសពី២ដល់៦ឆ្នាំ។ បន្ថែមពីនោះ ក៏បានទាមទារឲ្យដោះលែង ពុទ្ធបរិស័ទ៤រូបទៀត ដែលអាជ្ញាធរវៀតណាមកាត់ទោសពី១០ខែទៅ១ឆ្នាំ ដោយសារតែគាំទ្រព្រះសង្ឃទាំងនោះ។
ក្រៅពីនោះ ប្រធានសហគមន៍ខ្មែរកម្ពុជាក្រោម ក៏ស្នើឲ្យវៀតណាមគោរពសិទ្ធិមនុស្ស ដោយអនុញ្ញាតិឲ្យពលរដ្ឋខ្មែរកម្ពុជាក្រោម បានរៀនសូត្រពីអក្សរសាស្ត្រខ្មែរដោយសេរី មានសិទ្ធិបង្កើតសមាគម និងសិទ្ធិនយោបាយជាដើម។
នាយករដ្ឋមន្ត្រីវៀតណាម លោក ង្វៀន តាន់យ៉ុង កំពុងបំពេញទស្សនកិច្ចនៅកម្ពុជារយៈពេល៣ថ្ងៃ ដើម្បីរិតចំណងសាមគ្គីភាពកម្ពុជា-វៀតណាមឲ្យកាន់តែខ្លាំងថែមទៀត ព្រមទាំងសម្ពោធមន្ទីរពេទ្យចារី ប្រចាំកម្ពុជា និងស្ពានឆ្លងកាត់ទន្លេបាសាក់ ក្នុងស្រកកោះធំ ខេត្តកណ្តាល៕
No comments:
Post a Comment
yes