ការបំបែករបស់ក្រុមសមត្ថកិច្ចទៅលើបាតុករនៅមុខក្រសួងព័ត៌មាន
(រូបថត ឡាយ សាមាន)
នារីម្នាក់នេះ រងរបួសដោយសារត្រូវគ្រាប់បែកផ្សែង / រូបថត ឡាយ សាមាន
ទីបំផុតទៅ សមត្ថកិច្ចរាជធានីភ្នំពេញប្រមាណ ៥០០នាក់ បានបង្ក្រាបទៅលើក្រុមបាតុកម្មរបស់លោកម៉ម សូណង់ដូ ប្រធានវិទ្យុសំបុកឃ្មុំ នៅមុខក្រសួងព័ត៌មាន ដោយប្រើខែល ដំបង និងបាញ់គ្រាប់បែកផ្សែងទៅលើហ្វូងបាតុករ។
នៅម៉ោងប្រមាណ ១០:០៨នាទីព្រឹកនេះ កម្លាំងសមត្ថកិច្ចប្រមាណ ១០០០នាក់ បានប្រើប្រាស់គ្រាប់បែកផ្សែងបាញ់ទៅលើក្រុមបាតុករ ដើម្បីបំបែកការតវ៉ារបស់ពួកគេនៅមុខក្រសួងព័ត៌មាន ក្នុងខណ្ឌដូនពេញ បណ្តាលឲ្យបាតុករខ្លះ ពុលគ្រាប់បែកផ្សែង។
នៅក្នុងការបង្ក្រាបនោះ ក៏មានក្រុមសន្តិសុខសាលាខណ្ឌដូនពេញ ដែលពាក់មួកការពារពណ៌ខ្មៅ បានចូលរួមបង្ក្រាប ដោយបានវាយបុរសម្នាក់ឈ្មោះ សុខ លី ជាអ្នករត់ម៉ូតូឌុប មកពីខេត្តកំពង់ចាម និងបុរសម្នាក់ទៀត បណ្តាលឲ្យរងរបួសក្បាល។ បើតាមអ្នកដែលឃើញហេតុការណ៍នេះ បុរសឈ្មោះ សុខ លី នោះ គ្រាន់តែជាអ្នករត់ម៉ូតូឌុបហើយឈប់ចតនៅក្បែរក្រសួងព័ត៌មាននោះ មិនមែនជាក្រុមបាតុករដែលចូលរួមបាតុកម្មជាមួយលោកម៉ម សូណង់ដូនោះទេ។ ចំណែកម៉ូតូរបស់លោក ក៏ត្រូវបានក្រុមសន្តិសុខទាំងនោះ វាយកម្ទេចផងដែរ។
ការបង្ក្រាបនេះ ធ្វើឡើងនៅពេលដែលក្រុមបាតុករប្រមាណ ៣០០០នាក់ ដែលដឹកនាំដោយលោកម៉ម សូណង់ដូ ប្រធានវិទ្យុសំបុកឃ្មុំ នៅម៉ោង៩:២០នាទីនេះ បានហែក្បួនពីស្ពាននាគ ក្បែរទីលានប្រជាធិបតេយ្យ ទៅកាន់ក្រសួងព័ត៌មាន ទាមទារបង្កើតហ្វ្រេកង់ ទូរទស្សន៍ និងដំឡើងកម្លាំងផ្សាយវិទ្យុសំបុកឃ្មុំបន្តទៅតាមខេត្ត៕
កែតម្រូវ៖ សមត្ថកិច្ចបំបែកបាតុករនៅខាងមុខក្រសួងព័ត៌មាននៅព្រឹកថ្ងៃចន្ទនេះ មានប្រមាណជា៥០០នាក់មិនមែន១០០០នាក់ ដូចការចុះផ្សាយលើកមុនទេ។
No comments:
Post a Comment
yes