ក្រុមប្រឹក្សាសិទ្ធិមនុស្សអង្គការសហប្រជាជាតិ នៅយប់ថ្ងៃអង្គារនេះ នឹងបើកកិច្ចប្រជុំលើកទី ១៨ ស្តីពីការត្រួតពិនិត្យសិទ្ធិមនុស្សជាសកល (Universal Periodic Review, UPR) ទៅលើប្រទេសចំនួន ១៤ ដែលក្នុងនោះក៏មានកម្ពុជាផងដែរ។
សេចក្តីប្រកាសព័ត៌មានរបស់ការិយាល័យឧត្តមស្នងការអង្គការសហប្រជាជាតិ ចុះថ្ងៃទី២៧ ខែមករានេះ ឲ្យដឹងថា កិច្ចប្រជុំ UPR វាយតម្លៃចំពោះស្ថានភាពសិទ្ធិមនុស្សនៅប្រទេសកម្ពុជា ដែលធ្វើឡើងដោយក្រុមការងារអង្គការសហប្រជាជាតិ (UN) និងរដ្ឋជាសមាជិក នឹងធ្វើឡើងនៅថ្ងៃទី២៨ ខែមករានេះ វេលាម៉ោង ២និង៣០នាទីរសៀល រហូតដល់ម៉ោង ៦ល្ងាច នៅទីក្រុងហ្សឺណែវ ប្រទេសស្វីស ដែលត្រូវនឹងម៉ោង ៨និង ៣០នាទីយប់ រហូតដល់ម៉ោង១២យប់ ម៉ោងនៅរាជធានីភ្នំពេញ។
UPR គឺជាដំណើរការមួយ ដែលរដ្ឋជាសមាជិកនៃអង្គការសហប្រជាជាតិ ត្រូវបានក្រុមប្រឹក្សាសិទ្ធិមនុស្សអង្គការសហប្រជាជាតិ វាយតម្លៃជាប្រចាំទៅតាមជុំ ពាក់ព័ន្ធនឹងស្ថានភាពសិទ្ធិមនុស្ស និងអនុសាសន៍របស់អង្គការសង្គមស៊ីវិលក្នុងប្រទេសនីមួយៗ ដែលមានរយៈពេល ៤ម៉ោង និង៣០នាទី។
សេចក្តីប្រកាសព័ត៌មាននេះបន្តថា ការត្រួតពិនិត្យសិទ្ធិមនុស្សជាសកល UPR នឹងវាយតម្លៃដោយផ្អែកលើរបាយការណ៍របស់រដ្ឋផ្តល់ជូនព័ត៌មាន ដែលUNចងក្រង រួមនឹងរបាយការណ៍សង្ខេបដែលដៃគូរពាក់ព័ន្ធ បានដាក់ជូន។ ក្នុងនោះ ប្រទេសជាសមាជិក ក៏នឹងដាក់ជាសំណួរជាមុន ដែលកម្ពុជា ត្រូវឆ្លើយតបជាលាយលក្ខអក្សរ ក្នុងសេចក្តីថ្លែងការណ៍របស់ខ្លួន។ ទន្ទឹមនឹងនេះ ព្រឹត្តិការណ៍ដែលកើតឡើងថ្មីៗនេះ ក៏នឹងត្រូវបានលើកមកពិនិត្យពិភាក្សាផងដែរ ក្នុងលក្ខខណ្ឌដែលកម្ពុជា មានកាតព្វកិច្ចជាសកលលើបញ្ហាសិទ្ធិមនុស្ស។
សម្រាប់ប្រទេសកម្ពុជា លោក ឱម យិនទៀង ប្រធានគណៈកម្មាធិការសិទ្ធិមនុស្សកម្ពុជា ឬអនុប្រធានរបស់លោក នឹងចូលរួមក្នុងកិច្ចប្រជុំនោះ រួមទាំងមន្ត្រីអង្គការសង្គមស៊ីវិលកម្ពុជាមួយចំនួន និងអ្នកស្រី ទេព វន្នី សកម្មជនដីធ្លីនៅបឹងកក់។ ចំណែកលោក សម រង្ស៊ី ប្រធានគណបក្សសង្គ្រោះជាតិ ក៏នឹងចូលរួមកិច្ចប្រជុំក្រុមប្រឹក្សាសិទ្ធិមនុស្សរបស់អង្គការសហប្រជាជាតិ និងស្តាប់របាយការណ៍ស្តីពីសិទ្ធិមនុស្សនៅកម្ពុជានេះផងដែរ។
ប្រទេសកម្ពុជា ត្រូវបានវាយតម្លៃដោយក្រុមការងារអង្គការសហប្រជាជាតិលើកដំបូង កាលពីថ្ងៃទី១ ខែធ្នូ ឆ្នាំ២០០៩ ដោយគ្រានោះUN បានផ្តល់អនុសាសន៍កែលម្អចំនួន ៩១ចំណុច ហើយរដ្ឋាភិបាល បានទទួលយក ដែលអនុសាសន៍ទាំងនោះ នឹងត្រូវវាយតម្លៃជាថ្មីដោយរដ្ឋជាសមាជិកUN ក្នុងកិច្ចប្រជុំលើកនេះផងដែរ។
កាលពីថ្ងៃចន្ទម្សិលមិញនេះ អង្គការសិទ្ធិមនុស្សអន្តរជាតិ (Human Rights Watch) បានចេញសេចក្តីថ្លែងការណ៍ ជំរុញឲ្យសមាជិកក្រុមប្រឹក្សាសិទ្ធិមនុស្សUN គួរតែថ្កោលទោសរដ្ឋាភិបាលកម្ពុជា ដោយសារការបរាជ័យក្នុងការសន្យាសារជាថ្មីក្នុងការធានាឲ្យមានការគោរព សិទ្ធិមនុស្ស។ ចំណែក សម្ព័ន្ធអង្គការសិទ្ធិមនុស្សចំនួន៤ ក៏បានចាត់ទុកថា នេះជាឱកាសមួយ ដែលសហគមន៍អន្តរជាតិ គប្បីលើកពិភាក្សាពីស្ថានភាពសិទ្ធិមនុស្សនៅកម្ពុជា ជាពិសេសវិធានការរបស់រដ្ឋាភិបាលកម្ពុជា ដែលបានធ្វើឡើងបំបិទសេរីភាពបញ្ចេញមតិរបស់សកម្មជន អ្នកការពារសិទ្ធិមនុស្ស និងអ្នកសារព័ត៌មាន ដែលហ៊ានចេញមុខរិះគន់៕
No comments:
Post a Comment
yes