ក្រុមមេធាវីការពារក្តីជនជាប់ចោទ២៣នាក់ ក្នុងហេតុការណ៍ប៉ះទង្គិចថ្ងៃទី២ និង៣ ខែមករា នៅព្រឹកថ្ងៃព្រហស្បតិ៍នេះ ដាក់ពាក្យទៅសាលាដំបូងរាជធានីភ្នំពេញ ស្នើសុំកូនក្តី ២២នាក់ទៀត ឲ្យនៅក្រៅឃុំ ក្នុងលក្ខខណ្ឌថែរក្សាសុខភាព។
ក្រុមមេធាវីប្រមាណ៧រូបនេះ មកពីមជ្ឈមណ្ឌលអប់រំច្បាប់សម្រាប់សហគមន៍ អង្គការការពារសិទ្ធិមនុស្សលីកាដូ សហភាពការងារកម្ពុជា និងសង្គមស៊ីវិលមួយចំនួនទៀត។
មេធាវីអង្គការលីកាដូ អ្នកស្រី សាម សុគន្ធា ឲ្យដឹងថា សំណើសុំនៅក្រៅឃុំដើម្បីថែរក្សាសុខភាពរបស់កូនក្តីទាំង២២រូបនេះ គឺតាមរយៈការផ្តល់អត្តសញ្ញាណច្បាស់លាស់ និងធានាថាកូនក្តីរបស់ខ្លួន មិនគេចវេស ក្នុងការចូលបំភ្លឺ តាមដីកាកោះរបស់តុលាការ។
VOD មិនទាន់អាចសុំការឆ្លើយតបពីចៅក្រមស៊ើបសួរ លោកស្រី សែម សក្តិកូឡា បាននៅឡើយទេ។
កាលពីថ្ងៃទី៩ ខែមករា មេធាវីការពារក្តីលោក វន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ ស្នើឲ្យទៅតុលាការឲ្យកូនក្តីរបស់ខ្លួននៅក្រៅឃុំ តែត្រូវបាន ចៅក្រមស៊ើបសួរ លោកស្រី សែម សក្តិកូឡា សម្រេចមិនព្រមដោះលែងនៅថ្ងៃបន្ទាប់ ដោយអះអាងថា ការស៊ើបសួរទើបចាប់ផ្តើម ហើយការដោះលែងអាចនាំឲ្យប៉ះពាល់ដល់ដំណើរការស៊ើបសួររបស់តុលាការ។ ប៉ុន្តែ ដីកានេះ ត្រូវបានមេធាវីលោក វន់ ពៅ ប្តឹងប្រឆាំងទៅឧទ្ធរណ៍ ថាប៉ះពាល់ដល់សិទ្ធិសេរីភាពរបស់ជនជាប់ចោទ ដោយសារលោក វន់ ពៅ មានជំងឺប្រចាំកាយ និងសុខភាពមិនល្អ។
ក្នុងជំនួបជាមួយលោកនាយករដ្ឋមន្ត្រី ហ៊ុន សែន កាលពីថ្ងៃពុធ អ្នករាយការណ៍ពិសេសអង្គការសហប្រជាជាតិ ទទួលបន្ទុកសិទ្ធិមនុស្ស លោក សុរិយា ស៊ូប៊ែឌី បានលើការព្រួយបារម្ភអំពីបញ្ហាបច្ចុប្បន្នភាពថ្មីៗចុងក្រោយនេះ ចំពោះការប៉ះទង្គិចហិង្សា ជាបន្តបន្ទាប់រវាងសមត្ថកិច្ច និងក្រុមអ្នកតវ៉ា ដែលបណ្តាលឲ្យសមត្ថកិច្ចមួយចំនួនរងរបួស កម្មករយ៉ាងតិច៥នាក់ ត្រូវបានបាញ់សម្លាប់ ជាង៤០នាក់រងរបួស និង២៣នាក់ត្រូវបានសមត្ថកិច្ចចាប់ខ្លួន។
មន្ត្រីកម្មវិធីសិទ្ធិការងាររបស់មជ្ឈមណ្ឌលអប់រំច្បាប់សម្រាប់សហគមន៍ លោក មឿន តុលា យល់ថា ជំនួបនេះ អាចជាផ្នែកមួយជំរុញឲ្យប្រព័ន្ធតុលាការ ពិចារណាលើការស្នើសុំនេះ មិនស្ថិតក្រោមសម្ពាធអ្នកនយោបាយ។
ក្នុងហេតុការណ៍ប៉ះទង្គិចគ្នារវាងសមត្ថកិច្ច និងកម្មករ កាលពីថ្ងៃទី២ ខែមករា នៅតំបន់សេដ្ឋកិច្ចពិសេសភ្នំពេញ ខាងមុខរោងចក្រយ៉ាកជីង មនុស្ស១០នាក់ ត្រូវបានសមត្ថកិច្ចចាប់ខ្លួន និងចោទប្រកាន់ពីបទហិង្សាដោយចេតនា និងបំផ្លិចបំផ្លាញទ្រព្យសម្បត្តិអ្នកដទៃ។ ចំណែកថ្ងៃទី៣ ខែមករា ការប៉ះទង្គិចដូចគ្នា នៅមុខសួនឧស្សាហកម្មកាណាឌីយ៉ា បានបណ្តាលឲ្យកម្មករ៥នាក់ស្លាប់ ១៣នាក់ទៀត ត្រូវបានចាប់ខ្លួនទៅឃុំនៅមណ្ឌលអប់រំកែប្រែម៣ ក្នុងខេត្តកំពង់ចាម៕
No comments:
Post a Comment
yes