បុរសម្នាក់ក្នុងចំណោមអ្នកផ្សេងមួយចំនួនទៀត រងរបួសក្នុងពេល
កម្លាំងអាជ្ញាធរបង្ក្រាបការតវ៉ារបស់ក្រុមបាតុករលោក ម៉ម សូណង់ដូ
នៅខាងមុខក្រសួងព័ត៌មាននៅព្រឹកថ្ងៃ២៧ មករា ឆ្នាំ២០១៤
ក្រុមបាតុករប្រមាណ ៧នាក់ រងបួសក្នុងពេលប៉ះទង្គិចជាមួយកងកម្លាំងសន្តិសុខនៅមុខក្រសួងព័ត៌មាន នៅព្រឹកថ្ងៃទី២៧ ខែមករា។
មន្ត្រីស៊ើបអង្កេតជាន់ខ្ពស់នៃអង្គការលីកាដូ (Licadho) លោក អំ សំអាត ដែលបានតាមដានសកម្មភាពបាតុកម្មនេះ ឲ្យដឹងថា អ្នករងរបួសទាំងនោះភាគច្រើនត្រូវរបួសក្បាលនឹងដងខ្លួន ដោយកងសន្តិសុខវាយក្នុងនោះមានទាំងព្រះសង្ឃផង។ ចំណែកលោក ម៉ម សូណងដូ អ្នកដឹកនាំបាតុកម្មបានគេចខ្លួនដោយសុវត្ថិភាព។
កងកម្លាំងសន្តិសុខបានបំបែកក្រុមបាតុករ ដោយប្រើដំបងឆក់និងបាញ់ក្រាប់បែកឧស្ម័នបង្ហូរទឹកភ្នែកដាក់ក្រុមបាតុករតវ៉ាបិទផ្លូវព្រះមុនីវង្ស អស់រយៈប្រហែលមួយម៉ោង នៅមុខក្រសួងព័ត៌មាន នៅព្រឹកថ្ងៃទី២៧ មករា។ ផ្លូវព្រះមុនីវង្ស បានបើកឲ្យចរាចរណ៍ឡើងវិញ បន្ទាប់ពីក្រុមសមត្ថកិច្ចបានបំបែកក្រុមបាតុករនៅម៉ោងប្រហែល ១០ព្រឹកថ្ងៃនេះ។
បាតុកម្មដឹកនាំដោយប្រធានវិទ្យុសំបុកឃ្មុំ លោក ម៉ម សូណង់ដូ ធ្វើឡើងដើម្បីទាមទារបើកស្ថានីយវិទ្យុផ្សាយបន្តតាមខេត្តនានា និងសុំបើកប៉ុស្តិ៍ទូរទស្សន៍មួយ ដែលលោកបានព្យាយាមសុំច្បាប់ ១៥ឆ្នាំហើយតែមិនបានសម្រេច។
No comments:
Post a Comment
yes