ដោយ សេង សេរីរ័ត្ន
ពលរដ្ឋនៅខេត្តកំពតដែលកំពុងមានជម្លោះដីធ្លីជាមួយក្រុមហ៊ុន សូ ងួន នោះកំពុងរង់ចាំដំណោះស្រាយពីអាជ្ញាធរ និងការបែងចែកដីសម្បទានសេដ្ឋកិច្ចនៅក្នុងសហគមន៍ ទៅតាមគោលការណ៍របស់លោកនាយករដ្ឋមន្ត្រី ហ៊ុន សែន។
ការរង់ចាំនេះ ក្រោយពីប្រជាពលរដ្ឋខេត្តកំពត មានប្រតិកម្មទៅលើក្រុមហ៊ុន សូ ងួន ដែលឈូសឆាយលើដីរបស់ពួកគាត់នោះ។
អ្នកស្រី ស្រី គីម ដែលជាអ្នកភូមិម្នាក់ក្នុងចំណោមអ្នកភូមិប្រមាណជាង១០០គ្រួសារ ក្នុងចំណោមពលរដ្ឋជាង៣០០គ្រួសារ នៅភូមិភ្នំកូនឆ្កែ ឃុំព្រៃព្រាយ ស្រុកឈូក ខេត្តកំពត ដែលត្រូវបានក្រុមហ៊ុនរបស់លោកឧកញ៉ា សូ ងួន ឈូសឆាយដី បានអោយដឹងថា គ្រឿងចក្ររបស់ក្រុមហ៊ុនលោក សូ ងួន បានយកទៅឈូសឆាយនៅលើដីរបស់គាត់នៅថ្ងៃទី២២ មិថុនា ប៉ុន្តែត្រូវបានក្រុមអ្នកភូមិទៅឃាត់អោយបញ្ឈប់ការឈូសឆាយជាបន្ត។
អ្នកស្រីបន្តទៀតថា បន្ទាប់មកត្រូវបានអាជ្ញាធរខេត្តចុះសន្យាជាមួយប្រជាពលរដ្ឋថានឹងធ្វើការរៀបចំបែងចែកដីធ្លីអោយពលរដ្ឋតាមគោលការណ៍របស់លោកនាយករដ្ឋមន្ត្រី ហ៊ុន សែន បានប្រកាសថាកាត់ជូនពលរដ្ឋនៅកន្លែងនោះ។
អ្នកស្រី ស្រី គីម៖ «ទាមទារចង់បាន ឧទាហរណ៍ដីខ្ញុំធ្វើស្រែក្នុងរយៈពេល៥ឆ្នាំ ក្នុងមួយម្នាក់ៗហ្នឹង ហើយដល់ពេលមានបញ្ហាថាឈូសឆាយអញ្ចឹង ពួកខ្ញុំមានការបារម្ភ នាំគ្នាទៅឃាត់អញ្ចឹង ចង់បានឲ្យពិតប្រាកដ ឲ្យបានរាជរដ្ឋាភិបាលចេញប័ណ្ណកម្មសិទ្ធិឲ្យដូចគោលការណ៍របស់សម្ដេចនាយកហ្នឹង។ អាហ្នឹង ខ្ញុំត្រេកអរឲ្យធ្វើតាមអញ្ចឹង ប៉ុន្តែបំណងចិត្តប្រជាជន ចង់បានតែប៉ុណ្ណឹង»។
ដោយឡែកលោកឧកញ៉ា សូ ងួន បានច្រានចោលការចោទប្រកាន់ថា ក្រុមហ៊ុនរបស់លោកទៅឈូសឆាយដីរបស់ប្រជាពលរដ្ឋនៅតំបន់ភូមិភ្នំកូនឆែ្ក លោកថា លោកបានបែងចែកដីអោយប្រជាពលរដ្ឋនៅតំបន់នោះអស់ជាច្រើនហើយ។
លោកឧកញ៉ា សូ ងួន៖ «ឧបមាថាផ្ទះគាត់ គិតទៅមានតែ១ពាន់ម៉ែត្រការ៉េ ខ្ញុំឲ្យគាត់ថែមកន្លះហិកតារអញ្ចឹងទៀតទៅ។ គាត់សុទ្ធផ្ដិតមេដៃអោយ ប្រជាជននៅហ្នឹង។ អាហ្នឹងចំពោះដីដែលខ្ញុំអត់កាត់៣ពាន់កម្មសិទ្ធិអោយគាត់ទេឃើញទេ នេះនៅក្នុងផ្ទៃដីសម្បទាន អាចែកអោយថាគាត់អត់មាន មានតែផ្ទះហើយអត់មានដាំដំណាំអត់មានអីណា»។
សម្រាប់អ្នកសម្របសម្រួលសមាគមន៍ការពារសិទ្ធិមនុស្ស អាដហុក (Adhoc) ប្រចាំខេត្តកំពត អ្នកស្រី ទ្រី ឈូន បានហៅការអនុវត្តន៍ក្នុងការឈូសឆាយដីស្រែរបស់ពលរដ្ឋ និងបែងចែកដីរបស់ក្រុមហ៊ុនលោកឧកញ៉ា សូ ងួន នេះថា ធ្វើឡើងដោយគ្រាន់តែបន្លំ និងបិទបាំងពីសកម្មភាពនៃការទន្ទ្រានយកដីពលរដ្ឋ ខណៈដែលវិវាទក្នុងជម្លោះដីធ្លីនេះ កំពុងបន្តផ្ទុះស្ទើរគ្រប់តំបន់ក្នុងឃុំព្រៃព្រាយ នេះនៅឡើយនោះ។
អ្នកស្រី ទ្រី ឈូន៖ «ដែលតំបន់ទំនាស់ហ្នឹង មិនមែនមានតែមួយហ្នឹងទេ ជាមួយក្រុមហ៊ុនតែមួយហ្នឹង។ ប៉ុន្តែ ចំណាត់ការរបស់អភិបាលខេត្តទៅតែមួយកន្លែង។ ដោយឡែក យើងឃើញនៅកន្លែងផ្សេងទៀត នៅក្រុមហ៊ុនដដែល គេហៅថាចំណុចភ្នំកូនឆែ្ក ក្រុមហ៊ុនកំពុងរំលោភដោយគ្រឿងចក្រទៅលើដីប្រជាពលរដ្ឋ ដីស្រែ ដីចម្ការរបស់ប្រជាពលរដ្ឋទៅវិញ ហើយសកម្មភាពនេះធ្វើឡើងពេញលេញនៅម្សិលមិញ»។
កាលពីពេលថ្មីៗកន្លងទៅនេះ លោកនាយករដ្ឋមន្ត្រី ហ៊ុន សែន បានកំណត់គោលការណ៍ក្នុងការបែងចែកដីសម្បទានសង្គមកិច្ចឲ្យពលរដ្ឋក្រោម៥ហិកតារចុះក្នុងមួយគ្រួសារ។
ទាក់ទិនបញ្ហានេះ អភិបាលខេត្តកំពត គឺលោក ខូយ ឃុនហួរ មានប្រសាសន៍នៅថ្ងៃទី២៣ មិថុនា នេះថា កំពុងមានការរៀបចំ និងពិនិត្យមើលដីសារឡើងវិញ សម្រាប់ការបែងចែកដីសម្បទានសង្គមកិច្ចដល់ពលរដ្ឋដែលរងផលប៉ះពាល់នេះ គឺធ្វើឡើងដោយមិនមានភាពលាក់លៀម សុក្រឹត និងអនុវត្តទៅតាមគោលការណ៍ស្មើភាពគ្នា និងមិនមានក្រុមហ៊ុនណាឈូសឆាយនៅក្នុងតំបន់នោះទេ។
លោក ខូយ ឃុនហួរ៖ «អត់មានឲ្យក្រុមហ៊ុនណាឈូសឆាយទេ ខ្ញុំអោយផ្អាកទាំងអស់។ ក្រុមហ៊ុន ក៏អត់ឲ្យឈូសឆាយ។ ប្រជាជនណាដែលគាត់ធ្វើហើយធ្វើទៅ ប៉ុន្តែអ្វីដែលថ្មីចាំបន្តិច ចាំយើងរៀបចំស្រួលចាំនេះ កុំអោយទៅកាប់ព្រៃផ្ដេសផ្ដាសទៀត»។
នៅបន្ទាប់ពីកិច្ចប្រជុំពេញអង្គគណៈរដ្ឋមន្ត្រីកាលពីថ្ងៃទី២៧ ខែមេសា ឆ្នាំ២០១២ លោកនាយករដ្ឋមន្ត្រី ហ៊ុន សែន បានចុះហត្ថលេខាលើបទបញ្ជាស្តីពីវិធានការពង្រឹង និងបង្កើនប្រសិទ្ធភាព នៃការគ្រប់គ្រងដីសម្បទានសេដ្ឋកិច្ច កាលពីថ្ងៃទី៧ ខែឧសភា ឆ្នាំ២០១២។
ប្រមុខរដ្ឋាភិបាលបានដាក់ចេញនូវគោលការណ៍៤ចំណុច ក្នុងនោះ៖
១-ផ្អាកបណ្ដោះអាសន្នការផ្តល់ដីសម្បទានសេដ្ឋកិច្ច
២-ក្រសួង ស្ថាប័ន និងអាជ្ញាធរដែលមានសមត្ថកិច្ចពាក់ព័ន្ធ ត្រូវអនុវត្តឲ្យមានប្រសិទ្ធភាព
៣-ចំពោះក្រុមហ៊ុនដែលបានគោលការណ៍អនុញ្ញាតពីរាជរដ្ឋាភិបាលរួចហើយ តែមិនបានអនុវត្តតាមនីតិវិធីច្បាប់ជាធរមាន នឹងត្រូវដកហូតមកវិញ និងដាក់ឲ្យស្ថិតនៅក្រោមការគ្រប់គ្រងរបស់រដ្ឋ ដោយផ្ទាល់
៤-ចំពោះសម្បទានដីសេដ្ឋកិច្ចដែលទទួលការអនុញ្ញាតជាគោលការណ៍ពីរាជរដ្ឋាភិបាលមុនចេញបទបញ្ជានេះ ត្រូវអនុវត្តតាមគោលការណ៍ច្បាប់ និងនីតិវិធីជាធរមាន៕
No comments:
Post a Comment
yes