នៅថ្ងៃសុក្រទី១៧ ខែសីហា នេះ តំណាងរាស្ត្រមួយក្រុមនៃគណបក្ស សម រង្ស៊ី ចូលសួរសុខទុក្ខលោក ម៉ម សូណង់ដូ នាយកវិទ្យុសំបុកឃ្មុំ និងជាប្រធានសមាគមអ្នកប្រជាធិបតេយ្យ ដែលកំពុងជាប់ឃុំនៅពន្ធនាគារព្រៃស។
អ្នកស្រី មូរ សុខហួរ តំណាងរាស្ត្រគណបក្ស សម រង្ស៊ី និងសមាជិកនៃសមាគមអ្នកប្រជាធិបតេយ្យ ចូលរួមក្នុងពិធីបួងសួងសុំឲ្យលោក ម៉ម សូណង់ដូ ឆាប់ជាសះស្បើយ និងឆាប់រួចពីការឃុំឃាំង នាវត្តអង្គមេត្រី កាលពីថ្ងៃទី១៧ ខែសីហា ឆ្នាំ២០១២។
ទន្ទឹមគ្នានេះដែរ សមាជិកជិត៣០០នាក់ នៃសមាគមនេះ រួមនិងប្រជាពលរដ្ឋអ្នកគាំទ្រលោក ក៏បាននាំគ្នាប្រារព្ធពិធីមួយ នៅវត្តអង្គមេត្រីដែលឋិតនៅជាប់នឹងគុកព្រៃស នោះ ដើម្បីបួងសួងសុំអោយលោក ម៉ម សូណង់ដូ ឆាប់បានជាសះស្បើយពីជំងឺ ដែលលោកកំពុងមាន និងអោយលោកបានឆាប់រួចពីការឃុំឃាំង។
នាយកវិទ្យុសំបុកឃ្មុំ ដែលគេចាត់ទុកថាជាវិទ្យុឯករាជ្យមួយនៅកម្ពុជា ត្រូវបានឆ្មាំគុកពីរនាក់នាំមកជួបតំណាងរាស្ត្រគណបក្ស សម រង្ស៊ី ដែលកំពុងអង្គុយចាំនៅតូបមួយក្នុងបរិវេណគុកព្រៃស។
លោកបង្ហាញទឹកមុខរីករាយណាស់ពេលដែលបានជួបអ្នកមកសួរសុខទុក្ខ។ លោកមានប្រសាសន៍ថា លោកចង់ពាក់ក្រវ៉ាត់កដែរ តែថាលោកដូរចិត្តវិញ ត្បិតក្រវ៉ាត់កធ្វើអោយលោកកាន់តែថប់ដង្ហើមណាស់។ លោកបន្តថា លោកមានជំងឺរាគពីរ បីថ្ងៃហើយ។
អ្នកស្រី មូ សុខហួរ ដែលជាប្រធានគណៈប្រតិភូក្រុមតំណាងរាស្ត្រគណបក្ស សម រង្ស៊ី ដែលបានទៅសួរសុខទុក្ខលោក ម៉ម សូណង់ដូ រៀបរាប់បន្ថែមពីស្ថានភាពរបស់លោក៖ «ខ្ញុំឃើញសុខភាពរបស់គាត់ទ្រុឌទ្រោមណាស់ គាត់ក៏បានសម្ដែងនូវការហត់ នូវការលំបាកនៅក្នុងរាងកាយ ដោយសារទទួលទានអាហារអត់មានអនាម័យ។ គាត់បានសុំ ហើយខ្ញុំយល់ឃើញថា គួរតែគាំទ្រដែរ។ ខ្ញុំគាំទ្រថា គាត់នឹងសុំឲ្យមានការចេញមួយរយៈ ដើម្បីចូលទៅព្យាបាលនៅឯមន្ទីរពេទ្យក្រៅពីកន្លែងពន្ធនាគារ។ ខ្ញុំយល់ឃើញថា គួរតែមានការយោគយល់ទៅដល់សភាពការណ៍ជាក់ស្តែងរបស់គាត់»។
លោក ម៉ម សូណង់ដូ ត្រូវបានអាជ្ញាធរចាប់ខ្លួនពីបទចោទប្រកាន់ថា លោកបានដឹកនាំបង្កើតតំបន់អបគមន៍។ ការចោទប្រកាន់នេះ ត្រូវបានលោក ម៉ម សូណង់ដូ ប្រកែក។
នៅក្នុងការជួបសួរសុខទុក្ខនៅព្រឹកថ្ងៃសុក្រ ទី១៧ សីហា នេះ លោកមានប្រសាសន៍ថា លោកមិនដែលបានចូលរួមក្នុងចលនានេះទេ ហើយថា កិច្ចការចម្បងរបស់លោក គឺខិតខំរកថវិកាដើម្បីទ្រទ្រង់ការផ្សាយវិទ្យុសំបុកឃ្មុំ ដើម្បីជួយជំរុញដំណើរការលទ្ធិប្រជាធិបតេយ្យនៅកម្ពុជា។
លោកមានប្រសាសន៍ទាំងខ្សឹកខ្សួលថា ប្រសិនបើលោកនៅជាប់ពន្ធនាគារយូរ លោកមានការព្រួយបារម្ភអំពីដំណើរការស្ថានីយវិទ្យុរបស់លោក។ អ្នកស្រី មូរ សុខហួរ ក៏ព្រួយបារម្ភពីអនាគតនៃវិទ្យុសំបុកឃ្មុំ និងសេរីភាពបញ្ចេញមតិដែរ៖ «ច្បាស់ហើយ បើសិនជាប្រធានវិទ្យុមួយទាំងមូលនៅពន្ធនាគារទៅហើយ ហើយប្រជារាស្ត្រលោករាប់លាននាក់លោកមានការសង្ឃឹមទៅលើវិទ្យុហ្នឹង តើសេរីភាពនៃការបញ្ចេញមតិនៅឯណា? ប្រធាននៃស្ថានីយវិទ្យុក្តី ទូរទស្សន៍ក្តីទាំងមូល គឺជាអ្នកគ្រប់គ្រងស្ថានីយនៃកម្មវិធីទាំងមូល។ ហើយម៉្យាងទៀត បើយើងគិតអំពីថវិកា តើអ្នកណាទ្រទ្រង់? ដូច្នេះ ពួកខ្ញុំឮសូរភ្លាម ខ្ញុំត្រូវតែរួមគំនិតជាមួយនឹងអ្នកតំណាងរាស្ត្រដទៃទៀត ពីព្រោះមានអង្គការក្រៅរដ្ឋាភិបាលក្នុងប្រទេស និងក្រៅប្រទេស ដែលគេអាចជួយបានក្នុងការការពារឲ្យវិទ្យុសំបុកឃ្មុំហ្នឹង ឲ្យនៅតែបន្តដដែល មានគុណភាពរឹតតែល្អជាងមុន ហើយផ្សព្វផ្សាយរឹតតែខ្លាំងជាងមុន»។
ទោះជាអ្នកស្រីមានសង្ឃឹមថា អ្នកស្រីនឹងខិតខំរកជំនួយទ្រទ្រង់វិទ្យុនេះ ខណៈដែលលោក ម៉ម សូណង់ដូ កំពុងជាប់ឃុំឃាំងក៏ដោយ។ អ្នកស្រីគិតថា ការឃុំខ្លួនលោក ម៉ម សូណង់ដូ ជាការឃុំឃាំងសេរីភាពបញ្ចេញមតិនៅកម្ពុជា៖ «មួយថ្ងៃ មួយវិនាទី ដែលលោក ម៉ម សូណង់ដូ ជាប់នៅក្នុងពន្ធនាគារជាមួយវិនាទីនៃការបិទសេរីភាពរបស់គាត់ ដែលជាសេរីភាពនៅក្នុងការបញ្ចេញមតិសេរីភាពរស់ជាមនុស្ស រស់ដោយភាពថ្លៃថ្នូរ ហើយនិងសេរីភាពនៅក្នុងការចូលរួមកសាងប្រទេសជាតិ។ លោក ម៉ម សូណង់ដូ បានចូលរួមនៅក្នុងការកសាងប្រទេសជាតិ សូមឲ្យលោកមានសេរីភាព»។
នៅឯក្រៅបរិវេណគុក គឺនៅក្នុងវត្តអង្គមេត្រី ឯណេះវិញ អ្នកគាំទ្រលោកក៏បានបួងសួងសុំអោយលោកឆាប់បានជាសះស្បើយ និងឆាប់រួចពីការឃុំឃាំង។ អគ្គលេខាធិការរបស់សមាគមន៍អ្នកប្រជាធិបតេយ្យ អ្នកស្រី ហួន ផាន់ណារី មានប្រសាសន៍ថា អ្នកស្រីបួងសួងអោយលោក ម៉ម សូណង់ដូ ឆាប់ជាផង និងអោយលោកឆាប់បានចេញពីការឃុំឃាំងផង ដើម្បីអោយលោកអនុវត្តនូវក្តីស្រមៃរបស់លោកផង នោះគឺការចង់ចូលរួមចំណែកអោយសង្គមខ្មែរមានលទ្ធិប្រជាធិបតេយ្យពិតប្រាកដ៖ «ពួកខ្ញុំនាំគ្នាមកបួងសួងហ្នឹង ដើម្បីសុំសេចក្តីសុខ និងសុំឲ្យគាត់បានជាសះស្បើយពីជំងឺរោគាទាំងប៉ុន្មានដែលគាត់មាន»។
សមាជិកម្នាក់ទៀតនៃសមាគមន៍អ្នកប្រជាធិបតេយ្យ លោក ឆ័យ សិទ្ធិរិទ្ធី ដែលអះអាងថា ធ្លាប់ស្គាល់ និងធ្លាប់ធ្វើការជាមួយលោក ម៉ម សូណង់ដូ ជាងដប់ឆ្នាំហើយនោះ មានប្រសាសន៍ថា លោកមិនអាចទទួលយកការចោទប្រកាន់ទៅលើលោក ម៉ម សូណង់ដូ បានឡើយ៖ «រឿងអបគមន៍អីហ្នឹង គឺខ្ញុំអត់ទទួលស្គាល់ទេ អាបួនខបួនចំណុចហ្នឹង គឺគ្មានតែហ្មង ពីព្រោះខ្ញុំនៅធ្វើការជាមួយគាត់យូរហើយ ហើយខ្ញុំស្គាល់គាត់នេះដប់ពីរឆ្នាំហើយ ហើយមនុស្សល្អណាស់ ខ្ញុំត្រូវតែការពារខ្ញុំត្រូវតែគោរព»។
អ្នកស្រី មូរ សុខហួរ ចាត់ទុកថា ការចាប់ខ្លួនលោក ម៉ម សូណង់ដូ មិនត្រឹមត្រូវទេ។ អ្នកស្រីចោទប្រកាន់ថា រឿងទំនាស់នៅខេត្តក្រចេះ គឺរដ្ឋាភិបាលជាអ្នកបង្កើតឡើង ហើយគឺរដ្ឋាភិបាលខ្លួនឯងត្រូវតែដោះស្រាយ មិនត្រូវមកចាប់ខ្លួនលោក ម៉ម សូណង់ដូ ទេ៖ «ពីព្រោះរឿងហ្នឹង មែនទែនជារឿងដីធ្លីដែលរដ្ឋាភិបាលបានផ្តល់សម្បទាននៅឯក្រុមហ៊ុន រឿងនេះគួរតែរដ្ឋាភិបាលសើរើករណីខ្លួនឯងវិញ។ ខ្ញុំយល់ឃើញថា រឿងនេះមិនមែនជារឿងធម្មតាទេ ជារឿងធ្ងន់ធ្ងរណាស់»។
ខុសពីរដ្ឋាភិបាលដែលចោទលោក ម៉ម សូណង់ដូ ថាជាមេខ្លោងដឹកនាំចលនាអបគមន៍ អ្នកស្រី មូរ សុខហួរ ចាត់ទុកលោក ម៉ម សូណង់ដូរ ដូចជាវីរបុរស ជាជនស្នេហាជាតិ និងសុំអោយលោកនាយករដ្ឋមន្ត្រី ហ៊ុន សែន ដោះលែងលោកអោយមានសេរីភាព៖«គាត់ជាអ្នកស្នេហាជាតិ ជាវីរបុរសមួយដែលយើងត្រូវតែគោរព ខ្ញុំគោរពណាស់ ខ្ញុំសូមសម្ដេចនាយករដ្ឋមន្ត្រីមេត្តាពិចារណាគិតមើលសារឡើងវិញ មិនទាន់យឺតពេលទេ។ សម្ដេចនាយករដ្ឋមន្ត្រីគួរតែពិចារណាមើល ទុកឲ្យអ្នកស្នេហាជាតិទាំងអស់គ្នាការពារទឹកដីជាមួយនឹងសម្ដេច ប្រសើរជាងយកអ្នកស្នេហាជាតិដាក់ចូលពន្ធនាគារ»។
នេះជាលើកទីបីហើយ ដែលអាជ្ញាធរក្រុងភ្នំពេញ ចាប់ខ្លួនលោក ម៉ម សូណង់ដូ ប្រធានវិទ្យុសំបុកឃ្មុំដាក់គុកព្រៃស។ លើកទី១ គឺនៅឆ្នាំ២០០៣ អាជ្ញាធរបានចាប់ខ្លួនលោកពីបទចោទប្រកាន់ថា លោកជាអ្នកញុះញង់ឲ្យមានការធ្វើបាតុកម្មដ៏រំជើបរំជួលមួយ ដុតស្ថានទូតថៃ នៅកណ្ដាលទីក្រុងភ្នំពេញ។ លើកទី២ គឺនៅឆ្នាំ២០០៥ ទាក់ទងរឿងបទសម្ភាសន៍ជាមួយលោក ស៊ាន ប៉េងសែ ប្រធានគណៈកម្មាធិការព្រំដែនខ្មែរ ប្រចាំប្រទេសបារាំង ពាក់ព័ន្ធនឹងបូរណភាពទឹកដី រវាងប្រទេសកម្ពុជា និងប្រទេសវៀតណាម។ លើកទី៣នេះ គឺអាជ្ញាធរបានចាប់ខ្លួនលោក ម៉ម សូណង់ដូ ដោយចោទថាលោកមានបំណងបង្កើតរដ្ឋក្នុងរដ្ឋដើម្បីប្រឆាំងនឹងរដ្ឋាភិបាល៕
No comments:
Post a Comment
yes