កំពង់ឆ្នាំងៈត្រីជាច្រើនបានពុលងាប់អណ្តែតទឹកជាបន្តបន្ទាប់ នៅក្នុងតំបន់ឡូត៍នេសាទអភិរក្សមួយ នៃដៃបឹងទន្លេសាប ស្ថិតនៅក្នុងស្រុកកំពង់លែង។ មន្ត្រីជលផលសង្ស័យថា ត្រីងាប់នេះ ដោយសារពុលសារធាតុគីមី ដែលជនខិលខូច លាយជាមួយនឹងចំណី បាចឲ្យត្រីស៊ី ហើយពេលត្រីងាប់ស្រង់យកទៅលក់។
លោក ចាន់ យុត្ថា អគ្គលេខាធិការ អាជ្ញាធរទន្លេសាប និងជានាយកខុទ្ទកាល័យក្រសួងធនធានទឹក និងឧតុនិយម បានឲ្យដឹងថា លោកមិនទាន់ដឹងពីចំនួនត្រីងាប់ពិតប្រាកដទេ ហើយក្រុមការងាររបស់លោក កំពុងតែចុះទៅកន្លែងកើតហេតុដើម្បីធ្វើការសិក្សាស្រាវជ្រាវ រកមូលហេតុពិតប្រាកដ ដែលបណ្តាលឲ្យត្រីធម្មជាតិទាំងនោះងាប់។ ប៉ុន្តែជំហានបឋម លោកសង្ស័យថា ត្រីទាំងនោះងាប់ដោយការពុលសារធាតុគីមី ឬដោយសារពុលទឹកស្អុយ។
លោកចាន់ យុត្ថាមានប្រសាសន៍បញ្ជាក់ថា៖«យើងបានទទួលព័ត៌មានថា មានជនឱកាសនិយម បាចចំណីដែលមានលាយជាតិគីមីឲ្យត្រីស៊ី។ តែយើងក៏សង្ស័យដែរថា ត្រីវាពុលទឹកស្អុយ ដែលស្លឹកឈើ ស្មៅនិងរុក្ខជាតិនានារលួយធ្វើឲ្យក្នុងទឹកខ្វះជាតិអុកស៊ីសែន»។
លោកសេង ប៊ុនឈឿន នាយរងខណ្ឌរដ្ឋបាលជលផល ខេត្ត បានឲ្យដឹងថា ត្រីដែលងាប់នោះ ស្ថិតនៅក្នុងតំបន់ឡូត៍អភិរក្ស របស់ខេត្ត ដែលមានទីតាំង ស្ថិតក្នុងភូមិស្លត ឃុំផ្លូវទូកស្រុកកំពង់លែង។ ក្រុមការងារលោកបានចុះទៅកន្លែងកើតហេតុ កាលពីព្រឹកថ្ងៃព្រហស្បតិ៍ ហើយបានប្រមូលត្រីដែលងាប់អណ្តែតទឹក ត្រីដែលកំពុងតែពុល និងទឹកនៅកន្លែងនោះ បញ្ជូនមកធ្វើការពិសោធនៅជលផលរាជធានីភ្នំពេញ ដើម្បីរកមូលហេតុនៃការងាប់នោះ។
លោកថ្លែងថា៖«ត្រីងាប់នៅផ្ទៃទឹកស្អុយ ដែលមានព្រៃនិងស្មៅទំហំប្រហែលជា១ គីឡូម៉ែត្របួនជ្រុង នៃតំបន់អភិរក្សសរុបជាង ២ ពាន់ហិកតា។ យើងបានពិនិត្យមើលពោះត្រីដែលងាប់នោះ ប៉ុន្តែមិនមានឃើញចំណីឬកន្ទក់ ដែលគួរឲ្យសង្ស័យនោះទេ»។
លោកពុំ សុផល នាយជលផល សង្កាត់កំពង់លែង បានឲ្យដឹងថា ត្រីដែលងាប់នោះ ជាប្រភេទត្រីរៀល និងត្រីលិញ ដែលចាប់ផ្តើមងាប់តាំងពីថ្ងៃចន្ទមក ហើយមានប្រជានេសាទប្រហែល ២៥ នាក់ កំពុងតែដួសត្រី ដែលងាប់នោះ យកទៅលក់នៅលើទីផ្សារ និងមួយចំនួនទៀត ធ្វើជាម្ហូបហូបខ្លួនឯង។ ក្នុងទូកនេសាទនីមួយៗ មានត្រីងាប់នោះចន្លោះពី ៣០ ទៅ៤០គីឡូក្រាម។ លោកបញ្ជាក់ថា៖ «ពលរដ្ឋបានហូបត្រីនោះ ប៉ុន្តែគ្មានឮថា អ្នកណាម្នាក់ពុលនោះទេ»៕
No comments:
Post a Comment
yes