ការលុបចោលគម្រោងទៅចូលរួមប្រជុំមហាសន្និបាតអង្គការសហប្រជាជាតិរបស់នាយករដ្ឋមន្រ្តីខ្មែរ ហ៊ុន សែន ត្រូវបានប្រកាសឲ្យដឹងពីមូលហេតុហើយ។ នោះគឺដោយសារតែឪពុករបស់លោកនាយករដ្ឋមន្រ្តី គឺលោក ហ៊ុន នាង ដែលមានវ័យ៩១ឆ្នាំកំពុងមានជំងឺ។
នាយករដ្ឋមន្រ្តីខ្មែរ ហ៊ុន សែន
លោក ហ៊ុន សែន បាននិយាយកាលពីថ្ងៃសុក្រ ក្នុងពិធីចែកប័ណ្ណកម្មសិទ្ធិដីធ្លីដល់ប្រជាពលរដ្ឋក្នុងស្រុកស្នួល ខេត្តក្រចេះថា «ខ្ញុំត្រូវចេញទៅបូរីញូវយ៉កនៅថ្ងៃទី២៥ ខែកញ្ញា ប៉ុន្តែខ្ញុំត្រូវលុបចោលវិញ ដោយសារតែជំងឺឪពុករបស់ខ្ញុំ ដែលគាត់បានយំរកខ្ញុំមួយសប្តាហ៍មកហើយ នៅពេលខ្ញុំចេញទៅប្រទេសអ៊ីរ៉ង់ និងចិនសម្រាប់កិច្ចប្រជុំចលនាមិនចូលបក្សសម្ព័ន្ធ។ គាត់បានឱបដៃខ្ញុំ ហើយបានស្រែកយំដូចជាកូនក្មេង»។
លោក ហ៊ុន សែន បន្តថា លោកមានពេលច្រើនទៀតដើម្បីទៅប្រជុំនៅអង្គការសហប្រជាជាតិ ប៉ុន្តែលោកមានឪពុកតែម្នាក់ប៉ុណ្ណោះ។
តាមសេចក្តីប្រកាសព័ត៌មានរបស់ក្រសួងការបរទេសកម្ពុជា លោក ហោ ណាំហុង ត្រូវបានគេប្រគល់តួនាទីតំណាងឲ្យនាយករដ្ឋមន្រ្តី ហ៊ុន សែន ក្នុងការដឹកនាំគណៈប្រតិភូទៅចូលរួមកិច្ចប្រជុំលើកទី៦៧ នៃមហាសន្និបាតអង្គការសហប្រជាជាតិ នៅទីក្រុងញូយ៉ក សហរដ្ឋអាមេរិក ចាប់ពីថ្ងៃទី២៥ កញ្ញា រហូតដល់ថ្ងៃទី០៤ ខែតុលា ឆ្នាំ២០១២៕
No comments:
Post a Comment
yes