ខេត្ដក្រចេះ ៖ ប្រមាណជាង១សប្ដាហ៍នេះ ឈ្មួញ គន្ធា ដែលគេដឹងថាជាជើង ខ្លាំង១រូបក្នុងការដឹកឈើប្រណីតប្រភេទ បេង ធ្នង់ និងឈើគ្រញូង ចេញពីខេត្ដស្ទឹងត្រែងមកចែកចាយនៅខេត្ដក្រចេះ បានដឹកឈើមិនតិចជាង៤ទៅ៥ទូកអេវ ហើយក្នុង១ទូកមានពី២៥ទៅ៣០ម៉ែត្រគូប យកមកទម្លាក់ក្នុងទឹកដីស្រុកសំបូរ ខេត្ដក្រចេះ ស្របពេលដែលទឹកទន្លេមេគង្គកំពុងឡើង ។
ការដឹកជញ្ជូនឈើរបស់ឈ្មួញ គន្ធា តាមទូកកាន់តែមានឱកាស បន្ទាប់ពីរដ្ឋបាលព្រៃឈើខេត្ដស្ទឹងត្រែង និងខេត្ដក្រចេះ រួមទាំងសមត្ថកិច្ចពាក់ព័ន្ធមួយ ចំនួនទៀតកំពុងទទួលបានផលប្រយោជន៍ ពីបទល្មើសដឹកឈើខុសច្បាប់នេះ ។
កាលពីយប់ថ្ងៃទី២៣ខែកញ្ញាឆ្នាំ២០១២ ទូកអេវ១គ្រឿងរបស់ឈ្មួញ គន្ធា ដឹកឈើធ្នង់មកកាន់ស្រុកសំបូរ ក្នុងនោះគេបានឃើញវត្ដមានរបស់រដ្ឋបាលព្រៃឈើ សមត្ថកិច្ច ត្រូវបានឈ្មួញ គន្ធា ចាត់ បែងចែកដើម្បីបន្ដលក់ចែកចាយឈើ ប្រណីតទាំងនេះនៅក្នុងស្រុកសំបូរ និង ដឹកតាមរថយន្ដមកកាន់ខេត្ដក្រចេះ ដើម្បីឱ្យឈ្មួញធំៗនៅខេត្ដក្រចេះដឹកយក ទៅកាន់ប្រទេសវៀតណាមនេះជាដើម ។
បើទោះជាមានការដឹកជញ្ជូនឈើតាម ទូរសក្នុងទ្រង់ទ្រាយធំ ប៉ុន្ដែចំពោះរដ្ឋបាល ព្រៃឈើខេត្ដស្ទឹងត្រែង និងខេត្ដក្រចេះ ហាក់ដូចជាពុំបានទទួលខុសត្រូវបង្ក្រាប ទៅលើបទល្មើសទាំងនេះ ដែលតាម ទូរស័ព្ទ លោក សូយ សារិទ្ធ នាយខណ្ឌ រដ្ឋបាលព្រៃឈើខេត្ដក្រចេះបានប្រាប់ នគរវត្ដថា លោកពុំបានដឹងផ្ទៃក្នុងរឿង នេះ ចាំឱ្យមន្ដ្រីទៅពិនិត្យឬសួរនាំរឿងនេះ ឱ្យបានច្បាស់លាស់ ។
លោក សូយ សារិទ្ធ បន្ដថា យកល្អ អ្នកកាសែតបើបានឃើញសកម្មភាព ដឹកឈើបែបនេះ គួរតែរាយការណ៍ជូន ទៅរដ្ឋបាលព្រៃឈើមូលដ្ឋាននៅទីនោះ ។ ដូច្នេះ ភាពខ្វះការទទួលខុសត្រូវរបស់ នាយខណ្ឌរដ្ឋបាលព្រៃឈើខេត្ដក្រចេះ ឬ ក៏និយាយបានថា អាចនឹងពាក់ព័ន្ធអំពើ ពុករលួយ ទើបឈានទៅមានការឃុប ឃិតគ្នា រហូតដល់ធ្វើឱ្យឈ្មួញ គន្ធា នេះ មានឱកាសក្នុងការដឹកឈើប្រណីតក្នុង ទ្រង់ទ្រាយធំជាងគេតាមទូក ពីខេត្ដស្ទឹង ត្រែងមកចែកចាយក្ន្នុងខេត្ដក្រចេះ ។
លោក សេង ច័ន្ទដារុន នាយសង្កាត់ រដ្ឋបាលព្រៃឈើសណ្ដាន់-សំបូរ នគរវត្ដ មិនអាចទាក់ទងបានទេកាលពីព្រឹកថ្ងៃទី ២៤ខែកញ្ញាឆ្នាំ២០១២ ដោយទូរស័ព្ទត្រូវ បានបិទ ខណៈដែលភូមិសាស្ដ្រទឹកដីគាត់ កាន់កាប់ពោរពេញដោយឈើល្មើស ច្បាប់ឆ្លងកាត់នោះ ។
ប្រភពពីឈ្មួញមួយចំនួននៅខេត្ដស្ទឹង ត្រែងបានឱ្យដឹងថា ឈ្មួញ គន្ធា បានប៉ាវ ផ្ដាច់ក្នុងការដឹកជញ្ជូនឈើប្រណីតនៅ ក្នុងខេត្ដស្ទឹងត្រែងយកទៅចែកចាយក្នុង ខេត្ដក្រចេះ ដែលឈើទាំងនោះប្រមូល ទិញពីស្រុកសៀមប៉ាង, ថាឡាបរិវ៉ាត់ និងស្រុកសេសាន ដាក់តាមទូកក្នុង១ទូកៗ មិនតិចជាងពី២៥ទៅ៣០ម៉ែត្រគូប ភាគ ច្រើនជាឈើធ្នង់ដែលមានមុខកាត់ធំៗ មានតម្លៃខ្ពស់ ។
ពីមុនឈ្មួញគន្ធាដឹកពីខេត្ដស្ទឹងត្រែង យកមកដល់ទីរួមខេត្ដក្រចេះតែម្ដង ប៉ុន្ដែ ដោយមានការបង្ក្រាបពីសមត្ថកិច្ចនៅ ខេត្ដស្ទឹងត្រែង មួយរយៈនេះបានត្រឹមតែ ដឹកឈើតាមទូកមកឡើងត្រឹមស្រុកសំបូរ រួចហើយក៏បន្ដដឹកតាមរថយន្ដមកកាន់ ខេត្ដក្រចេះ និងមួយចំនួនទៀតចែកចាយ តាមសិប្បកម្ម ។
ក្នុង១ទូកៗ ឈ្មួញ គន្ធា ត្រូវចំណាយប្រាក់រាប់ម៉ឺនដុល្លារដើម្បីបិទបាំងសកម្ម ភាពល្មើសច្បាប់នេះ ពីព្រោះការលោតឆត្ររបស់ឈ្មួញ គន្ធា មួយរយៈនៅខេត្ដ ស្ទឹងត្រែង ត្រូវបានសមត្ថកិច្ចចាប់បាន រាប់ពាន់កំណាត់ប្រភេទឈើធ្នង់ ។ ដូច្នេះ បន្ទាប់ពីការគិតគូរដល់សមត្ថកិច្ចនិងជំនាញរដ្ឋបាលព្រៃឈើខេត្ដក្រចេះ ស្ទឹងត្រែង ឈ្មួញរូបនេះបានបន្ដក្នុងការដឹក ជញ្ជូនឈើប្រណីតទាំងយប់ទាំងថ្ងៃតាមទូក ចំណែកសមត្ថកិច្ចពាក់ព័ន្ធកំពុងប្រឹង ប្រមូលប្រយោជន៍ទៅវិញ ៕
No comments:
Post a Comment
yes