សមត្ថកិច្ច និងប្រជាពលរដ្ឋ បង្ហាញរូបថតព្រះខែដែលមានព្រះឆាយាល័ក្ខណ៍
សម្ដេចឪដែលត្រូវបានកែច្នៃឡើងដោយម៉ាស៊ីនកុំព្យូទ័រ។ រូបថតនេះ ត្រូវបានគេដាក់
លក់ព្រោងព្រាត និងមានការចោមរោមទិញពីសំណាក់ប្រជាពលរដ្ឋទូទៅ
នៅខាងមុខព្រះបរមរាជវាំងកាលពីថ្ងៃម្សិលមិញ
ភ្នំពេញៈ ព្រះឆាយាល័ក្ខណ៍របស់ព្រះមហាវីរក្សត្រ នរោត្តម សីហនុ ដែលដិតជាប់នៅក្នុងរង្វង់ព្រះចន្ទ ដែលមនុស្សម្នាជាច្រើនទាំងនៅរាជធានីភ្នំពេញ និងនៅតាមបណ្តាខេត្ត នាំគ្នាផ្អើលមើល កាលពីយប់ថ្ងៃអាទិត្យ ត្រូវបានគេដាក់លក់ព្រោងព្រាត និងមានការចោមរោមទិញ នៅខាងមុខព្រះបរមរាជវាំង កាលពីម្សិលមិញ។ ប៉ុន្តែរូបដែលគេលក់ទាំងនោះ គឺជារូបកែច្នៃដោយកុំព្យូទ័រ។
ចាប់ តាំងពីព្រះមហាវីរក្សត្រ យាងចូលទិវង្គត កាលពីថ្ងៃទី ១៥ ខែតុលា ឆ្នាំ ២០១២ មក មានការកត់សម្គាល់ឃើញថាមានអព្ភូតហេតុចម្លែក និងសកម្មភាពជាច្រើន បានកើតឡើង។ កាលពី ថ្ងៃព្រហស្បតិ៍សប្តាហ៍មុន គេឃើញពពកខ្មៅមួយដុំ បានទៅបាំងពន្លឺថ្ងៃដ៏ក្តៅហែងខណៈដែលយន្តហោះចិន បានដឹកព្រះបរមសព សម្តេចឪ ចុះចតនៅព្រលានយន្តហោះអន្តរជាតិភ្នំពេញ ស្របពេលដែលប្រជាជាតិខ្មែរប្រមាណ ១ លាននាក់ បានរង់ចាំទទួលព្រះបរមសពរបស់ព្រះអង្គ នៅតាមដងផ្លូវចាប់តាំងពីព្រលានយន្តហោះ មកដល់ព្រះបរមរាជវាំង។ កាលពីថ្ងៃអាទិត្យ អណ្ដាតភ្លើងធូប នៅមុខវាំង បានឆាបឆេះ លេចចេញជារូបនាគ ហើយនៅពេលយប់ ក៏មានការផ្អើលមើលឃើញព្រះឆាយាល័ក្ខណ៍របស់ព្រះមហាវីរក្សត្រ នៅក្នុងព្រះខែ។
ប្រជាពលរដ្ឋ និងព្រះសង្ឃជាច្រើន នៅរាជធានីភ្នំពេញ ខេត្តកំពង់ឆ្នាំង បាត់ដំបង និងកំពង់ធំ បានទូរស័ព្ទមកកាន់កាសែត ភ្នំពេញ ប៉ុស្តិ៍ ដោយអះអាងពីការមើលឃើញដ៏ចម្លែករបស់ពួកគេ និងមានព្រះសង្ឃមួយអង្គ ថែមទាំងបានអះអាងថា មិត្តភក្ដិរបស់ព្រះអង្គ ជាព្រះសង្ឃ ដែលបានទៅរៀន នៅថៃ និងឥណ្ឌា ក៏បានមើលឃើញព្រះឆាយាល័ក្ខណ៍របស់សម្តេចឪ នៅក្នុងព្រះខែផងដែរ។ ក្រៅពីនេះ មានសកម្មភាពគួរឲ្យគោរពមួយចំនួន ក៏បានកើតឡើងផងដែរ ដូចជា មានសប្បុរសជន បានចែកជូនទឹកសុទ្ធ នំប៉័ង អាវយឺត ដែលមានព្រះឆាយាល័ក្ខណ៍របស់ព្រះ មហាវីរក្សត្រ និងរបស់របរផ្សេងទៀត ជូនប្រជាពលរដ្ឋ ដែលបានចូលរួមកាន់ទុក្ខព្រះបរមសព ដោយមិនគិតថ្លៃ នៅខាងមុខព្រះបរមរាជវាំង និងមានព្រះសង្ឃ និងពលរដ្ឋមួយចំនួន បានកាន់ស្បោងដើររើសសំរាម ដើម្បីសម្អាតបរិវេណ នៅខាងមុខព្រះបរមរាជវាំង។ ប៉ុន្តែយ៉ាងណាក្តី ក៏មានមនុស្សមួយចំនួនតូច បានឆ្លៀតឱកាស កើបប្រមូលប្រាក់ពីព្រឹត្តិការណ៍នេះផងដែរ ដូចជា ការយកកម្រៃផ្ញើម៉ូតូក្នុងតម្លៃខ្ពស់ រហូតដល់ ៤០០០ រៀលសម្រាប់ម៉ូតូមួយគ្រឿង និងការលក់បូកាន់ទុក្ខ ផ្កា ទៀន ធូបក្នុងតម្លៃខ្ពស់ជាដើម។
ឈរកាន់ព្រះឆាយាល័ក្ខណ៍របស់ ព្រះករុណា ព្រះបាទសម្តេចនរោត្តម សីហនុ ដែលមានការរចនា តាមកម្មវិធីកុំព្យូទ័រ ដែលមើលឃើញព្រះភក្ត្ររបស់ព្រះអង្គច្បាស់ នៅក្នុងរង្វង់ព្រះខែមួយចំណិត លោក សៅ ផល្លី អាយុ ៧៥ ឆ្នាំ មកពីស្រុកក្រគរ ខេត្តពោធិ៍សាត់ បានថ្លែងថា នេះគឺជាបារមីរបស់ព្រះអង្គ បានសម្តែងឲ្យពលរដ្ឋខ្មែរនៅទូទាំងប្រទេសបានឃើញព្រះភក្រ្តរបស់ ព្រះអង្គជាលើកចុងក្រោយ ហើយក៏ជាការបញ្ជាក់ប្រាប់ពលរដ្ឋខ្មែរទាំងអស់ថា ត្រូវតែចេះសាមគ្គីគ្នា ដើម្បីឲ្យមានសុខសន្តិភាព។ លោកនិយាយថា ៖ «ព្រះអង្គបានបញ្ជាក់ថា ព្រះព្រលឹងរបស់ព្រះអង្គ គឺនៅថែរក្សាកូនចៅជានិច្ច បើទោះបីជាព្រះអង្គ បានលាចាកលោកនេះហើយក៏ដោយ»។ លោក សៅ ផល្លី ដែលបានទិញព្រះឆាយាល័ក្ខណ៍របស់សម្តេចឪ នៅជាប់ព្រះខែដែរនោះ មានជំនឿថា ប្រសិនបើព្រះអង្គ ពុំមានបារមីខ្ពស់ទេ ព្រះអង្គពុំអាចទៅបង្ហាញព្រះភក្ត្ររបស់ព្រះអង្គនៅក្នុងព្រះ ចន្ទបានឡើយ។
បុរសចំណាស់រូបនេះ បានគូសបញ្ជាក់ថា៖«ព្រះឆាយល័ក្ខណ៍នេះ គឺជារឿងអច្ឆរិយៈដូច្នេះខ្ញុំត្រូវតែទិញទុកតាំងនៅឯផ្ទះ ដើម្បីសុំសេចក្តីសុខសេចក្តីចម្រើន»។
នៅក្នុងកន្លែងដែលមាន ទាំងព្រះសង្ឃ តាជី ដូនដី សិស្ស-និស្សិត ប្រជាពលរដ្ឋច្រើនកុះករ លោក យឹក ផល្លា អាយុ ៧៣ ឆ្នាំបានថ្លែងថា លោកត្រូវតែជាវព្រះឆាយាល័ក្ខណ៍របស់ព្រះមហាវីរក្សត្រ ពីព្រោះព្រះអង្គ គឺជាសេ្តចផែនដី ហើយទោះបីជាពលរដ្ឋពុំបានឃើញព្រះសពរបស់ព្រះអង្គ នៅឯក្នុងព្រះបរមរាជវាំងក៏ដោយ ក៏ព្រះអង្គ បាននិមិ្មតនៅក្នុងព្រះចន្ទ ឲ្យពលរដ្ឋឃើញទូទៅ។ លោកនិយាយថា ៖ «អ្នកណាមិនជឿក៏ហីទៅ តែសម្រាប់រូបខ្ញុំ គឺខ្ញុំជឿ ពីព្រោះនៅក្នុងព្រះចន្ទ ខ្ញុំឃើញស្នាមញញឹមរបស់ព្រះអង្គ ព្រះនេត្ររបស់ព្រះអង្គ សម្លឹងមករកយើងទាំងអស់គ្នា។ ព្រះអង្គពិតជាមានឫទ្ធិអំណាចខ្លាំងណាស់»។
លី សុវណ្ណារី ដែលបានមកកាន់ទុក្ខ នៅមុខព្រះបរមរាជវាំង បាននិយាយថា កាលពីយប់ថ្ងៃអាទិត្យ នាងបានមើលឃើញច្បាស់ជារូបសម្តេចតា នៅក្នុងព្រះចន្ទ។ ព្រះអង្គញញឹមសម្លឹងមកកាន់ផែនដី។ ដើម្បីមើលឃើញរូបនេះ ត្រូវសម្លឹងក្នុងការដាក់អារម្មណ៍ដោយហ្មត់ចត់បំផុត ទើបមើលឃើញ។ នាងបន្តថា៖«កាលដែលខ្ញុំមើលឃើញពីយប់ ខុសរូបដែលគេផ្តិតលក់ តែទោះបីជាខុសគ្នាយ៉ាងណា ក៏ខ្ញុំត្រូវតែទិញដែរដើម្បីយកទៅទុកគោរពបូជា»។
ព្រះឆាយា ល័ក្ខណ៍ទាំងនោះ ត្រូវគេលក់ក្នុងតម្លៃពី ១៥០០ ទៅ ២០០០ រៀល ក្នុងព្រះឆាយាល័ក្ខណ៍មួយសន្លឹក ហើយមានអ្នកលក់ប្រមាណជា ១០ នាក់ដែលអ្នកខ្លះ បានដាក់តាំងលក់ផ្ទាល់ដី ខ្លះដើរស្ពាយលក់ នៅខាងមុខព្រះបរមរាជវាំង។
អ្នកលក់ម្នាក់ សុំមិនបញ្ចេញឈ្មោះបានឲ្យដឹងថា នាងបានលក់គ្រប់ព្រះឆាយាល័ក្ខណ៍របស់ព្រះអង្គ តាំងពីរូបពីកុមារភាព គ្រងរាជ ប៉ុន្តែព្រះឆាយាល័ក្ខណ៍ដែលលក់ដាច់ជាងគេ គឺព្រះឆាយាលក្ខណ៍ នៅក្នុងព្រះខែ។ នាងបន្តថា៖ «ខ្ញុំមិនដឹងថារូបនេះ គេកែច្នៃ ឬយ៉ាងណាទេ។ ព្រឹក មិញ (ថ្ងៃចន្ទ) គ្រាន់តែមួយភ្លែត ខ្ញុំលក់ដាច់បាន ៨០ សន្លឹក ឥឡូវខ្ញុំឲ្យគេយកមកបន្ថែមទៀត»។
លោក រស់ ចន្ត្រាបុត្រ សាស្ត្រាចារ្យផ្នែកវិទ្យាសាស្ត្រនយោបាយ និងជាប្រវត្តិវិទូខ្មែរ បានថ្លែងថា លោកពុំអាចធ្វើការអត្ថាធិប្បាយច្រើនទេ ទាក់ទិនទៅនឹងករណីនេះពីព្រោះវាជាជំនឿរបស់ពលរដ្ឋម្នាក់ៗ ដែលគេអាចនិយាយស្រេចតែចំណង់របស់គេយល់។
ការសោយទិវង្គតរបស់ អតីតព្រះមហាវីរក្សត្រ គឺជាព្រឹត្តិការណ៍ដែលទទួលបានការចូលរួមព្រះរាជបរមមរណទុក្ខដ៏ ធំបំផុតមួយ ក្នុងប្រវត្តិសាស្ត្រមេដឹកនាំកម្ពុជា រយៈពេល ៧០ ឆ្នាំចុងក្រោយនេះ។ ប្រជាជាតិខ្មែរក្នុងនោះ រួមទាំងព្រះសង្ឃគ្រប់វត្តអារាម សរុបជាង ៥ ម៉ឺនអង្គនៅទូទាំងប្រទេស សុទ្ធតែបានសូត្រធម៌ឧទ្ទិសកុសលដល់ព្រះអង្គសម្ដេចឪ៕
No comments:
Post a Comment
yes