ស័ក្តិ៤ប៉េអឹមឈ្មោះ បោង ពុទ្ធារិទ្ធ ត្រូវអង្គភាពប្រឆាំងអំពើពុករលួយចាប់ខ្លួន
កាលពីថ្ងៃទី២ វិច្ឆិកា
ភ្នំពេញៈ មន្ត្រីកងរាជអាវុធហត្ថខេត្តពោធិ៍សាត់ម្នាក់ ដែលត្រូវចាប់ខ្លួនដោយអង្គភាពប្រឆាំងអំពើពុករលួយកាលពីថ្ងៃសុក្រ ពាក់ព័ន្ធនឹងការគំរាមកំហែងមន្ត្រីរដ្ឋបាលព្រៃឈើនិងចាត់វិធានការរារាំងការអនុវត្តច្បាប់ ទាក់ទិននឹងការដឹកជញ្ជូនឈើខុសច្បាប់ឆ្លងកាត់ខេត្តនេះ នៅបន្តឃុំខ្លួនក្នុងពន្ធនាគារខេត្តនៅឡើយ ឯតុលាការមិនបានចោទប្រកាន់ជាផ្លូវការទេ គិតត្រឹមថ្ងៃម្សិលមិញ។
លោក បោង ពុទ្ធារិទ្ធ ឋានៈវរសេនីយ៍ត្រី ជាប្រធានមន្ទីរប្រភពកម្លាំងនៃកងរាជអាវុធហត្ថខេត្តពោធិ៍សាត់ត្រូវ អង្គភាពប្រឆាំងអំពើពុករលួយចាប់ខ្លួនកាលពីថ្ងៃសុក្រសប្តាហ៍មុន ទាក់ទងនឹងការប្រព្រឹត្តអំពើពុករលួយទទួលយកប្រាក់ពីឈ្មួញខុសច្បាប់ដើម្បីកាងការពាររថយន្តដឹកឈើខុសច្បាប់បួនគ្រឿងឲ្យរួចផុតពីការចាប់ខ្លួនពីសមត្ថកិច្ចចម្រុះដឹកនាំដោយមន្ត្រីរដ្ឋបាលព្រៃឈើក្រោមការបង្គាប់ពីព្រះរាជអាជ្ញាអមតុលាការខេត្ត។
លោក ខេង ទីតូ អ្នកនាំពាក្យកងរាជអាវុធហត្ថលើផ្ទៃប្រទេសបានឲ្យដឹងថា មកដល់ពេលនេះជនសង្ស័យនៅមិនទាន់ត្រូវតុលាការខេត្តពោធិ៍សាត់ធ្វើការចោទប្រកាន់ជាផ្លូវការនៅឡើយទេ ព្រោះមិនទាន់បានបញ្ជូនទៅធ្វើការសាកសួរ ដោយសារតែជាថ្ងៃអាទិត្យ ថ្ងៃឈប់សម្រាក។
លោកបានមានប្រសាសន៍ថា៖«ឥឡូវនេះជនសង្ស័យកំពុងត្រូវឃុំខ្លួនបណ្តោះអាសន្ននៅពន្ធនាគារខេត្តពោធិ៍សាត់ ហើយយ៉ាងយូរនៅថ្ងៃស្អែក(ថ្ងៃចន្ទ)អាចនឹងបញ្ជូនទៅកាន់តុលាការ»។ លោកបន្តថា៖ «ខ្ញុំគិតថា រឿងនេះគឺជាចំណុចរស៊ើបមួយ ដែលខ្ញុំសុំមិនប្រាប់លម្អិតទេ ប៉ុន្តែខ្ញុំជឿថា ខាងអង្គភាពប្រឆាំងអំពើពុករលួយ កំពុងតែបន្តការស៊ើបអង្កេតលើរឿងនេះហើយ»។
យោងប្រកាសព័ត៌មានរបស់អង្គភាព ACU បានឲ្យដឹងថា កាលពីថ្ងៃទី១១ កក្កដា មានរថយន្តទំនើបឡិចស៊ីសបួនគ្រឿងដឹកឈើគ្រញូងខុសច្បាប់ឆ្លងកាត់ខេត្តពោធិ៍សាត់ ព្រះរាជអាជ្ញាអមតុលាការខេត្តក៏បានបង្គាប់ឲ្យខាងរដ្ឋបាលព្រៃឈើខេត្តធ្វើការទប់ស្កាត់ ហើយលោក ប៉ុល ចន្ថា អនុប្រធានផ្នែកព្រៃឈើក្នុងស្រុកក្រគរ ក៏បានសហការនឹងអាជ្ញាធរដែនដីចុះធ្វើការទប់ស្កាត់បទល្មើសនេះ។ ក៏ប៉ុន្តែ ស្រាប់តែលោក បោង ពុទ្ធារិទ្ធ បានប្រើអំណាចដោយទទួលបានផលប្រយោជន៍(ស៊ីសំណូក)ពីឈ្មួញដឹកឈើទាំងនោះ បានទៅគំរាមកំហែងនិងជេរប្រមាថសមត្ថកិច្ចមិនឲ្យឃាត់រថយន្តឡិចស៊ីសទាំងបួននោះទេ ហើយបាននាំរថយន្តនោះចេញបាត់ទៅ។
ប្រកាសព័ត៌មានរបស់ ACU នេះបន្តថា ៖ «កន្លងមកតាមផ្លូវជាតិលេខ៥ ជាក់ស្តែង ក្នុងទឹកដីខេត្តខេត្តពោធិ៍សាត់នេះ ការបង្ក្រាបបទល្មើសព្រៃឈើ មានការលំបាកខ្លាំង ព្រោះច្រើនមានអ្នកមករារាំងការពារបង្កើតជាឧបសគ្គដល់សមត្ថកិច្ច»។
តាមប្រកាសព័ត៌មាន ACU ដដែលនេះ ACU បានរកឃើញទោសកំហុសលោក បោង ពុទ្ធារិទ្ធ ចំនួនពីរករណី។ ទី១ ពីបទគំរាមកំហែងមន្ត្រីរដ្ឋបាលព្រៃឈើ ឬរារាំងការបំពេញភារកិច្ចក្នុងប្រតិបត្តិការរបស់មន្ត្រីរដ្ឋបាលព្រៃឈើ និងករណីទី២ គឺចាត់វិធានការរារាំងការអនុវត្តច្បាប់ ដើម្បីទទួលបានដោយខុសច្បាប់នូវអត្ថប្រយោជន៍។
បន្ទាប់ពីអង្គភាព ACU បានសួរសាក្សី៧នាក់ និងបានស្តាប់ចម្លើយពីជនសង្ស័យបោង ពុទ្ធារិទ្ធ អង្គភាព ACU បញ្ជូនគាត់ទៅតុលាការឃុំខ្លួនពីថ្ងៃ៣ វិច្ឆិកា។
លោក អន សុខុន មេបញ្ជាការកងរាជអាវុធហត្ថខេត្តពោធិ៍សាត់ឲ្យដឹងថា លោក បោង ពុទ្ធារិទ្ធ ពិតជាត្រូវអង្គភាពប្រឆាំងអំពើពុករលួយចាប់ខ្លួនពាក់ព័ន្ធនឹងការប្រព្រឹត្តអំពើពុករលួយ ប៉ុន្តែ លោកសូមមិននិយាយលម្អិតទេ ព្រោះវាជាសមត្ថកិច្ចរបស់អង្គភាព ACU។
ទាក់ទិននឹងករណីផ្សេងទៀត លោក ឱម យ៉ិនទៀង ប្រធានអង្គភាពប្រឆាំងអំពើពុករលួយបានប្រាប់ឲ្យដឹងថា ព្រះរាជអាជ្ញារងអមតុលាការខេត្តព្រះវិហារម្នាក់និងប្រធានសាខាពន្ធដារខេត្តព្រះវិហារម្នាក់ ក៏ត្រូវបានដកហូតតំណែងថ្មីៗនេះដែរ ដើម្បីបើកការស៊ើបអង្កេត បន្ទាប់ពីសង្ស័យថា មានការពាក់ព័ន្ធនឹងអំពើពុករលួយ។
លោក ឱម យ៉ិនទៀង ប្រាប់ក្រុមអ្នកកាសែតនៅខាងក្រៅកិច្ចពិភាក្សា UNCAC កាលពីថ្ងៃសុក្រថា មានពីរករណីនៅខេត្តព្រះវិហារ ទីមួយព្រះរាជអាជ្ញារងអមតុលាការខេត្ត និងមួយទៀតគឺប្រធានសាខាពន្ធដារខេត្តពាក់ព័ន្ធនឹងអំពើពុករលួយ ប៉ុន្តែលោកសុំមិនផ្តល់ព័ត៌មានលម្អិតទេ។ ប៉ុន្ដែ ព្រះរាជអាជ្ញារងអមតុលាការខេត្តនេះ ត្រូវគេស្គាល់ថាឈ្មោះ ថុល គឹមហុង និងប្រធានសាខាពន្ធដារខេត្តព្រះវិហារ ឈ្មោះ ជា សុផល។
លោក មានប្រសាសន៍ថា៖ «ក្រសួងយុត្តិធម៌បានដកព្រះរាជអាជ្ញារង ពាក់ព័ន្ធនឹងអំពើពុករលួយ ហើយប្រធានសាខាពន្ធដារខេត្តវិញ យើងបានរកឃើញថា ពុំមានពន្ធប្រថាប់ត្រាពេញមួយឆ្នាំ ប៉ុន្តែ បានចេញវិក្កយបត្រ។ យើងបញ្ជូនករណីនេះទៅតុលាការហើយ»៕
No comments:
Post a Comment
yes