លោក ញឹក ប៊ុនឆៃ អគ្គលេខាធិការគណបក្សហ៊្វុនស៊ិនប៉ិច
គណបក្សរាជានិយមហ៊្វុនស៊ិនប៉ិច កំពុងពិចារណាដាក់ពាក្យបណ្តឹងប្រឆាំងលោក គង់ គាំ ប្រធានគណបក្ស សម រង្ស៊ី ដោយសារការអត្ថាធិប្បាយដែលគេចោទថា លោកបានអះអាងថា រដ្ឋប្រហារលោក លន់ នល់ ឆ្នាំ១៩៧០ប្រឆាំងនឹងសម្តេចឪ នរោត្តម សីហនុ នៅពេលនោះពិតជាបានធ្វើឡើងក្រោមការបង្គាប់របស់សម្តេចព្រះ នរោត្តម សីហនុ។
យោងតាមលោក ញឹក ប៊ុនឆៃ អគ្គលេខាធិការបក្ស បានឲ្យដឹងថា អ្នកជំនាញច្បាប់របស់បក្សកំពុងស្វែងរកលទ្ធភាពដាក់ពាក្យបណ្តឹងប្រឆាំងនឹងអ្វីដែលចាត់ទុកជាការចាក់ចូច ចំពោះការចងចាំពីសម្តេចឪ នរោត្តម សីហនុ ប៉ុន្តែមកដល់ពេលនេះពុំទាន់មានសេចក្តីសម្រេចជាផ្លូវការទេ។
លោក ញឹក ប៊ុនឆៃ បញ្ជាក់ថា៖ «យើងកំពុងពិចារណាលើពាក្យបណ្តឹងប្រឆាំងនឹងលោក គង់ គាំ ប៉ុន្តែ សេចក្តីសម្រេចផ្លូវការថា តើត្រូវដាក់ពាក្យបណ្តឹងប្រឆាំងលោកឬយ៉ាងណា ត្រូវធ្វើឡើងដោយគណៈកម្មាធិការអចិន្រៃ្តយ៍របស់គណបក្ស»។
ភាពចម្រូងចម្រាសនេះបានបញ្ឆេះឡើង នៅពេលគណបក្សប្រជាជនកម្ពុជា បានចេញផ្សាយសំឡេងដែលចាប់បានលោក គាំ ធ្វើសេចក្តីសុន្ទរកថានោះ។ សារសំឡេងនេះក្លាយជាចំណុចក្តៅគគុក បន្ទាប់ពីមានការចេញផ្សាយដូចគ្នាដែលលោក កឹម សុខា នៃគណបក្សសង្គ្រោះជាតិកម្ពុជាត្រូវបានគេចោទថា បានធ្វើសេចក្តីអត្ថាធិប្បាយមិនទទួលស្គាល់ប្រវតិ្តសាស្រ្តទាក់ទងនឹងមន្ទីរប្រល័យពូជសាសន៍ ស‑២១ នៃរបបខ្មែរក្រហម។
ចាប់ពីពេលចេញផ្សាយនោះមកលោក កឹម សុខា បានបដិសេធថាមិនបានធ្វើសេចក្តីអត្ថាធិប្បាយនោះទេ និងថា សំឡេងនេះត្រូវកាត់តខុសពីបរិបទ។
ខណៈដែលលោក គង់ គាំ មិនបានបញ្ជាក់ឬបដិសេធមិនធ្វើសេចក្តីអត្ថាធិប្បាយទាក់ទងនឹងរដ្ឋប្រហារកាលពីម្សិលមិញ ប៉ុន្តែលោកអះអាងថា បញ្ហានេះគឺជាបញ្ហានយោបាយសុទ្ធ។
លោក គង់ គាំថ្លែងដែរថា៖ « រហូតមកដល់ពេលនេះ ខ្ញុំមិនទាន់ឃើញពាក្យបណ្តឹងជាផ្លូវការប្រឆាំងខ្ញុំក្នុងរឿងក្តីនេះទេ ហើយខ្ញុំដឹងថា នេះជាបញ្ជារបស់លោកនាយករដ្ឋមន្រ្តី ហ៊ុន សែន។ ខ្ញុំគិតថា អ្វីដែលលោក ញឹក ប៊ុនឆៃ ថា លោកកំពុងពិចារណាដាក់ពាក្យប្តឹងប្រឆាំងខ្ញុំ គឺដើម្បីទទួលការគាំទ្រពីលោក ហ៊ុន សែន ប៉ុន្តែ គាត់យឺតណាស់»៕
No comments:
Post a Comment
yes