លោក កឹម សុខា ក្នុងពិធីចុះចែកជំនួយមនុស្សធម៌ជូនពលរដ្ឋរងគ្រោះ
ដោយទឹកជំនន់នៅខេត្តបន្ទាយមានជ័យ នាពេលកន្លងមក
ខណៈដែលកងកម្លាំងរបស់រដ្ឋាភិបាល កំពុងត្រៀមខ្លួនក្នុងការការពារបូរណភាពដែនដីនៅទិសប្រាសាទព្រះវិហារនោះ គណបក្សសង្គ្រោះជាតិ ដែលជាបក្សប្រឆាំងក៏បានប្ដេជ្ញាចិត្តចូលរួមក្នុងបញ្ហានេះដែរ។ លោក កឹម សុខា អនុប្រធានគណបក្សប្រឆាំងបានអះអាងថា គណបក្សសង្គ្រោះជាតិ ត្រៀមខ្លួនជានិច្ចក្នុងការចូលរួមគ្រប់សកម្មភាពលើការការពារបូរណភាពដែនដី ពីការរំលោភបំពាន តាមរយៈការផ្ដល់គំនិតឲ្យរដ្ឋាភិបាល និងការស្វែងរកជំនួយគ្រប់រូបភាពក្នុងករណីដែលចាំបាច់។
ថ្លែងប្រាប់គេហទំព័រថ្មីៗតាមទូរស័ព្ទ នៅព្រឹកថ្ងៃពុធ ទី៦ ខែវិច្ឆិកានេះ លោក កឹម សុខា បានអះអាងថា ករណីប្រាសាទព្រះវិហារ មិនមែនជាបញ្ហាផ្ដាច់មុខរបស់រដ្ឋាភិបាលតែម្នាក់ឯងនោះទេ ប៉ុន្តែវាជាបញ្ហារបស់ពលរដ្ឋ និងជាតិទាំងមូល ដែលត្រូវតែរួមគ្នាការពារបូរណភាពដែនដីដែលដូនតាបានបន្សល់ទុកឲ្យ ហើយថា គណបក្សសង្គ្រោះជាតិ ដែលមានអ្នកគាំទ្រស្ទើតែពាក់កណ្ដាលប្រទេសនោះ ក៏បានប្ដេជ្ញាចិត្តចូលរួមគ្រប់សកម្មភាពជាមួយជនរួមជាតិទាំងមូលផងដែរ។
លោកបញ្ជាក់ថា៖« យើងក៏មានកាតព្វកិច្ចការពារទឹកដីដូនតាដែរ! យើងក៏ស្រលាញ់ទឹក ស្រលាញ់ដីដែរ។ យើងស្រលាញ់សន្តិភាព ប៉ុន្តែសន្តិភាពត្រូវតែមានការគោរពគ្នាទៅវិញទៅមក។ ជាមួយគ្នានេះ លោក កឹម សុខា បានស្ដីបន្ទោសដល់អាជ្ញាធររដ្ឋាភិបាលមួយចំនួន ដែលបានរារាំងគណបក្សប្រឆាំង មិនឲ្យចូលរួមក្នុងសកម្មភាពផ្ដល់អំណោយជូនកងទ័ពកាលពីអំឡុងពេល ដែលកងទ័ពកម្ពុជា និងកងទ័ពថៃផ្ទុះសង្គ្រាមនៅតំបន់ព្រំដែនកន្លងមក ពិសេសតំបន់ប្រាសាទព្រះវិហារនោះតែម្ដង។
យ៉ាងណាក៏ដោយ លោក កឹម សុខា បានបង្ហាញសុទិដ្ឋិនិយមថា នៅពេលខាងមុខនេះ ប្រសិនបើមានការប៉ះទង្កិចគ្នារវាងកងទ័ពកម្ពុជា និងកងទ័ពថៃកើតឡើងមែននោះ លោកសង្ឃឹមថារដ្ឋាភិបាលរបស់លោកនាយករដ្ឋមន្ត្រី ហ៊ុន សែន នឹងបើកចំហរឲ្យមានការចូលរួមដោះស្រាយបញ្ហាជាតិ ពីគ្រប់និន្នាការនយោបាយដោយមិនប្រកាន់បក្សពួក ហើយថា គណបក្សរបស់លោក ក៏នឹងប្រកាសអំពាវនាវដល់អ្នកគាំទ្រក្នុង និងក្រៅប្រទេសឲ្យចូលរួមឧបត្ថម្ភដល់កងទ័ពជាតិដែលកំពុងឈរជើងនោះផងដែរ។
គួរបញ្ជាក់ថា ប្រទេសថៃ តាមរយៈអាជ្ញាធរនៅតាមតំបន់ព្រំដែនជាប់កម្ពុជានោះ កំពុងណែនាំដល់ពលរដ្ឋឲ្យចេះពីរបៀបការពារខ្លួន និងការជម្លៀសចេញពីតំបន់គ្រោះថា្នក់ ខណៈដែលពលរដ្ឋកម្ពុជា កំពុងរក្សាភាពស្ងប់ស្ងៀមបានល្អ ដើម្បីរង់ចាំការបកស្រាយសាលក្រមពីតុលាការយុត្តិធម៌អន្តរជាតិ លើសំណុំរឿងប្រសាទព្រះវិហារ នៅថ្ងៃទី១១ ខែវិច្ឆិកាខាងមុខនេះ៕
No comments:
Post a Comment
yes