លោកស្រី យីង ឡាក់ នាយករដ្ឋមន្ត្រីថៃ (រូបភាពពី AP)
នាយករដ្ឋមន្ត្រីថៃលោកស្រី យីងឡាក់ ច្រានចោលការទាមទាររបស់បាតុករដែលចង់ឲ្យរំលាយគណៈរដ្ឋមន្ត្រី ដោយសំអាងថា លោកស្រីនៅតែជារដ្ឋាភិបាលចាំផ្ទះ រហូតដល់ការបោះឆ្នោតនៅខែកុម្ភៈ អាចបង្កើតរដ្ឋាភិបាលថ្មី។
កាលពីព្រឹកថ្ងៃចន្ទម្សិលមិញ លោកស្រី យីងឡាក់ ប្រកាសរំលាយសភា និងរៀបចំការបោះឆ្នោតជាថ្មី នៅថ្ងៃទី២ខែកុម្ភៈ ដើម្បីជាការបំពេញចិត្តបាតុករ ហើយក៏ជាចំណុចសំខាន់ នៃការដោះស្រាយវិបត្តិនយោបាយផងដែរ។
កាលពីយប់ថ្ងៃចន្ទម្សិលមិញ ព្រះមហាក្សត្រថៃបានយល់ព្រមទៅនឹងការរំលាយសភា ហើយរៀបចំការបោះឆ្នោតថ្មីនេះ។ ព្រះអង្គលើកឡើងថា រដ្ឋាភិបាលរបស់លោកស្រី យីងឡាក់ ជារដ្ឋាភិបាលចាំផ្ទះរហូតដល់ការបោះឆ្នោតនៅខែកុម្ភៈឆ្នាំ២០១៤។ តែនៅថ្ងៃអង្គារនេះ បាតុករពី១០ម៉ឺន ទៅ២០ម៉ឺននាក់ នៅតែប្រមូលផ្តុំនៅទីក្រុងបាងកក ដើម្បីទាមទារឲ្យ លោកស្រី យីងឡាក់ រំលាយគណៈរដ្ឋមន្ត្រី និងចុះចេញពីតំណែងមុនការបោះឆ្នោត ហើយប្រគល់អំណាចឲ្យក្រុមប្រឹក្សាប្រជាជនតាមការចាត់តាំង។
លោកស្រី យីងឡាក់ បានច្រានចោលការទាមទាររបស់បាតុករនោះ។ ថ្លែងប្រាប់អ្នកសារព័ត៌មាននៅថ្ងៃនេះ លោកស្រី អំពាវនាវឲ្យប្រជាជនឈប់ធ្វើបាតុកម្ម ហើយរង់ចាំការបោះឆ្នោតបង្កើតរដ្ឋាភិបាលថ្មី។ លោកស្រីបន្តថា បច្ចុប្បន្នរដ្ឋាភិបាលជារដ្ឋាភិបាលចាំផ្ទះលោកស្រី មានកាតព្វកិច្ចអនុវត្តតាមរដ្ឋធម្មនុញ្ញ ហើយត្រូវបំពេញការងារដោយយុត្តិធម៌។
លោកស្រី យីងឡាក់ ជាប់ឆ្នោតជានាយករដ្ឋមន្ត្រីកាលពីឆ្នាំ២០១១ ហើយត្រូវបាតុករ ក្រុមអាវលឿងធ្វើបាតុកម្មទាមទារទម្លាក់លោកស្រីពីតំណែង ដោយចោទថា លោកស្រី ជាកូនអ៊ុករបស់លោកថាក់ ស៊ីន ជាបងប្រុសរបស់លោកស្រី ដែលកំពុងគេចខ្លួនទៅក្រៅប្រទេស គេចចេញពីការជាប់ពន្ធនាគារពីរឆ្នាំពីបទរំលោភអំណាច និងអំពើពុករលួយ៕
No comments:
Post a Comment
yes