មជ្ឈមណ្ឌលអប់រំអ្នកញៀនគ្រឿងញៀនឈ្មោះឱកាសខ្ញុំស្ថិតនៅ
ជាយរាជធានីភ្នំពេញ
អង្គការសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch=HRW) បានចោទរដ្ឋាភិបាលកម្ពុជា ថាបានចាប់ឃុំអ្នកប្រើប្រាស់គ្រឿងញៀនប្រហែល ២.២០០នាក់ខុសច្បាប់ក្នុងមណ្ឌលកែប្រែគ្រឿងញៀន វាយធ្វើទារុណកម្មយ៉ាងព្រៃផ្សៃ។ អង្គការនេះ បានអំពាវនាវឲ្យរដ្ឋាភិបាលកម្ពុជា បិទមណ្ឌលអប់រំកែប្រែគ្រឿងញៀនទាំងនោះជាបន្ទាន់។
របាយការណ៍ យូមែន រ៉ៃត៍ វ៉ច្ឆ ចុះថ្ងៃទី៩ ធ្នូ ឆ្នាំ២០១៣ កម្រាស់ ៥៥ទំព័រ មានចំណងជើងថា «គេធ្វើបានយើងដូចសត្វធាតុ» បានរៀបរាប់មណ្ឌលអប់រំគ្រឿងញៀនចំនួន៨ នោះថា ជាឋាននរក វាយដំជ្រាំធាក់ ប្រមាថមើលងាយទាំងផ្លូវកាយនិងចិត្ត ធ្វើទារុណកម្ម ដូចជា លូនលើដីក្រួស ឬឲ្យឈរត្រាំក្នុងលូទឹកស្អុយជាដើម។ ចំពោះអ្នកជាប់ឃុំស្ត្រីវិញ ត្រូវអ្នកយាមចាប់រំលោកធ្វើបាប។
នាយកផ្នែកសុខភាពនិងសិទ្ធិមនុស្សនៃអង្គការ យូមែន រ៉ៃត៍ វ៉ច្ឆ លោក ចូសិប អាម៉ុន (Joseph Amon) បានឲ្យដឹងថា៖ «អ្នកដែលទទួលការព្យាបាលពីមណ្ឌលបន្សាបគ្រឿងញៀន គឺទទួលបានត្រឹមតែការវាយដំ ជាំសាច់ និងត្រូវគេបង្ខំឲ្យធ្វើការ។ រដ្ឋាភិបាលយកមណ្ឌលទាំងនេះជាកន្លែងសម្រាប់ដឹកអ្នកសុំទាន អ្នករកស៊ីបម្រើសេវាផ្លូវភេទ កុមារអនាថាតាមផ្លូវនិងអ្នកដទៃទៀត យកទៅចាក់ចោលនៅក្នុងមណ្ឌលទាំងនោះ មុនពេលអ្នកមានកិត្តិយសខ្ពង់ខ្ពស់ៗចុះទៅពិនិត្យទីនោះ»។
អង្គការ យូមែន រ៉ៃត៍ វ៉ច្ឆ បានសម្ភាសអ្នកធ្លាប់នៅក្នុងមន្ទីរអប់រំកែប្រែគ្រឿងញៀនចំនួន ៣៣នាក់ នៃមណ្ឌលគ្រឿងញៀនចំនួន ៨មណ្ឌល នៅខេត្តបាត់ដំបង បន្ទាយមានជ័យ សៀមរាប កោះកុង និងភ្នំពេញ។ ក្នុងពេលជាមួយគ្នានេះដែរ អាជ្ញាធរបានចាក់សោឃុំឃាំងអ្នកសុំទាន ក្មេងអនាថា អ្នករកស៊ីផ្លូវភេទ និងជនពិការដទៃទៀត។
មណ្ឌលទាំងនោះគ្រប់គ្រងដោយកងរាជអាវុធហត្ថ ប៉ូលិស ដោយក្រសួងសង្គមកិច្ច និងយុទ្ធជនពិការនិងអាជ្ញាធរក្រុង។
អ្នកឃុំឃាំងក្នុងមណ្ឌលនោះមានក្មេងអាយុ ៦ឆ្នាំ ក៏ត្រូវគេបង្ខំឲ្យហាត់ប្រាណហួសប្រមាណ។ កុមារទាំងនោះត្រូវបានគេឃុំក្នុងបន្ទប់មនុស្សចាស់។
ចំពោះការធ្វើទារុណកម្មលើកុមារនេះ លោក ចូសិប អាម៉ុន អះអាងថា ចំពោះរឿងនេះ រដ្ឋាភិបាលកម្ពុជា បានសារភាពថា មានអនីតិជនអាយុក្រោម ១៨ឆ្នាំ ១០ភាគរយ ក្នុងចំណោមអ្នកជាប់ឃុំនៅមណ្ឌលគ្រឿងញៀនជាកុមារ៖ «កុមារដែលប្រើគ្រឿងញៀន ឬរស់នៅតាមចិញ្ចើមផ្លូវ គួរតែទទួលបាននូវការការពារពីការធ្វើទុក្ខបុកម្នេញណាមួយ មិនគូរគេចាក់សោឃុំឃាំង វាយធ្វើបាប ជេរស្ដីទេ»។
មន្ត្រីអង្គការខាណា (KHANA) ដែលធ្វើការជាមួយអ្នកញៀនគ្រឿងញៀន និងមេរោគអេដស៍/ជំងឺអេដស៍ (HIV/AIDS) បានហៅរបាយការណ៍ អង្គការ យូមែន រ៉ៃត៍ វ៉ច្ឆ ថា ជាការដាស់តឿនអារម្មណ៍រដ្ឋាភិបាលឲ្យពិចារណាឡើងវិញអំពីវិធីព្យាបាលអ្នកញៀនថ្នាំញៀនសព្វថ្ងៃដែលមិនត្រូវក្បួនខ្នាតតាមអង្គការសុភាពពិភពលោក និងមើលទៅហាក់ដូចជាចាប់មនុស្សដាក់ឃុំឃាំង ធ្វើទារុណកម្មអ្នកញៀនថ្នាំញៀនទៅវិញ។
ប្រធានមណ្ឌលមានជ័យ របស់អង្គការខាណា លោក សូ គឹមហៃ ធ្វើការផ្នែកកម្មវិធីកាត់បន្ថយគ្រោះថ្នាក់នៃគ្រឿងញៀន បានផ្ដល់ដំបូន្មានមានថា ការអប់រំនិងកែប្រែអ្នកញៀនគ្រឿងញៀនឲ្យឈប់ប្រើប្រាស់គ្រឿងញៀនបានជោគជ័យ មិនត្រូវបង្ខំ ឬឃុំឃាំងអ្នកញៀនបានទេ គឺត្រូវធ្វើឡើងដោយអ្នកញៀនថ្នាំស្ម័គ្រចិត្តមកទទួលសេវាកែប្រែដោយខ្លួនឯង។ បន្ថែមលើនេះ មណ្ឌលនីមួយៗ ត្រូវមានគ្រូពេទ្យជំនាញផ្ដល់ប្រឹក្សា ផ្ដល់សេវាសុខភាព រួមទាំងផ្ដល់ការលើកទឹកចិត្តផ្លូវកាយ ទាំងផ្លូវចិត្ត រួមទាំងមានការគាំទ្រផ្លូវចិត្តពីក្រុមគ្រួសារទើបមានប្រសិទ្ធភាព។
លោក សូ គឹមហៃ៖ «ការអប់រំកែប្រែអ៊ីចឹង (ដូចរដ្ឋាភិបាល) គ្រោះថ្នាក់ណាស់ ការផ្ដាច់គ្រឿងញៀនមិនងាយទេ គេត្រូវរកអ្វីមកជំនួស គេត្រូវការផ្ដល់សេវាផ្សេងទៀតដូចជាសេវាសុខភាព... គេត្រូវការអ្នកញៀនស្ម័គ្រចិត្ត ចាប់គេយកទៅដាក់មួយកន្លែងអ៊ីចឹង ដូចជាផ្ដាច់ពួកគេពីគ្រួសារ វារឹតតែធ្វើឲ្យពួកគេគិតថា ឯកោ គ្រួសារមិនរាប់រក...»។
លោក សូ គឹមហៃ បន្តថា មណ្ឌលរបស់លោកទទួលអប់រំកាត់បន្ថយគ្រោះថ្នាក់ពីការប្រើថ្នាំញៀននៃអ្នកញៀនគ្រឿងញៀនប្រហែល ២០០នាក់ ប្រើស៊ីរាំងម្ជុលចាក់គ្រឿងញៀនជាតិហេរ៉ូអ៊ីន ចូលក្នុងសរសៃឈាមនៅភ្នំពេញ។ ពួកគេមកទទួលសេវាដោយស្ម័គ្រចិត្ត ហើយមណ្ឌលរបស់លោកបានផ្ដល់ថ្នាំមេថាឌន (Methadone) ឲ្យអ្នកញៀនគ្រឿងញៀនជំនួសគ្រឿងញៀនដើម្បីឈានទៅកាប់បន្ថយការប្រើគ្រឿងញៀនទាំងស្រុកទៅអនាគត។
លោកបន្តថា ស្របពេលគ្នានេះ មណ្ឌលរបស់លោកមានគ្រូពេទ្យផ្ដល់ប្រឹក្សានិងផ្ដល់សេវាថែទាំសុខភាពក្នុងអំឡុងពេលដែលអ្នកញៀនថ្នាំញៀនកំពុងទទួលការកាត់បន្ថយប្រើប្រាស់គ្រឿងញៀន។
ឆ្លើយតបទៅនឹងរបាយការណ៍ យូមែន រ៉ៃត៍ វ៉ច្ឆ នេះ អ្នកនាំពាក្យនិងជារដ្ឋលេខាធិការទីស្ដីការរដ្ឋមន្ត្រីលោក ផៃ ស៊ីផាន បានការពាររដ្ឋាភិបាល ហើយបញ្ជាក់ថា រដ្ឋាភិបាលបានប្រឹងប្រែងអប់រំ និងព្យាយាមលប់បំបាត់អ្នកប្រើប្រាស់គ្រឿងញៀន ហើយតាមរយៈនៃកម្មវិធីអប់រំ និងបន្សាបអ្នកញៀនគ្រឿងញៀនសព្វថ្ងៃ គឺរដ្ឋាភិបាលទទួលបានផលវិជ្ជមានច្រើនជាងអវិជ្ជមាន ហើយបានជួយសង្គ្រោះអ្នកញៀនគ្រឿងញៀនជាច្រើននាក់ផុតពីថ្នាំញៀនដោយជោគជ័យ។ តែលោកក៏ទទួលស្គាល់ថា ក្នុងពេលដែលទទួលបានផលវិជ្ជមានក៏មានរឿងអវិជ្ជមានកើតមានឡើងដូចដែលរបាយការណ៍ យូមែន រ៉ៃត៍ វ៉ច្ឆ លើកឡើងខ្លះដែរ។
លោក ផៃ ស៊ីផាន៖ «កម្ពុជាកំពុងបង្ក្រាបនិងលុបបំបាត់កុំឲ្យមានអ្នកប្រើប្រាស់គ្រឿងញៀនទៀត។ យើងក៏បានដឹងបានឮនូវអ្វីដែលកើតមានឡើង នេះជាអ្វីដែលយើងអាចធ្វើបាន»។
របាយការណ៍ស្រាវជ្រាវថ្មីបង្ហាញថា កម្ពុជាមានអ្នកប្រើប្រាស់ថ្នាំញៀនប្រហែល ២ ទៅ ៣ម៉ឺននាក់។ក្នុងនោះ អ្នកប្រើប្រាស់គ្រឿងញៀនប្រឈមគ្រោះថ្នាក់ជាងគេ គឺចាក់គ្រឿងញៀនចូលតាមសរសៃឈាមមានប្រហែល ១.៣០០នាក់ ដែលប្រឈមនឹងការឆ្លងមេរោគអេដស៍ខ្ពស់៕
No comments:
Post a Comment
yes