រដ្ឋសភានៃប្រទេសកម្ពុជា
អគ្គលេខាធិការរដ្ឋសភាកម្ពុជា ស្នើឲ្យក្រសួងមហាផ្ទៃ ចាត់វិធានការចំពោះបុគ្គល ឬជនទាំងឡាយណាដែលបន្តប្រើស្លាកលេខរថយន្តរដ្ឋសភាដែលនិរាករណ៍ ឬផុតកំណត់កាលបរិច្ឆេទប្រើប្រាស់។ ប៉ុន្តែសំណើនេះ ត្រូវសមាជិកសភាគណបក្សប្រឆាំងចាត់ទុកថា ជារឿងនយោបាយ។
លិខិតចុះថ្ងៃទី៦ ខែធ្នូ មានចុះហត្ថលេខា លោក ឡេង ប៉េងឡុង អគ្គលេខាធិការរដ្ឋសភាផ្ញើជូនលោក ស ខេង រដ្ឋមន្ត្រីក្រសួងមហាផ្ទៃ បានស្នើឲ្យជួយមានវិធានការហាមឃាត់ចំពោះការប្រើស្លាកលេខរដ្ឋសភាផុតកំណត់ មានស្លាកលេខ រដ្ឋសភា១ រដ្ឋសភា២ រដ្ឋសភា៣ និងរដ្ឋសភា៤។
លោក ឡេង ប៉េងឡុង បានឲ្យដឹងក្នុងលិខិតផ្ញើជូនលោក ស ខេង ថា សព្វថ្ងៃនេះ សង្កេតឃើញថា មានបុគ្គលខ្លះបានបន្តប្រើប្រាស់ស្លាកលេខរដ្ឋសភាផុតកំណត់មាន រដ្ឋសភា១ ដល់រដ្ឋសភា៤ កំពុងធ្វើចរាចរណ៍តាមផ្លូវសាធារណៈ។
ផ្ដើមពីបញ្ហានេះ អគ្គលេខាធិការរដ្ឋសភា ស្នើក្រសួងមហាផ្ទៃ មានវិធានការបន្ទាន់ចំពោះការប្រើស្លាកលេខផុតកាលបរិច្ឆេទ និងត្រូវនាំជនប្រព្រឹត្តកំហុសទៅផ្ដន្ទាទោសតាមច្បាប់។ ប្រតិកម្មតបបញ្ហានេះ លោក យ៉ែម បុញ្ញឫទ្ធិ មន្ត្រីគណបក្សសង្គ្រោះជាតិ នៅថ្ងៃច័ន្ទ ទី៩ ខែធ្នូ បានចាត់ទុកការលើកយកករណីប្រើស្លាកលេខរដ្ឋសភារបស់អគ្គលេខាធិការរដ្ឋសភាមកនិយាយពេលនេះ ថាជារឿងនយោបាយ។
លោកបន្តថា បើសិនបើរដ្ឋាភិបាល ឬអគ្គលេខាធិការរដ្ឋសភា ពិតជាចង់លុបបំបាត់ការប្រើស្លាកលេខរថយន្តឲ្យបានត្រឹមត្រូវ ត្រូវចាប់ផ្ដើមពីការប្រើប្រាស់ស្លាកលេខរដ្ឋ ឬប្រើស្លាកលេខខេមរភូមិន្ទជាដើម ដែលកំពុងធ្វើចរាចរណ៍អនាធិបតេយ្យឲ្យមានប្រសិទ្ធភាពវិញ៖ «ខ្ញុំថា វាមិនមែនជាករណីស្លាកផុតកំណត់អីទេ ប៉ុន្តែវាបង្កប់ន័យនយោបាយច្រើនជាង ពីព្រោះគាត់ធ្លាប់មានប្រសាសន៍ថា ស្លាកលេខឡានមានធ្វើចំនួន ១២៣ហើយ។ ប៉ុន្តែបេក្ខជនជាប់ឆ្នោតរបស់គណបក្សសង្គ្រោះជាតិ យើងមិនទាន់ត្រូវការ»។
ត្រង់ចំណុចនេះ លោក ឡេង ប៉េងឡុង អគ្គលេខាធិការរដ្ឋសភាបានឲ្យដឹងថា ស្ថាប័ននេះបានរៀបចំផ្ដល់ស្លាកលេខរថយន្តរដ្ឋសភា ៥ ជូនតំណាងរាស្ត្រទាំង ១២៣រូប សម្រាប់ប្រើប្រាស់ផ្លូវការក្នុងអាណត្តិទី៥ ពីឆ្នាំ២០១៣ ដល់ឆ្នាំ២០១៨ រួចហើយ។ មន្ត្រីរូបនេះមានប្រសាសន៍ថា នឹងមិនទទួលខុសត្រូវចំពោះជនទាំងឡាយណាដែលបន្តប្រើប្រាស់ស្លាករថយន្តរដ្ឋសភាផុតកំណត់នោះទេ។
ទាក់ទិនបញ្ហានេះ លោក ខៀវ សុភ័គ មន្ត្រីនាំពាក្យក្រសួងមហាផ្ទៃ មានប្រសាសន៍ថា នឹងពិនិត្យលើសំណើរបស់អគ្គលេខាធិការរដ្ឋសភា ជុំវិញការប្រើប្រាស់ស្លាកសញ្ញារដ្ឋសភាផុតកំណត់នេះ។ ប៉ុន្តែលោកស្នើដល់អតីតអ្នកតំណាងរាស្ត្រ ឬក៏សមាជិកសភាទាំងឡាយ ពិសេសសមាជិកសភាបក្សប្រឆាំង ត្រូវចូលរួមសហការលើករណីប្រើស្លាកសញ្ញារដ្ឋសភាផុតកំណត់ឲ្យបានត្រឹមត្រូវ។
លោក ខៀវ សុភ័គ៖ «សំខាន់សភាគឺផ្ដល់ជូនតែសមាជិករដ្ឋសភាទេ ក្នុង ១អាណត្តិៗ គឺជាតំណាងរាស្ត្រ ហើយខ្ញុំគិតថា បើវាហួសអាណត្តិហើយគួរតែសមាជិកសភាដែលលោកមិនទាន់បានប្រកាសសុពលភាព ឬមិនទាន់បានស្បថ លោកមិនមែនជាសមាជិកសភានៅឡើយទេ ថ្វីត្បិតតែលោកជាប់ឆ្នោតមែន។ ប៉ុន្តែបើមិនទាន់បានស្បថចូលកាន់តំណែង គឺលោកមិនទាន់មានសិទ្ធិដើម្បីប្រើប្រាស់លេខរដ្ឋសភាទេ ហើយលេខរដ្ឋសភាចាស់គួរតែប្រគល់ជូនរដ្ឋសភាវិញ។ នេះបើតាមយោបល់ផ្ទាល់ខ្លួនរបស់ខ្ញុំទេ»។
បន្ថែមលើនេះ អគ្គលេខាធិការរដ្ឋសភាបានប្រកាសក្នុងលិខិតផ្ញើជូនក្រសួងមហាផ្ទៃ ដោយស្នើដល់សមាជិកសភា ឬអតីតសមាជិកសភាទាំងអស់របស់គណបក្សប្រឆាំង ត្រូវបញ្ឈប់ប្រើប្រាស់ស្លាកលេខរដ្ឋសភាផុតកំណត់ចាប់ពីរដ្ឋសភា១ ដល់រដ្ឋសភា៤ ជាបន្តទៀត ព្រោះស្ថាប័នរដ្ឋសភាមិនទទួលខុសត្រូវទេ។ ប៉ុន្តែសមាជិកគណបក្សប្រឆាំងប្រតិកម្មថា សេចក្ដីជូនដំណឹងនេះមានចរិតអុជអាល៕
No comments:
Post a Comment
yes