ទណ្ឌិតម្នាក់ក្នុងចំណោមជនជាប់ចោទ ១២នាក់ផ្សេងទៀត ដែលរងការកាត់ទោសកំបាំងមុខឲ្យជាប់ពន្ធនាគារពី ១០ខែ ដល់ ៣០ឆ្នាំ អំពីបទបង្កើតតំបន់អបគមន៍ក្នុងខេត្តក្រចេះ ជាមួយលោក ម៉ម សូណង់ដូ បានបន្ទោសតុលាការក្រុងភ្នំពេញថា កាត់ក្ដីដោយអយុត្តិធម៌ ដើម្បីបំពេញចិត្តថ្នាក់ដឹកនាំរដ្ឋាភិបាលប៉ុណ្ណោះ។
អ្នកគាំទ្រទាមទារឲ្យដោះលែងលោក ម៉ម សូណង់ដូ នៅក្បែរតុលាការរាជធានីភ្នំពេញ ដោយមានសមត្ថកិច្ចប៉ូលិសឈរយាមការពារនៅរបាំងម្ខាងផ្លូវ កាលពីថ្ងៃទី១ តុលា ឆ្នាំ២០១២។
លោក ប៊ុន ឆន ដែលទើបត្រូវតុលាការកាត់ទោសឲ្យជាប់ពន្ធនាគាររយៈពេល ១៥ឆ្នាំ និងពិន័យជាប្រាក់ ៨លានរៀល ពីបទចោទថា បានចូលរួមបង្កើតតំបន់អបគមន៍នៅភូមិប្រម៉ា ស្រុកឆ្លូង ខេត្តក្រចេះ ជាមួយលោក ម៉ម សូណង់ដូ ប្រធានវិទ្យុសំបុកឃ្មុំនោះ បានបដិសេធមិនទទួលយកការជំនុំជម្រះរបស់តុលាការក្រុងភ្នំពេញទេ ដោយលោកចោទថា តុលាការមួយនេះអនុវត្តច្បាប់ទៅតាមបញ្ជារបស់នាយករដ្ឋមន្ត្រី។
លោក ប៊ុន ឆន អាយុ ៦៣ឆ្នាំ ជាឪពុកបង្កើតរបស់លោក ប៊ុន រដ្ឋា ដែលសព្វថ្ងៃកំពុងរស់នៅនិរទេស បានប្រសាសន៍ប្រាប់វិទ្យុអាស៊ីសេរី តាមទូរស័ព្ទថា លោកមិនខ្លាចនឹងចូលខ្លួនដើម្បីទទួលទោសតាមផ្លូវច្បាប់នោះទេ ប្រសិនបើតុលាការកម្ពុជា មានភាពឯករាជ្យ មិនស្ថិតនៅក្រោមអំណាចរបស់រដ្ឋាភិបាល។
លោក ប៊ុន ឆន៖ «ហេតុអីតុលាការនេះមិនបើកភ្នែក ហើយស្រាវជ្រាវភស្តុតាងជាក់ស្ដែងដែលលោកទៅព័ទ្ធផ្ទះខ្ញុំនោះ ថាតើខ្ញុំមានទាហានប៉ុន្មានរយនាក់? មានឡាន ហើយអាវុធខ្ញុំមានប៉ុន្មាននៅនឹងផ្ទះហ្នឹងដែលលោកឯងទៅព័ទ្ធនោះ? ខ្ញុំសួរទៅលោក ហ៊ុន សែន សិន តើទ័ពប៉ុន្មានរយនាក់ដែលទៅព័ទ្ធផ្ទះរបស់ខ្ញុំចាប់ពីម៉ោង ៩ល្ងាច ដល់ម៉ោង ១២ថ្ងៃនោះ តើយកបានអាវុធប៉ុន្មានដើម? ខ្ញុំសូមសួរទៅលោក ហ៊ុន សែន បានជាលោកចោទខ្ញុំថា បានបង្កើតតំបន់អបគមន៍នេះ។ សូម្បីតែដៃខ្ញុំក៏អត់មានផង ផ្ទះខ្ញុំក៏អត់មានអាវុធ។ ផ្ទះខ្ញុំដែលលោកឯងរុះរើនោះ អត់មានទេអាវុធ មានតែកាំបិត និងចប ហើយសម្ភារៈប្រើប្រាស់ ដូចជា ចាន ឆ្នាំង តែប៉ុណ្ណឹងទេ ហើយម៉ូតូ ត្រូវលោកឯងរឹបអូសអស់ហើយ ហើយចោទខ្ញុំថា បង្កើតតំបន់អបគមន៍ តើមានស្អីជាភស្តុតាង? បើសិនជាមានអាវុធតែមួយដើមនៅផ្ទះខ្ញុំមែន នោះខ្ញុំហ៊ានទទួលសារភាពថាខ្ញុំខុស»។
ក្រៅពីការកាត់ទោស លោក ម៉ម សូណង់ដូ ប្រធានវិទ្យុសំបុកឃ្មុំ FM 105 មេហ្គាហឺត ថាជាមេខ្លោងបង្កើតតំបន់អបគមន៍ក្នុងភូមិប្រម៉ា ស្រុកឆ្លូង ខេត្តក្រចេះ នោះ តុលាការក្រុងភ្នំពេញ ក៏បានកាត់ទោសមនុស្សចំនួន ១៣នាក់ផ្សេងទៀតក្នុងករណីនេះដែរ។ អ្នកទាំងនោះរួមមានឈ្មោះ ប៊ុន ឆន លោក ប៊ុន រដ្ឋា លោក សុខ តុង ភណ្ឌ ស្រឿន ខាន់ សុវណ្ណ ទូច រីម និងមនុស្សមួយចំនួនទៀត។
លោក ប៊ុន ឆន អះអាងថា ផ្ទះរបស់លោកដែលមានផ្ទៃដីទំហំ ២០ គុណនឹង ៨០ម៉ែត្រ និង ដីចំការទំហំ ៥០ហិកតារថែមទៀត ត្រូវបានកងកម្លាំងរដ្ឋាភិបាលឈូសកំទេច និងរឹបអូសយកទ្រព្យសម្បត្តិអស់ជាច្រើនពីគ្រួសាររបស់លោក ។ លោកបញ្ជាក់ថា ភស្តុតាងសមត្ថកិច្ចប្រមូលយកដើម្បីដាក់បន្ទុកចោទប្រកាន់រូបលោកក៏ដូចជាពលរដ្ឋភូមិប្រម៉ា មានដូចជាកាំបិត ចប ឬស្នាសម្រាប់បាញ់ត្រី បាញ់កង្កែប ថាជាអាវុធសំរាប់បង្កើតតំបន់អបគមន៍នោះ មិនសមហេតុសមផល។
លោក ប៊ុន ឆន៖ «ខ្ញុំសូមសួរទៅរដ្ឋាភិបាលថា គេប្រើកាំបិត និងចប ទៅធ្វើជាតំបន់អបគមន៍អ៊ីចឹង? ហើយរដ្ឋាភិបាលលើកទ័ពទៅប្លន់យកផ្ទះរបស់ខ្ញុំ រុះរើខ្ទេចខ្ទី យកម៉ូតូ យកទ្រព្យសម្បត្តិដែលខ្ញុំមានប៉ុន្មាននៅនឹងផ្ទះយកខ្ទេចខ្ទីអស់ហើយដេញបាញ់ខ្ញុំទៀត។ នេះមិនត្រូវលើកទ័ពទៅបាញ់ទាំងកំរោលនោះទេ មានទាំងឧទ្ធម្ភាគចក្រ តើរដ្ឋាភិបាលធ្វើយ៉ាងនេះសមទេ? ចំពោះជម្លោះថៃ ជាមួយខ្មែរ រដ្ឋាភិបាលមិនទាន់លើកទ័ពមានឧទ្ធម្ភាគចក្រទៅកម្ទេចថៃទេ ប៉ុន្តែបើដេញបាញ់យើងខ្ញុំ មានទាំងយន្តហោះ មានទាំងទ័ពរាប់ម៉ឺននាក់»។
កាលពីថ្ងៃច័ន្ទ ទី១ ខែតុលា ចៅក្រមតុលាការក្រុងភ្នំពេញ បានអះអាងថា ឈ្មោះ ប៊ុន រដ្ឋា និងបក្សពួកមានបំណងចង់បង្កើតតំបន់អបគមន៍ ដោយតាំងខ្លួនជាអាជ្ញាធរបែងចែកដីធ្លី ហើយបំផុសបំផុលឲ្យមានការបង្កើតអាវុធច្នៃប្រឌិតប្រឆាំងនឹងសមត្ថកិច្ច។ ជាមួយគ្នានេះ តុលាការបានចោទប្រកាន់លោក ម៉ម សូណង់ដូ ថាពិតជាមានជាប់ពាក់ព័ន្ធនឹងឈ្មោះ ប៊ុន រដ្ឋា ក្រោយពី ប៊ុន រដ្ឋា បានប្រកាសថា ខ្លួនជាសមាជិកសមាគមអ្នកប្រជាធិបតេយ្យ ដែលមានលោក ម៉ម សូណង់ដូ ជាប្រធាន។
លើសពីនេះទៀត ចៅក្រមក៏បានប្រកាសថា លោក ម៉ម សូណង់ដូ ជាអ្នករៀបចំធ្វើឲ្យមានកុបកម្មដែលមានខ្នងបង្អែកជាមួយលោក សួន សេរីរដ្ឋា ប្រធានចលនាអំណាចពលរដ្ឋខ្មែរ ដែលមានមូលដ្ឋាននៅសហរដ្ឋអាមេរិក។
អង្គការឃ្លាំមើលសិទ្ធិមនុស្សចំនួនបី មានអង្គការ Article 19, Forum Asia និងអង្គការ SEAPA កាលពីថ្ងៃទី៣០ ខែកក្កដា បានឲ្យដឹងថា ការចាប់ខ្លួនលោក ម៉ម សូណង់ដូ ប្រធានវិទ្យុសំបុកឃ្មុំ និងជាប្រធានសមាគមអ្នកប្រជាធិបតេយ្យ គ្មានអ្វីលើសពីការផ្សាយព័ត៌មានអំពីដំណើរការប្ដឹងលោក ហ៊ុន សែន ពីបទឧក្រិដ្ឋកម្មប្រឆាំងមនុស្សជាតិទៅតុលាការព្រហ្មទណ្ឌអន្តរជាតិ ដោយក្រុមចលនាអំណាចពលរដ្ឋខ្មែររបស់លោក សួន សេរីរដ្ឋា នោះទេ។
កាលពីថ្ងៃទី២៥ ខែមិថុនា លោក ម៉ម សូណង់ដូ បានផ្សាយអំពីដំណើរការប្ដឹងលោកនាយករដ្ឋមន្ត្រី ហ៊ុន សែន នៅលើវិទ្យុសំបុកឃ្មុំរបស់លោក។ មួយថ្ងៃបន្ទាប់ពីការផ្សាយដំណឹងនេះរួច លោកនាយករដ្ឋមន្ត្រី ហ៊ុន សែន បានបញ្ជាជាសាធារណៈថា ត្រូវតាមចាប់ខ្លួនលោក ម៉ម សូណង់ដូ ពីបទបង្កើតតំបន់អបគមន៍នេះ ឲ្យទាល់តែបាន ទោះរត់ទៅដល់ទីណាក៏ដោយ។
លោក ហ៊ុន សែន៖ «អ៊ីចឹងនៅសល់ ៤នាក់ទៀត សូមអញ្ជើញចេញសារភាព បើមិនដូច្នោះទោះទៅដល់ជើងមេឃ ក៏ត្រូវតាមចាប់ខ្លួនដែរ ហើយអាមេនៅភ្នំពេញ ធ្វើយ៉ាងម៉េចអីយ៉ាងម៉េច យើងដឹងអស់ហើយ។ វាអត់ហ៊ានចូលស្រុកទេ ហើយឥឡូវ អាមនុស្សនេះកំពុងនៅជាមួយអា សួន សេរីរដ្ឋា ដែលយើងកំពុងតាមចាប់ខ្លួនដែរ។ អានេះឡើងចង់ផ្ដួលរដ្ឋាភិបាលតាមកម្លាំងប្រដាប់អាវុធ។ អានេះឡើងប៉ុស្តិ៍អាវលឿងរបស់ថៃ កាលពីឆ្នាំទៅ។ លេងគ្នាជាមួយអាហ្នឹងម្ដងឲ្យច្បាស់ ទោះដោយតម្លៃណាក៏ដោយ។ ប៉ុន្តែបើឯងមិនចូលស្រុក កាត់ទោសកំបាំងមុខ ហើយសុំធ្វើបត្យាប័ន។ ចំណែកអ្នកដែលកំពុងលាក់ខ្លួនចេញមក លាក់នៅក្នុងព្រៃក៏ចេញ លាក់នៅតាមផ្ទះក៏ចេញ លាក់នៅតាមស្ថានទូត ឬអង្គការក្រៅរដ្ឋាភិបាល ត្រូវតែចេញមកបើចង់រួចខ្លួន»។
ជុំវិញការកាត់ទោសលោក ម៉ម សូណង់ដូ លោក ប៊ុន ឆន លោក ប៊ុន រដ្ឋា និងមនុស្សមួយចំនួនទៀត ពីបទចោទបង្កើតតំបន់អបគមន៍នេះដែរ លោក ចាន់ សុវ៉េត មន្ត្រីស៊ើបអង្កេតនៃសមាគមការពារសិទ្ធិមនុស្សអាដហុក (ADHOC) ដែលធ្លាប់ត្រូវបានតុលាការកោះហៅឲ្យចូលខ្លួនបំភ្លឺអំពីការចោទប្រកាន់ថា បានផ្ដល់ជំនួយដល់ចារី ក្នុងករណីបង្កើតតំបន់អបគមន៍នេះ ថ្លែងប្រាប់វិទ្យុអាស៊ីសេរី ពីក្រៅប្រទេសមកថា ការជំនុំជម្រះរបស់តុលាការក្រុងភ្នំពេញ ធ្វើឡើងមិនបានផ្អែកទៅលើអង្គហេតុ និងអង្គច្បាប់ពិតប្រាកដឡើយ។
លោក ចាន់ សុវ៉េត៖ «យើងឃើញថា តុលាការនៅក្នុងស្រុកខ្មែរលោកជំនុំជម្រះក្តីរឿងនេះហាក់បីដូចជាមិនមែនជំនុំជម្រះរបៀបយកច្បាប់មកអនុវត្តឲ្យបានពេញលេញ ឲ្យបានត្រឹមត្រូវ ដើម្បីការពារយុត្តិធម៌នោះទេ គឺការកាត់សេចក្ដីបែបនេះ គឺរបៀបលើកយកហេតុផលនយោបាយយកមកជំនុំជម្រះជាជាងការប្រើប្រាស់ច្បាប់នៅក្នុងប្រទេសកម្ពុជា»។
ទោះបីជាយ៉ាងណាក៏ដោយ មន្ត្រីជាន់ខ្ពស់របស់រដ្ឋាភិបាលបានបដិសេធថា ពិតជាគ្មានការជ្រៀតជ្រែករបស់រដ្ឋាភិបាលទៅក្នុងដែនសមត្ថកិច្ចរបស់តុលាការ ជុំវិញការកាត់ទោសលោក ម៉ម សូណង់ដូ នោះឡើយ។
អ្នកនាំពាក្យនៃទីស្ដីការគណៈរដ្ឋមន្ត្រី លោក ផៃ ស៊ីផាន មានប្រសាសន៍ថា មានតែមេធាវីការពារក្តីរបស់លោក ម៉ម សូណង់ដូ ប៉ុណ្ណោះ ដែលអាចនិយាយថា ការកាត់ក្តីនេះធ្វើឡើងដោយសមហេតុសមផល ឬយ៉ាងណានោះ៖ «នៅក្នុងសំដីហ្នឹង គួរតែជាសំដីរបស់មេធាវីលោក ម៉ម សូណង់ដូ ដែលត្រូវនិយាយ ដោយសារភាសាផ្លូវការ គឺត្រូវតែចេញពីពាក្យមេធាវីរបស់លោក ម៉ម សូណង់ដូ ដែលត្រូវនិយាយ មិនមែនសម្រាប់អ្នកនយោបាយ មិនមែនអង្គការក្រៅរដ្ឋាភិបាល ឬអ្នកដទៃទៀតក្រៅពីអ្នកឯកទេសក្នុងជំនាញច្បាប់»។
លោក សុក សំអឿន មេធាវីការពារក្តីលោក ម៉ម សូណង់ដូ កាលពីថ្ងៃច័ន្ទ ទី១ ខែតុលា បដិសេធមិនបញ្ចេញទស្សនៈចំពោះការសម្រេចសាលក្រមរបស់តុលាការនោះទេ។ លោកគ្រាន់តែបញ្ជាក់យ៉ាងខ្លីថា ការជំនុំជម្រះដោយយុត្តិធម៌ ឬមិនយុត្តិធម៌ គឺអាស្រ័យទៅលើជនជាប់ចោទដោយខ្លួនឯងវិនិច្ឆ័យប៉ុណ្ណោះ។
ទាក់ទិននឹងបញ្ហានេះដែរ អ្នកវិភាគឯករាជ្យ លោកបណ្ឌិត ឡៅ ម៉ុងហៃ មានប្រសាសន៍ថា កាលៈទេសៈនៃការចាប់ខ្លួនលោក ម៉ម សូណង់ដូ និងអ្នកពាក់ព័ន្ធមួយចំនួនទៀតនេះ ត្រូវបានគេគ្រោងធ្វើយ៉ាងល្អិតល្អន់ក្នុងមូលហេតុនយោបាយច្រើនជាងក្នុងករណីបទចោទបង្កើតតំបន់អបគមន៍នៅខេត្តក្រចេះ នោះទៅទៀត។
លោក ឡៅ ម៉ុងហៃ៖ «ចំពោះខ្ញុំ គ្មានអ្វីដែលភ្ញាក់ផ្អើលអីទេ អាហ្នឹងតែកាលណាគេចាប់ហើយ ករណីអ៊ីចឹងៗគេមិនឲ្យរួចខ្លួនទេ។ អារបៀបកាត់ទោសប្រញិបប្រញាប់ហ្នឹង ហើយរឿងនេះរឿងធំ ពាក់ព័ន្ធនឹងមនុស្សច្រើន ហើយដូចជារយៈពេលពីការចាប់ខ្លួនមកការកាត់ទោសដូចឆាប់ដែរបាទ! មួយទៀត សាមីខ្លួនលោក ម៉ម សូណង់ដូ ហ្នឹង មានការទិតៀនដល់រដ្ឋាភិបាលហ្នឹងរាប់ឆ្នាំហើយ ដូចជាមានផ្នែកនៃគំនុំហ្នឹងមួយផ្នែកផងដែរ»។
នេះមិនមែនជាលើកទីមួយទេសំរាប់ការចាប់ខ្លួនលោក ម៉ម សូណង់ដូ ដោយរដ្ឋាភិបាល។ កាលពីឆ្នាំ២០០៣ ប្រធានវិទ្យុសំបុកឃ្មុំរូបនេះ ត្រូវបានចាប់ខ្លួនពីបទផ្សាយព័ត៌មានមិនពិត និងញុះញង់ឲ្យមានការរើសអើងនាំអោយមានបាតុកម្មមហាជនវាយកម្ទេចស្ថានទូតថៃ។ នៅឆ្នាំ២០០៥ លោកត្រូវបានសមត្ថកិច្ចចាប់ខ្លួនម្ដងទៀតពីបទបរិហារកេរ្តិ៍ ញុះញង់ និងបទផ្សាយព័ត៌មានមិនពិត បន្ទាប់ពីលោកផ្សាយបទសម្ភាសន៍ស្ដីពីបញ្ហាព្រំដែនវៀតណាម-កម្ពុជា ជាមួយលោក ស៊ាន ប៉េងសែ ប្រធានគណៈកម្មាធិការព្រំដែនកម្ពុជា ដែលមានទីស្នាក់ការនៅប្រទេសបារាំង។
ទោះជាយ៉ាងណាក៏ដោយ ភរិយារបស់លោក ម៉ម សូណង់ដូ អ្នកស្រី ឌិន សុផាណារ៉ា បានហៅការកាត់ទោសស្វាមីអ្នកស្រីឲ្យជាប់គុកចំនួន ២០ឆ្នាំនោះ ថាជាអំពើអយុត្តិធម៌ ហើយអ្នកស្រីប្រកាសថា នឹងប្ដឹងទាស់ទៅសាលាឧទ្ធរណ៍បន្តទៀត៕
No comments:
Post a Comment
yes