អង្គការតម្លាភាពកម្ពុជា និងដៃគូរពាក់ព័ន្ធ នឹងរៀបចំវេទិកាផ្សព្វផ្សាយ រួមនិងសិក្ខាសាលាអប់រំដល់ប្រជាពលរដ្ឋតាមមូលដ្ឋាន ក្នុងខេត្តចំនួនបី ក្នុងទិវាប្រឆាំងអំពើពុករលួយអន្តរជាតិ ៩ធ្នូ ថ្ងៃស្អែកនេះ។
នាយកប្រតិបត្តិនៃអង្គការតម្លាភាពកម្ពុជា លោក ព្រាប កុល ឲ្យដឹងថា វេទិកាផ្សព្វផ្សាយនេះ ធ្វើឡើងក្នុងគោលបំណង លើកកម្ពស់ការយល់ដឹងរបស់ប្រជាពលរដ្ឋតាមមូលដ្ឋាន ដើម្បីចូលរួមទប់ស្កាត់ និងប្រឆាំងអំពើពុករលួយនៅកម្ពុជា។ លោកបន្តថា វេទិកា និងសិក្ខាសាលាផ្សព្វផ្សាយនេះ នឹងធ្វើឡើងក្នុងខេត្តចំនួនបី គឺខេត្តកំពង់ចាម ខេត្តសៀមរាប និងខេត្តបាត់ដំបង ដោយមានអ្នកចូលរួមប្រមាណ ២០០ ទៅ៥០០នាក់ ក្នុងខេត្តនិមួយៗ។
ប្រធានគណៈកម្មាធិការកម្ពុជាឯករាជ្យប្រឆាំងអំពើពុករលួយ លោកស្រី ម៉ម ស៊ីថា មានប្រសាសន៍ថា អំពើពុករលួយ ជាបញ្ហាចម្បងមួយដែលបង្កនូវភាពអយុត្តិធម៌ ប៉ះពាល់ធ្ងន់ធ្ងរទៅលើជីវភាពរស់នៅប្រចាំថ្ងៃរបស់ប្រជាពលរដ្ឋ និងការប្រកួតប្រជែងក្នុងវិស័យសេដ្ឋកិច្ចទីផ្សារសេរី។ លោកស្រីយល់ថា កត្តាទាំងនេះ រាជរដ្ឋាភិបាលកម្ពុជា ត្រូវអនុវត្ត និងចាត់វិធានការឲ្យបានម៉ឺងម៉ាត់ ដើម្បីប្រឆាំងអំពើពុករលួយ និងធានាថាវឌ្ឍនភាពនៃកិច្ចខិតខំប្រឹងប្រែងនេះ មិនដើរថយក្រោយ។
កន្លងមក មន្ត្រីអង្គការតម្លាភាព បានដាក់ជាអនុសាសន៍ ដោយជំរុញរាជរដ្ឋាភិបាលកម្ពុជា ពន្លឿនការអនុម័តច្បាប់ សិទ្ធិទទួលបានព័ត៌មាន ដើម្បីធ្វើឲ្យមានតម្លាភាព និងគណនេយ្យភាពនៅតាមស្ថាប័នរដ្ឋនានា។ អង្គការ ក៏បានជំរុញឲ្យអង្គភាពប្រឆាំងអំពើពុករលួយ អនុវត្តច្បាប់ឲ្យបានតឹងរឹង និងមានប្រសិទ្ធភាពបន្ថែមទៀត។ លោកនាយករដ្ឋមន្ត្រី ហ៊ុន សែន កាលពីថ្ងៃទី៨ ខែវិច្ឆិកា បានជំរុញចេញច្បាប់ស្តីពីសិទ្ធិទទួលបានព័ត៌មាន បន្ទាប់ពីក្រុមអង្គការសង្គមស៊ីវិល ទទូចចង់បានច្បាប់នេះ ជាច្រើនឆ្នាំមកនោះ។
អង្គការតម្លាភាពអន្តរជាតិ(Trasparency International) កាលពីថ្ងៃទី៣ ខែធ្នូនេះ បានដាក់បង្ហាញសន្ទទស្សន៍នៃអំពើពុករលួយឆ្នាំ២០១៣ ឲ្យដឹងថា ប្រទេសកម្ពុជា ត្រូវបានចាត់ថ្នាក់១៦០ ក្នុងចំណោមប្រទេសចំនួន១៧៧ ដែលបញ្ជាក់ថា អំពើពុករលួយក្នុងវិស័យសាធារណៈរបស់កម្ពុជា នៅតែមានកម្រិតខ្ពស់។ កាលពីឆ្នាំ២០១២ កម្ពុជាមានចំណាត់ថ្នាក់លេខ១៥៧ ក្នុងចំណោមប្រទេសចំនួន១៧៦ ដែលមានអំពើពុករលួយធ្ងន់ធ្ងរ៕
No comments:
Post a Comment
yes